بنات آخر زمن4

من طرف dega الأربعاء سبتمبر 30, 2009 7:48 pm

الحلقة الرابعة " عيد ميلاد ابو الفصاد "

* انتهي معاد اشرف في شغل المكتب و هيروح دلوقتي. نزل من المكتب و دور على اتوبيس و لا ميكروباس (*لسة في بداية المشوار). و وصل البيت و الحمد لله.

- اشرف:" السلام عليكو يا حاج".

- الحاج مصطفى (* ابو اشرف):"و عليكم السلام يابني. ها، ايه اخبار الشغل معاك. ماشي و الحمد لله؟؟"

* الحاج مصطفى بقى راجل طيب اوي و متدين. هو موظف على اد حالة في هيئة الكهربا.

- اشرف :"الحمد لله يا حاج. اسكت مش حصلي النهاردة حتة موقف".
- الحاج مصطفى:"خير يابني".

-اشرف:"اتخانقت النهاردة مع واحدة كانت داخلة المكتب من غير لا احم و لا دستور. و في الاخر اكتشفت انها بنت الاستاذ ابو المجد".

-الحاج مصطفى:" و بعدين يابني. حصلت مشاكل و لا حاجة؟ و لا الاستاذ زعل؟؟".

-اشرف:"الحمد لله ماحصلش حاجة. اصل الاستاذ ابو المجد طيب اوي. (*و بنته مدلعة زيادة عن اللزوم)".

-الحاج مصطفى:" طيب يابني العشا جاهز اهوه. امك عملته و نامت. ما انت عارفها، يدوب تصلي العشا و تنام. و اخش انام انا كمان. تصبح على خير".

-اشرف:" وانت من اهله يا حاج".

* و طلع النهار و راح اشرف على شغله. و في المكتب..

- الاستاذ ابو المجد:"صباح الخير يا اشرف".

-اشرف :"صباح الخير يا استاذ. و انا بعتذر عن سوء التفاهم اللي حصل امبارح".

-الاستاذ ابو المجد:"سوء تفاهم ايه يا راجل. و عشان تصدق، ادي يا سيدي دعوة عيد ميلاد بنتي سوسو بعد بكرة و لو ماجتش هزعل بجد".

-اشرف:" و انا اقدر على زعل حضرتك . هاجي طبعا يافندم".

-اشرف( * بيفكر في سره):" عيد ميلاد ايه بس. هو انا اعرف دول بيعملو ايه في اعياد الميلاد؟ و كمان ماعرفش اجيب هدية عاملة ازاي؟ و الهدية هتعوز فلوس. ليه التدبيسة دي بس؟؟؟!!!. ربنا يستر".

*وجه يوم عيد الميلاد و اشرف جهز هدية محترمة. و اتشيك ع الاخر. و راح على بيت الاستاذ ابو المجد. وفي بيت الاستاذ ابو المجد......

- اشرف:" السلام عليكو. كل سنة و بنت حضرتك طيبة يافندم"

- الاستاذ ابو المجد:"وبتقولي انا الكلام ده ليه؟؟!! ماعندك سوسو دور عليها و قلها الكلمتين دول. شوفها مع صحابها و لا في اوضتها".

- اشرف (*في سره):"اوضتها!!!!!!" ( *ايه العيلة السبور دي)

* المهم اشرف بص لقيها واقفة مع شلة بنات صحابه. هو اتكسف يروحلها. لكن عاوز يخلص عشان يروح. راح داخل عليها بكل جراة و ....

-اشرف:" كل سنة و حضرتك طيبة يا انسة سوسو (*وقدملها الهدية) و ياريت ما تكونيش لسة متضايقة من الموقف اللي حصل في المكتب؟؟".

- سوسو:" لا ابدا. و شكرا على الهدية. هيه فيها ايه؟؟؟" (* يا ترى فيها ايه؟؟؟؟).

* و فتحت سوسو الهدية لتجد.............

- سوسو :" ايه ده كتاب!!! ( *و صحباتها فضلو يضحكو). و اسمه اية؟!! رياض الصالحين؟؟؟!! ده كتاب تاريخ و لا قصص؟؟؟؟!!!!!!!!" ( No comment )

- اشرف:" لا ده مش قصص. ده كتاب بيضم احاديث الرسول. عليه الصلاة و السلام.".

* و سادت لحظة صمت. و ظهر الخجل على جميع اصحاب سوسو.

- سوسو :" متشكرة يا اشرف".

- اشرف:" على ايه بس. عن اذنك بقى انا مضطر امشي".

سوسو:" ما لسة بدري. و على فكرة كرافتتك مربوطة كويس النهاردة.

* اشرف حط ايدة على كرافتته و مشي و هو مكسوف موت.