بنات آخر زمن2

من طرف dega الثلاثاء سبتمبر 29, 2009 8:33 pm

الحلقة التانية " ســــوســـو مع الشـــــــــــــــــــــلــة "

*خرجت سوسو على سنجة عشرة عشان تروح مع صحابها السينما. خدت تاكسي وصلها قدام السينما عشان صحابها مستنينها هناك.

- سوسو:"Hi girls " (*كلمة من اصل افرنجي تعني السلام عليكو)

- كوكو (*واحدة من الشلة): " انت اتاخرتي ليه؟ ده احنا مستنينك من بدري".

- سوسو:" معلش الطريق كان زحمة. ها!! هنشوف فيلم ايه؟؟؟"

- كوكو:" حته فيلم رومانسي انما ايه!!!".

- سوسو:" ياه انا بموت في الافلام الرومانسية".

* شاب طويل حليوة بص ع الشلة دي من بعيد و الظاهر كان الجيل كتير على شعره فعجبوه.

- كوكو": شايفة الواد الامور اللي هناك دة؟؟ عمال يبص علينا ازاي. شيك قوي. (*بادي مع ستريتش جنان).

- سوسو": طيب حد جاب التذاكر؟؟؟؟؟".

- كوكو:"انا هروح اجيبهم". (*ده في حد ذاته تضحية مهولة لان على شباك التذاكر كمية من البشر لو اتوزع عليهم سلاح كانو حررو فلسطين)

* و بعد محاولات مستمرة فاشلة.

- الشاب الروش:" عنك انت. انا هجيبلك التذاكر. هتقعدو فين؟؟؟؟"

- كوكو:" في الصف اللي ورا"

- الشاب الروش:" ياه ده نفس المكان اللي بقعد فيه على طول". (*شوف الصدف)

* و بعد ما زاحم و طلعت عينه جاب خمس تذاكر ليه و لشلة البنات.

- الشاب الروش:" اتفضلو يا جماعة انا جبت التذاكر"

- كوكو:" ميرسي جدا. انت جانتي خالس"

* دخلو السينما و اتفرجو على الفيلم الاجنبي المسخرة و بعد ما خرجو صاحبنا لزقلهم زي كوز الغرا.

- سوسو:" الفيلم كان هايل"

- كوكو:" فعلا. و اجمل حته لما البطل خد البطلة في حضنه و عيطت. انا كنت هعيط. (*اسم الله عليكي ياختي).

- الشاب الروش:" كان رائع بجد . فين الرومانسية دي دلوقتي؟؟؟!!! ( بيرمي خيط عشان يفتح موضوع هه)

- سوسو:" طبعا لسة موجودة. و البنات معروف انهم رومانسيين قوي". (**اكييييد)

- الشاب الروش:" صحيح ماتعرفناش؟؟؟؟"

** وبعد ما تعرفو و خدو تلفونات بعض و هزرولهم شويه. الساعة بقت واحدة بعد نص الليل.

- سوسو:" طيب انا لازم امشي بقى عشان ماتأخرش". ( *قال يعني هي كدة ماتأخرتش)

- الشاب الروش:" ما لسة بدري؟؟؟ دي الساعة لسة واحدة!!! ( No comment )

- سوسو: " معلش انا لازم امشي. باي"

* وخدت سوسو تاكسي لحد البيت. و كانت مامتها مستنياها على نار. و اول ما دخلت من باب البيت...

- مدام نهال:" ما لسة بدري يا هانم. الساعة معاكي كام دلوقتي؟؟!!!" ( شكلها هتبهدلها)

- سوسو:" الساعة واحدة و عشرة"

- مدام نهال:" مش قلتلك ما تتأخريش عن الساعة واحدة؟؟؟!!!!"

- سوسو:" بس دول عشر دقايق بس يا مامي"

- مدام نهال:" المشكلة مش في العشر دقايق. المشكلة اننا اتفقنا على حاجة و انت مش نفذتيها. خشي دلوقتي على اودتك و بكرة لينا كلام تاني" ( *ايه ده!!!!!!! ايه الاسرة المحافظة دي)