بنات آخر زمن الباقى

من طرف dega الأربعاء سبتمبر 30, 2009 8:51 pm

عشان انا زهقت خلاص .. ده باقي القصة كلها

الحلقة الخامسة عشر " اسأل استشير "

* سعيد سمع ان اشرف عمل حادثة و قاعد في البيت فلازم يعمل الواجب و يزور صاحبه القديم.
* سعيد ده يبقى مهندس الكترونيات و هو اكبر من اشرف بسنة و كان زميل اشرف في المدرسة و في الجامعة و كمان ساكن في منطقة قريبة من اشرف.

- سعيد:"ايه يا عم الحكاية. يا دوب اسيبك كام اسبوع ارجع الاقيك معور نفسك كده".
- اشرف:" يخرب بيت برطمان عسلك. كنت فين ياد بقالك فترة؟؟؟".
- سعيد:" يعني...... كنت بتفسح شوية ... ما انت عارف صاحبك يحب كل فترة يسافرفرنسا او النمسا!!!".
- اشرف:" الله يرحم ابو العربي. ياد انت ابعد حتة روحتها كانت الكلية. بجد كنت فين؟؟؟".
- سعيد:" بحضر للدكتوراة ياسيدي عقبال عندك. وجع قلب و مذاكرة من تاني".
- اشرف:" ربنا يوفقك يا سيدي و نشوفك داكتووور قد الدنيا. طب ما تشوفلي حاجة لرجلي مادام هتبقى دكتور".
- سعيد:" من واقع خبرتي انا شايف اننا نجيبلك هارد وير جديد او نفرمت رجلك!!!!".
- اشرف:" فين ايام زمان. كبرنا و الوقت خدنا و الشغل و الدنيا".
- سعيد:" و لسة يا ريس لما تتجوز كمان . هتنسى الدنيا باللي فيها".
- اشرف:" اتجوز؟؟؟!! مش لما الاقي بنت الحلال الاول".
- سعيد:" يا نهارك اسود..... هو انت لسة مالقتش بنت الحلال؟؟؟ ربنا يعوض عليكي يا خالتي ام اشرف".
- اشرف:" اعمل ايه يعني؟؟؟؟؟ اعمل اعلان مطلوب عروسة؟؟؟؟!! و لا امشي اقول عروسة يا اولاد الحلال".
- سعيد:" لا يا عم الشحات... مالكمش جيران؟؟؟ ما عندكش زميلات في الشغل؟؟؟ طب و ليه... ماكنش معاك بنات في الجامعة؟؟؟ ياد البنات اللي في الدنيا دول كلهم مش مكفيينك؟؟؟؟؟؟؟!!!!!".
- اشرف:" انا عارف كل ده بس اعمل ايه برضة يعني؟؟؟؟؟؟؟؟".
- سعيد:" يالهويييييييييييييييييييي...... بص يا حبيبي انت استنى و اكيد هتلاقي بنت الحلال اللي هتيجي و تطلب ايدك!!!! و انت الف مين تتمناك!!!!!!!!!! ربنا يعوض عليكي يا خالتي!!!!!!!".
- اشرف:" انا بتكلم جد. ما انت عارفني عند البنات لا بعرف اقول ولا انيل... طب اعمل ايه بس؟؟!! انا كدة .. ربنا خلقني كدة.. خيبة و لخمة".
- سعيد:" انت صعبت عليا. و عشان خاطر العيش و السدق اللي بينا ممكن نفكر مع بعض"
- اشرف:" ايدي على كتفك او على قفاك. قول يا سيدي يمكن تتضح لك لزمة في الحياة".
- سعيد:" لا بص.. من اولها كدة قلة ادب.. هسيبك و امشي... و خليك لما تعنس".
- اشرف :" خلاص يا عم.. ان كان لك عند ال... انت حبيبي يا سعيد!!!".
- سعيد:" بص يا سيدي.. قولي و بكل صراحة و دقة و وضوح و شفافية... انت مفيش واحدة كدة و لا كدة ..يعني.. معجب بيها... مستظرفها.. بتحب تشوفها.. كدة يعني..".
- اشرف:" هو كل دة بحسة مع.......... لا مفيش!!!!!!!!!!!!!".
- سعيد:" اعترف احسن لك. قول بالذوق بدل ما اقول لامك انك بطيخة".
- اشرف:" اقولك بس توعدني انك مش هتقول لحد".
- سعيد:" يعني انت هتقوللي على مكان اسامة بن لادن يا خي!!!!. ولا كنت هذيع الخبر في التليفزيون وسط المسلسل!!!!!!".
- اشرف :" انت من اولها هتبقبق بالكلام.... كل الحكاية اني مشدود ليها شوية.. شوية صغيرين قوي.. و مش عارف اذا كانت تعرف عني حاجة و لا لأ...!!".
- سعيد:" و تبقى مين المأسوف على شبابها دي يا ترى؟؟؟".
- اشرف:" ماشي يا عم التربي... تبقى بنت الاستاذ اللي بشتغل عنده".
- سعيد:" حلوة ياد!!!!!!!!!".
- اشرف:" انت هتلم نفسك و لا اقوم اقلملك؟؟!!... و بعدين انا مش قضيتي حلوة و لا لأ... هي مش زيّنا كدة".
- سعيد:" قصدك انها من كوكب المريخ الشقيق؟؟!!!!!!!".
- اشرف:" ايه السكر دة كله؟!!!!!!! ابقى سيبلنا شوية قبل ما تمشي... قصدي يا خفيف ان سلو بلدهم مش زي سلو بلدنا... و انها من الطبقة المنفتحة على الاخر... بتوع هاي مامي هاي بابي".
- سعيد:" يا حظك المدوحس يا اشرف.... اسمعها مني نصيحة.... انساها خالص و اوعى تفكر فيها تاني... و بكرة تلاقي احسن منها... اهم حاجة في الواحدة اللي هتتجوزها ان طباعكو و افكاركو تكون متقاربة..... و انا عارفك... ابوك فلاح .. و امك صعيدية... و مخلفين واد دماغة تايواني.... فابعد عنها يابن الحلال... انت لا بتستحمل المياعة و لا المرقعة.... و فكرك المستقيم بالنسبة لها هيبقى تفكير رجعي و متخلف".

* سعيد اطمن على اشرف و روّح.
* اشرف سمع الكلمتين دول ... و كان جواه ما يؤيد هذا الكلام ... فسلمها لله و قال انام احسن.

الحلقة السادسة عشر " عيد ميلاد روميو "

* النهاردة 15 /9 وده يوم عيد ميلاد رامي (* فاكرينه). فرامي راح بيت الاستاذ ابو المجد يعزمهم فما لقيش حد في البيت.. فراح المكتب. وقابل الاستاذ ابو المجد.. و لقي عنده اشرف (* حبيبه من زمان!).

- رامي:" صباح الخير يا عمو".
- الاستاذ ابو المجد:" صباح الخير يا رامي".
- رامي:" صباح الخير يا اشرف".
- اشرف:" صباح ال..خير يا استاذ رامي".
- رامي:" انا روحت البيت مالقيتش حد.. هما تنت و سوسو راحو فين؟؟"
- الاستاذ ابو المجد:" ده صحيح.. اصل هما راحو يشترو شوية حاجات.. خير كنت عاوزهم في حاجة؟؟".
- رامي:" اه.. اصل النهاردة عيد ميلادي.. فكنت جاي اعزمكم..".
- الاستاذ ابو المجد:" كل سنة و انت طيب يا سيدي.. بس افتكر اني مش هقدر اجي انت شايف عندي شغل كتير قوي.. بس ممكن خالتك و سوسو يروحو".
- رامي:" طيب يا عمو... و لو حبيت تيجي يا اشرف اهلا بيك طبعا (* طبعا)".
- اشرف": شكرا.. بس افتكر اني مش هقدر اجي لان عندي شغل كتير النهاردة".
- الاستاذ ابو المجد:" شغل ايه يا راجل!!! روح اتبسطلك حبة .. فك عن نفسك (* و خنق على رامي)".
- اشرف:" بس يا استاذ انا.......".

* و رامي عاوز يقوله لأ ما تجيش.

- الاستاذ ابو المجد:"مفيش بس.. انت هتروح مكاني.. و كمان انت معزوم يا اخي.. بص انت تعدي على مدام نهال و سوسو ياخدوك معاهم عشان انت ما تعرفش البيت... و كمان عشان يبقى معاهم حد يخلي بالو منهم.... و انت عارف يا اشرف انا بثق فيك اد ايه".

* اشرف ما قدرش يفتح بقه بعد الكلام الحلو اللي قالهولو الاستاذ ابو المجد. و تاني مرة يتدبس في عيد ميلاد .. لأ و اية.. رايح مع سوسو و مامتها.

* اشرف روح البيت و هو محتار و مش عارف يعمل اية. المهم اتصل بمدام نهال و اتفق معاها يعدي عليهم الساعة سابعة. (* ربنا يسهل)
* اشرف واقف على باب شقة الاستاذ ابو المجد و بيضرب الجرس بتوتر.. و الباب اتفتح...

- اشرف:" السلام عليكم... مدام نهال موجودة؟؟؟".
- مدبرة المنزل:" اتفضل حضرتك.. هي مستنياك". (* حلوة مدبرة منزل دي مش كدة)

* اشرف دخل و قابل مدام نهال و......

- اشرف:"السلام عليكم يا فندم.. ياريت ماكنش اتاخرت و لا حاجة.. و ياريت ماكنش بسبب ازعاج بوجودي".
- مدام نهال": لا انت جاي في معادك تمام... و بالنسبة للازعاج.. مافتكرش اني ممكن اكون منزعجة من شخص مؤدب زيك.. و غير كدة الاستاذ بيحبك قوي و بيثق فيك جدا".
- اشرف :" شكرا حضرتك... و ده شرف ليا".
- مدام نهال:" طب اتفضل استريح...و لما تشرب حاجة تكون سوسو جهزت".

* و شرب اشرف العصير (* عصير لونه احمر لكن طعمه مش فراولة. و اشرف اتكسف يسأل ايه ده). و جهزت سوسو و خرجت.. و لما شافها اشرف قال سبحان الله.

* اشرف مش كان بيقول سبحان الله على حلاوتها ..لأ.... لكن لقي تغيير رهيب...حجاب محترم بعد ما كانت بتمشي عادي بشعرها........ لبس واسع طويل محترم بعد اللبس الضيق و القصير و الشفاف.... وش نضيف منور مش عليه فتفوتة ماكياج.....

- اشرف (* في سره):" طب لية؟؟؟ معقول ربنا هداها كدة؟؟ سبحان الله!!!!".

* المهم....... ركبو العربية (*بتاعت مدام نهال) و ذهبو في طريقهم الى حفلة عيد الميلاد. و في الطريق دار حوار قصير بين اشرف و مدام نهال.........

- مدام نهال:" هو انت متجوز يا اشرف؟؟؟؟؟؟؟؟".
- اشرف:" لا حضرتك انا مش متجوز".
- مدام نهال:" طب خاطب؟؟؟؟؟؟".
- اشرف:" و لا خاطب حضرتك".
- مدام نهال:" طب ليه ماتجوزتش لحد دلوقتي. انت شاب كويس و عندك وظيفة محترمة بدخل كويس و سنك مناسب. يبقى ليه ماتتجوزش لحد دلوقتي؟؟!!!".
- اشرف:" و الله يا مدام نهال لسة ما حصلش نصيب. يعني زي ما حضرتك تقولي كدة لسة ما لقتش بنت الحلال".
- مدام نهال:" طيب يا سيدي ربنا يرزقك ببنت الحلال...... احنا وصلنا خلاص".

* طول الحوار ده و سوسو مترقبة كل كلمة هتتقال. مامتها عمال تفحّر في حياة اشرف و هو مش مديها معلومة مفيدة.
* وصلو النادي اللي رامي عامل البارتي فيه. و هناك حس اشرف انه داخل كبارية من اللي كان بيشوفهم في افلام زمان لكن بصورة عصرية.......... ناس عمال ترقص مع بعض ..... و بنات فلوسهم ماكفتش يجيبو لبس كامل.... و كاسات الله اعلم فيها عصير قصب و لا تمر...... ومزيكا ايه...... مسخرة.... اشرف شاف المنظر دة وحس انه داخل ديسكو في امريكا.... عمل انه جاله صداع فجأة و قالك لا يا عم انا اخلع من الجو ده ......

- اشرف:" انا حاسس اني عندي صداع جامد و مضطر استأذن".
- مدام نهال:" ده احنا لسة واصلين و ملحقناش نقعد".
- اشرف:" معلش حضرتك انا لازم اروح... عن اذنكو".
- مدام نهال:" طب هتروح ازاي؟؟ استنى لما اوصلك و لا خلي سوسو توصلك".
- اشرف:" شكرا حضرتك انا هعرف اروح ان شاء الله".
- سوسو:" طب استنى اوصلك هتروح ازاي و انت تعبان؟؟!!".
- مدام نهال:" صحيح يا اشرف هتروح ازاي و انت تعبان؟؟ خلي سوسو توصلك".
- اشرف:" لا لا لا...... شكرا جدا.. انا هاخد تاكسي يوصلني لحد البيت و هكون كويس قوي ان شاء الله".

* و اصر اشرف بشدة انه يروح لوحدة....... ما هي مش ناقصة ان سوسو تروحه كمان. و روح اشرف و عدت الليلة دي و كانها حمل تقيل و خلص منه.

الحلقة السابعة عشر " موظف على أد حاله"

* في ساعة عصاري كدة و اشرف قاعد مع ابوه بيشربو الشاي... ابوه راح غامزه بكلمتين ..........

- الحاج مصطفى:" انت يابني مش هتتجوز بقى و لا ناوي تقعد معانا على طول؟؟!!!".
- اشرف:" جواز اية يا حاج!!!..... ما انت عارف الجواز بيعوز مصاريف... و انا لسة في البداية و ما كونتش نفسي لسة".
- الحاج مصطفى:" تكون نفسك ايه و تهبب ايه!!!!! انت لو ناوي تتجوز بعد ما تكّون نفسك هتكون بلغت من الكبر عتيا.... كل الشباب يابني اهلهم هم اللي بيجوزوهم".
- اشرف:" ما انا عارف البير و غطاه ياحاج...... فين الفلوس اللي تكفي اتجوز بيها".
- الحاج مصطفى:" انت شكلك لا عارف بير و لا غطا و قاعد في البيت زي الحمار مش فاهم حاجة".
- اشرف:" طب ليه الشتيمة يا حاج!!!!!! فهمني بالراحة طيب".
- الحاج مصطفى:" راحة ايه بقى..... انت عايش معانا و مش عارف احنا عندنا فلوس و لا لأ .......... انت عارف انا اسمي ايه يلا و لا مابتخدش بالك!!!!!!!".
- اشرف:" ما خلاص بقى يا حاج....... فهمني ينوبك فيا ثواب".
- الحاج مصطفى:" انت عارف انا شغال ايه و فين؟؟؟؟؟؟؟؟".
- اشرف:" طبعا يا حاج...... شغال موظف في شركة الكهربا".
- الحاج مصطفى:" شغال موظف في شركة الكهربا من تلاتين سنة....... يعني لو كنت سلك كهربا كان زماني اترقيت و بقيت كابل دلوقتي...... انا دلوقتي رئيس قسم الحسابات".
- الحاج مصطفى:" عارف انا مرتبي كام؟؟؟؟".
- اشرف:" لا يا حاج.... كام؟؟؟؟؟؟".
- الحاج مصطفى": حوالي الفين جنية في الشهر........... و لما اطلع ع المعاش هاخد مكافأة حوالي 200 الف جنية و معاش حوالي الفين جنية".
- اشرف:" بسم الله ما شاء الله يا حاج.... انا اول مرة اعرف الحاجات دي.... ده احنا اغنيا على كده!!!!".
- الحاج مصطفى:" الغنا مش بالفلوس يا بني.... مانت شايف احنا عايشين ازاي....بنلبس احسن لبس و بناكل احسن اكل و عايشين في شقة كويسة جدا... لكن لا بنسرف و لا بنبخل .. و عايشين بما يرضي الله".
- اشرف:" كلامك صح يا حاج".
- الحاج مصطفى:" طبعا انت عارف ان انا و امك عندنا ارض في البلد!!!".
- اشرف:" طبعا يا حاج هو انا نايم".
- الحاج مصطفى :" تعرف الارض دي بتجيب كام في السنة ايراد و تساوي كام دلوقتي؟؟؟؟".
- اشرف:" تلاقيها تساوي عشرين الف جنية دلوقتي...... مانا اسمع ان الارض بتغلا".
- الحاج مصطفى:" عشرين الف جنية!!!!!!!!!!!!!.......... و عاملي محامي ..... و بتقول مش نايم ........ ياد هو احنا عندنا متر ارض.... مش انا عندي اربع فدادين ارض زراعية في البلد و امك عندها فدانين .. ده غير الخمسميت متر الارض المباني اللي خدناهم من خمس سنين في الاراضي الجديدة؟؟؟".
- اشرف:" فعلا يا حاج".
- الحاج مصطفى:" اهو الست فدادين دول بيجيبو في السنة ايراد حوالي متين الف جنية".
- اشرف (*بهبل):" ايه!!!!!!!!!!!".
- و تعرف تمنهم كام ؟؟؟؟؟؟؟؟؟؟".
- اشرف:" كام ؟؟".
- الحاج مصطفى:" الفدان دلوقتي في حدود150 الف جنية ....... يعني الست فدادين حوالي مليون ...... ده غير حتة الارض المباني .. دي لوحدها تمنها وصل حوالي خمسميت الف جنية بعد ما دخلت كردون المدينة و عدى قدامها الطريق الصحراوي الجديد".

* اشرف بيبص لابوه بذهول. و حاسس كأنه كان مسافر و لسة راجع.

- الحاج مصطفى:" لك حق تستغرب يا بني ....... عندنا الفلوس دي كلها و مش راكبين عربية اخر موديل و مكتفيين بالعربية البيجو بتاعتي .... و لا ساكنين في فيلا.... ولا عندنا شالية في مارينا .... و لا ماشيين نبص ع الناس من فوق ...... لكن انا مش عاوز الفلوس تبوظكو..... و الفلوس اللي بتيجي بحطها علطول في البنك و بنصرف من مرتبي بس ....... و دلوقتي يا بني انت و اخوك ليكو في البنك اكتر من مليون جنية و لما اموت اوعو تغركو الفلوس دي ....... انا جمعتها من حلال و مش عاوزها تتصرف غير في الحلال".
- اشرف :" موت ايه يا حاج بس اللي بتتكلم عنه".
- الحاج مصطفى:" بعد ما فهمت انك مش فقير و لا حاجة اوعا تحس انك بقيت احسن من الناس بفلوسك. و دلوقتي الفلوس دي اخر حاجة تفكر فيها لما تيجي تتجوز".
- اشرف:" اومال ما رضيتش تجيبلي عربية ليه يا حاج اروح بيها الشغل بدل الشحططة اللي انا فيها دي".
- الحاج مصطفى:" انا كنت ناوي اجيبلك عربية بس لما تشتغل و تتحمل مسئولية مش تبقى زي بتوع مامي و بابي اجيبلك العربية تموت بيها الناس و تتنطط بيها على خلق ربنا...... بس انت برضة هتدفع 10% من تمن العربية اللي تختارها عشان تحس بقيمتها و انا هدفع الباقي ..... و ما تحوش فلوس للجواز و لا حاجة.. الفلوس موجودة بس انت توريني بنت الحلال ".

الحلقة الثامنة عشر " مصباح علاء الدين "

* عدت الليلة دي على اشرف و هو حاسس انه شخص جديد بعد ما اكتشف فجأة انه غني و كل احلامه ممكن تتحقق ببساطة.
*و اشرف ماشي في الشارع لقي ع الرصيف جذمة عجيبة و جمبها حاجة زي مصباح علاء الدين ... مسك المصباح و دعكه راح طالعله العفريت... اتخض حتة خضة..
- العفريت:" اطلب كل اللي نفسك فيه".
- اشرف (*بكل جرأة):" عاوز كوتشي اديداس و سندوتش كبدة".

* و في ثانية راح العفريت جايبله كوتشي اديداس و سندوتش شاورمة...

- اشرف:" انا كنت عاوز كبدة انت جايبلي شاورمة ليه؟؟".
- العفريت :" ده اللي لقيته".
- اشرف:" انت بتستهبل !!!.. انا عاوز كبدة.... انا عاوز كبدة... انا عاوز كبدة".

* صحي صلاح من النوم على صوت اشرف.... انا عاوز كبدة... لقيه بيحلم. راح مصحيه و قاله فيه ايه؟؟ ايه حكاية الكبدة دي؟؟ فحكاله اشرف ع الحلم الغريب ده.. و فضل صلاح يضحك لما كان هيفطس.

* اما اشرف فما عرفش ينام تاني. و كل ما يفتكر الحلم يقعد يضحك. لكن تفكيره قاله ان تفسير الحلم ده انه لقي مصباح علاء الدين لما عرف انه مش فقير زي ما كان فاكر و يقدر يجيب كل اللي هوه عاوزه. فقرر اشرف انه يكمل حياته زي ما هو و لا كأنه عرف حاجة.

* فجأة التليفون بيرن.....

- اشرف:" الو..... السلام عليكو....مين معايا".
-.........:" انا كنت بطمن بس انك وصلت البيت و انك كويس... هو الصداع راح؟؟؟؟".
- اشرف:" الحمد لله... بس انت عارفة الساعة كام دلوقتي؟؟؟ الساعة دلوقتي واحدة بعد نص الليل".
- سوسو:" انا صحيتك من النوم ولا اية؟؟؟ انا اسفة قوي".
- اشرف:" لا ابدا انا كنت صاحي اصلا... المصباح صحاني.. قصدي العفريت... لا لا ما تخديش في بالك".
- سوسو :" هو فية ايه".
- اشرف:" لا ابدا كنت بحلم و بعدين صحيت".
- سوسو:" كابوس يعني؟؟؟".
- اشرف:" لا هو مش كابوس قوي.... يعني.... الكبدة في الحلم خير".
- سوسو:" كبدة ايه؟؟؟ هم الرجالة ما بيفكروش غيرفي الاكل و بس ؟؟".
- اشرف:" لا ابدا... ده حتى كان فيه كوتشي اديداس في الحلم". ( * مش اكل وبس)
- سوسو:" كبدة .. وكوتشي ...... لا دانت لازم تحكيلي الحلم".
- اشرف:" لا دا حلم عادي يعني....مش........".
- سوسو:" انا مصرة تحكيهولي".

* اشرف حكالها الحلم من هنا و هي ما قدرتش تمسك نفسها من الضحك.
* و بص اشرف في الساعة لقيها الثانية بعد منتصف الليل.

- اشرف:" ايه ده... الساعة بقت اتنين دلوقتي".
- سوسو:" ده طبيعي.. بما ان من ساعة كانت الساعة واحدة.. فطبيعي انها دلوقتي تكون اتنين".
- اشرف :" لا مش قصدي.. انا بس عمري ما تكلمت مع حد قبل كدة في التليفون لوقت متأخر كدة و بالذات لو كانت بنت.. افتكر ان ده غلط".
- سوسو:" يعني انا اول واحدة تتكلم معاها ؟؟؟؟؟؟؟؟؟؟؟".
- اشرف :" اه و الله .... انا عمري ماتكلمت مع واحدة قبل كدة في التليفون".
سوسو:" مصدقاك من غير ما تحلف .. تصبح على خير".

الحلقة التاسعة عشر " جيل ما يعلم بيه الا ربنا "

* بعد المكالمة دي اشرف ماعرفش ينام و فضل طوووووول الليل يفكر في الكبدة.
* و الصبح زي كل يوم راح على المكتب فالاستاذ ابو المجد ندهلو.

- الاستاذ ابو المجد:" تعال يا اشرف عاوزك".
- اشرف:" نعم حضرتك...خير يا استاذ".
- الاستاذ ابو المجد:" فيه زميل جديد هينضم ليكو في المكتب من بكرة ان شاء الله و انا كنت بقولك عشان تكون عارف".
- اشرف:" يشرف يا استاذ ... يا مرحب بيه".

* و خلص معاد المكتب و اشرف روح .. و في الطريق حود على مطعم و راح ضاربله اربع سندوتشات كبدة بلدي تمام. (* احلامه بتتحقق!!!!!!!)

* و في الطريق عدا على معرض عربيات يتفرج و يشوفله عربية تكون كويسة و بسعر معقول و اتفق مع صاحب المعرض انه هيعدي عليه مرة تانية بعد فترة عشان يشتري. (* اغتنا بقى)

* و في البيت ..........

- الحاج مصطفى:" ها يا اشرف لقيتلك عروسة؟؟".
- اشرف :" ايه يا حاج... انت كلمتني امبارح فانا نزلت اجيبها النهاردة.... هو انا بشتري سندوتش".
- الحاج مصطفى:" خير البر عاجله يابني ..... و انا عاوز افرح بيك قبل ما اموت". ( * كحكحكح)
- اشرف:" ان شاء الله افرحك يا حاج ... بس اديني فرصة يعني لحد ما الاقي بنت الحلال".
- الحاج مصطفى:" يا ولا ... انت عاوز تقولي ان مفيش واحدة كدة و لا كدة ... قول ماتخافش يالا".
- اشرف :" لا يا حاج مفيش ".
- الحاج مصطفى:" يا نهار امك اسود ... امال بتهبب ايه يا منيل !!!... داخل خارج و متشيك ... انت بتتشيك لينا يابن الهبلة ....".
- اشرف:" يا حاج.........".
- الحاج مصطفى:" انت مستني امك تجيبلك واحدة من السوق؟؟!! .. ولا واحدة تيجي تخطبك .... يا خيبة املي في عيالي".
- اشرف :"يا حاج.........".
- الحاج مصطفى:" بص بقى ... مفيش عربية و لا فلوس و لا بدل غير لما تيجي و تقولي فيه واحدة تعالا اخطبهالي يابا ... ".
- اشرف :" يا حاج...".
- الحاج مصطفى:" ياد ده انتو في زمن مهبب ... انت مش بتشوف الولاد بيعملو ايه؟؟ ... هو انا بقولك عاكس و لا امشي مع بنات .... انا بقولك شوف واحدة تتجوزها ... جيل ما يعلم بيه الا ربنا".

* الحاج مصطفى رزع اشرف الكام كلمة دول و دخل على اوضته ... و اشرف قعد في الصالة مش عارف يعمل ايه.

- اشرف:" يعني اعمل ايه ياخواتي؟؟؟ اضرب الارض تتطلع بنات .... و لا اشوف اي واحدة في الشارع ووديها لابويا ؟؟؟ و انا اوجع دماغي ليه؟؟!! انا اخليني واد جرئ و...............".

الحلقة العشرون " الزميل الجديد "

* تاني يوم اشرف يروح المكتب لكن يفاجأ بشئ لم يكن يتوقعه ... الزميل الجديد.......

- اشرف(*شكله متضايق):" السلام عليكو".
- ايمن ( *واحد من زمايله في المكتب):" و عليكم السلام.... مالك مبوز ع الصبح كده ليه؟؟؟".
- اشرف:" الحاج يا سيدي ... مصمم يا اتجوز يا مفيش فلوس".
- ايمن:" هههههه ... يا بختك يا عم".
- اشرف :" يا بختي على ايه ؟؟... ما هو المصيبة ان مفيش عروسة اصلا".
- ايمن:" خيبة عليك .... و مفيش عروسة ليه ؟؟؟ روحت تجيب لقيتهم خلصو؟؟؟!!!".
- اشرف :" لا يا لذيذ يا رايق ..... لسة بدور على بنت الحلال".
- ايمن :" طب بص على بنت الحلال دي!!!!!!!!!!!!!".

* ملاك خارج من مكتب الاستاذ ابو المجد.........

- اشرف:" ايه ده يلا!!!!! .... مين القمر دي ؟؟... الزبونة دي مع مين؟؟؟؟ ".
- ايمن :" دي مش زبونة يا معلم ... دي الزميل الجديد!!!!!!!!".
- اشرف:" و هتكون معانا هنا في المكتب ؟؟؟ ".
- ايمن :" لا ... هنشوفلها اوضة جنب البواب تحت ... طبعا هتكون معانا في المكتب".
- اشرف:" بس دي حلوة اوي ......... ربنا يسترها معانا".
- ايمن:" ربنا يسترها معاك لوحدك ياعم ".
- اشرف:" ليه؟؟؟؟".
- ايمن:" هو انت ما تعرفش .... ما هو مكتبها هيتحط في اوضتك ياريس ... باوامر الاستاذ ابو المجد شخصيا ...........".
- اشرف:" ايه!!!!!!!!!!!!!!!".
- ايمن:" يا بختك يا عم .... هتفضل طول النهار مع الجمال ده كله".
- اشرف:" لا يا عم مش عاوز ..... انا هكلم الاستاذ يحط مكتبها مع حد تاني غيري او يوديني انا في حتة تانية".
- ايمن:" مغفل ...... حد يسيب فرصة زي دي ... ده انت فقر".
- اشرف:" انا كويس كده ......... هي الحكاية ناقصة".

* و راح اشرف يكلم الاستاذ ابو المجد بخصوص الزميلة الجديدة..........

- اشرف:" لو سمحت يا استاذ انا كنت عاوز اطلب من حضرتك طلب".
- الاستاذ ابو المجد:" خير يا اشرف؟".
- اشرف:" كنت عاوز اكون في مكتب تاني ..... يعني مع رجالة زمايلي".
- الاستاذ ابو المجد:" ليه؟؟؟؟".
- اشرف:" يعني....... هكون مستريح اكتر".
الاستاذ ابو المجد:" يعني لما تيجي زبونة ست تبقى تقولها لا اصل انا مش بستريح مع الستات ....... و لا نمنع الستات من دخول المكتب ....... لازم يا اشرف تتعود التعامل مع اي حد و تحت اي ظرف .... و مش عاوزك تتكلم في الموضوع ده تاني".
- اشرف:" انا اسف حضرتك".

* و اشرف ملقيش حل غير انه يرضى بالامر الواقع و يحاول يتأقلم معاه. و في مكتبه..........

- نور (* الزميلة الجديدة):" انا اسمي نور زميلتك الجديدة في المكتب ..... اتمنى ماكونش مسببالك ازعاج ... و ياريت يكون بيننا علاقة كويسة".
- اشرف:" اهلا بحضرتك .... و ان شاء الله تستريحي معانا في المكتب".
- نور:" بلاش حضرتك دي ... قوللي يا نور و انا اقولك يا اشرف ... احنا خلاص بقينا زملا". (* اهلا)
- اشرف:" ماشي يا نور".

* البت حلوة اوي .... و اشرف مش عارف هيتعامل معاها ازاي ... و هي شكلها منفتحة و بتتعامل مع الناس ببساطة اوي ....... و ربنا يسترها معاه.

الحلقة الواحدة و العشرون و الاخيرة " ايه اللي بيحصل ده !!!"

* اشرف شال الهم تاني .. بعد اسبوع من وجود نور بدات العلاقة بينهم تتطور بشكل سريع .. هي بتتعود ع الناس بسرعة و بتتعامل معاهم ايزي .. و اشرف خايف يخبط معاها في الكلام زي عوايده و مش قادر يقول حاجة للاستاذ و مش قادر يجاريها في تصرفاتها الجريئة. بقت تجيب سندوتشات و عصاير و تجيبلو معاها و تهزر معاه (* الواد ده الحكاية ملطشة معاه على طولليه كدة ...... بس اهي مصلحة برضة في سندوتشات)

* اشرف مستني معجزة تخلصو من الورطة اللي هو فيها.

* مالم يكن متوقعا قد حدث. في زيارة عادية قامت بها سوسو لمكتب باباها و تلاقي نور بتدي اشرف سندوتشات و عصير............................ (*هي الحكاية سندوتشات و عصير!!! طيب)

* و عند لقاء سوسو مع نور بدأت وصلة ترخيم بناتي ( *البنات جبابرة لما بيرخمو على بعض).
* اشرف خلع من الحوار ده كله و استأذن و روح.
و في البيت...........

- اشرف:" يا حاج انا كنت بفكر افتح مكتب لوحدي.. ايه رايك؟؟".
- الحاج مصطفى :"و ماله يابني ... شوف المكان اللي ينفع مكتب و ربنا يسهل".

* و في قعدة صفا مع والدته..........

- اشرف:" ماتعرفيش يا ست الكل واحدة بنت حلال تخطبيهالي؟؟".
- ام اشرف:" ايه الكلام ده يابني!!! هو فيه حد الزمان ده بيعمل كدة؟؟!!".
- اشرف:" اصل مفيش حد معين في دماغي و انت تعرفي الناس و العائلات و لو عندهم بنت كويسة نشوفها ... لو الموضوع مشي كان بها .. و لو غير كدة يبقى ربنا مش رايد".
- ام اشرف:" اشوفلك يابني".

* اشرف عقد العزم انه يتجوز زي ما كان القدماء بيتجوزو.

النــــــــــهــــــــــــــــــــــايــــــــــــ ـــــــة

من طرف heba الأربعاء سبتمبر 30, 2009 10:21 pm

لا المفروض انه كان اتجوز سوسو
مليش دعوة بقى

بس حلوة قوى
ثانكس ليكى ديجا :okok:

من طرف hosameldeen الأربعاء سبتمبر 30, 2009 10:44 pm

بدون مجاملة أول مرة أقرأ قصة تشدني في المنتدى

بس قراءة الموضوع صعب لأن السطور قريبة جداً من بعضها

وكمان الخط صغير

لو حضرتك كاتبة شيء تاني يا ريت تنشريه لاني مهتم بالأدب شويتين

موضوعاتي hosameldeen & babroman21

تحت هذين الإسمين يا ريت تقرأيهم وتقولي لي رايك

من طرف dega الأربعاء سبتمبر 30, 2009 10:56 pm

ميرسى لمروركم نورتو القصة
وان شاء الله هقرا موضوعاتك

بنات آخر زمن الباقى

بنات آخر زمن الباقى

رد: بنات آخر زمن الباقى

رد: بنات آخر زمن الباقى

رد: بنات آخر زمن الباقى