مذاكرة ولابد منها

السلام عليكم ;)
طبعا يا جماعة الفترة الجاية كلنا لازم نبدأ نذاكر .. واللي ميعرفش حاجة زي حالاتي هيبدأ يلم اللي فاته .. خاصة ان انا سمعت من ناس في الدفعة اللي قبلنا اننا لازم نذاكر في فترة اجازة نصف السنة لأن الترم الثاني كله امتحانات و شيتات وكده :scratch: , ومش هنلاقي وقت نذاكر..
عشان كده لو سمحتم عايزين نكتب في الموضوع ده كل حاجة خاصة بالمذاكرة في الفترة دي ... الحاجات النظري بالذات لأن العملي يعتبر سهل
ممكن؟؟؟؟؟؟؟؟؟؟؟؟؟؟؟؟؟؟؟؟؟ :)

فعلا والله الواحد نفسه يذاكر لاني بصراحة حاسس بالضياع مش عارف حاجة في اي حاجة
طيب اللي عنده حاجة ينزلها فعلا علشان نعمل حاجة قبل الاجازة كي نستطيع التمتع بها بدل ما نقعد نذاكر زي ما دكتور N بتقول كده لان ده شكله اللي هيحصل :( :(

بصوا يا جماعة انا هقول اللي اعرفه
الحيوان فسيولوجي : بذاكره من المحاضرة
هستولوجي وسيتولوجي : انا جبت ورق د.سامح وشكله كده كويس
امبريولوجي : من الكتاب بس في المحاضرات الاخيرة . بقت المحاضرات احسن

النباتفسيولوجي : من ورق الدكتور , مضطرين طبعا
ميكروبيولوجي : مش عارفة اذاكرها من على الكمبيوتر ومش جبتلها ورق , مش عارفة بقى

الكيمياءالفيزيائية : انا عن نفسي بذاكر من المحاضرات
العضوية : ليها ورق حلو في ميدان +ورق د.حاتم شكله منظم
العامة : من محاضرات د.جابر

الفيزياءالاوبتكس : في الضياااااااااااااااااع
الدنتال وملحقاتها : بردو مش لاقيالها مصدر معين

الاحصاء تقريبا مفيش

اللغة سمعت ان اخر السنة بينزل لها كام ورقة يتذاكرو وخلاص

انا قلت كل حاجة بصراحة .. ياريت بقى لو حد عنده معلومة تسهل علينا يقولها
وبجد عايزة حد يقوللي اعمل ايه في المواد اللي طايرة مني دي
بليـــــــــــــــــــــــــــــــــــــــــــــــز عايزة مشاركاتكم

أنا أكتر حاااااجة خااايفة منها الميكروووووووو متفتحتش خاااالص مش عارفة أعمل فيها إيه وبحضر محاضراتها كلها من أول السنة ومبفهمش منها حاااجة خااالص

والله انا اللي اعرفه في اللي قولتيه
الميكرو: ليها ورق في ميدان بتاع د/مز ابو المعاطي تقريبا
الاوبتكس: هو مش الدكتور كان بيقول على صفحات في الكتاب باين اصلي مش بحضرله من زمان
انا بقى اللي محيرني بجد بتعرفوا تقروا ورق الفسيولوجي النبات ازاااااااااااااااااااااااااي ؟؟؟؟؟؟؟؟

أنا لسة مجربتش أقرأه بس هحاول بس الميكرو قال نذاكروه من الحاجات اللى نقلناها بالفلاشة والكتاب و أنا مش فاهمة منهم حاااجة

وانا برضو والله زيك تقريبا يا دكتورة
يا ريت حد يدلنا
ربنا يخليكوا

أنا دكتورة شكرا يا رقية بجد عسسسسسسسسسسسسسسسل

الاحصاء يا جماعه هنجيب فيها ورق احمد عطيه.....و تقريبا موجود ف ميدان او لسه هينزل....مش عارف.....بس احنا م الاخر هنجيب الورق بتاعه بس مش هى دى المشكله دلوقتى

طب يا جماعة عايزين نتفق مع بعض على حاجة نذاكرها وعايزين نعمل ده مجال للتنافس ونشوف مين اللى هيذاكر الاكتر ايه رايكم

اقتراح روعه وانا موافقه ادخل فى التنافس ده
لاننا بجد لازم نذاكر
ها نبدا بمذكرت ايه؟؟؟؟؟؟؟؟؟؟؟

فكرة جميلة جدا يا دكتور محمد

بس نخلص مذاكرة عملي الحيوان والفيزيا وبعدين نحدد
ماشي

ونجيب ورق الدكتور احمد عطية احصاء زي ما الدكتور مصطفى قال
وكمان نتصرف في الباقي زي ما الدكتور N
قالت

ماشي يا جماعة

بجد فكرة جميلة اوي وانا موافق عليها جدا بس يا ريت تبقى من 1/1 علشان نكون خلصنا المصيبتين اللي عندنا دول الاول :lol: :lol:
بس اللي يعرف ينزل حاجة جديدة من النظري يا ريت ينزلها على المنتدى علشان اللي عايز يبدا هو و علشان لما نيجي نبدا ان شاء الله نبقى جاهزين باللي هنذاكر منه وربنا يوفقنا جميعا

خلاص اتفقنا ان شاء الله من اول 1/1 عشان نخلص من الامتحانات ونفضى ونحاول نقسم المذاكرة وربنا يوفقنا جميعا

وانا معااااااااكم لانى بجد بجد فى الضياع ولازم الم ولو جزء من المناهج فى اجازه نص السنه بس ربنا ياخد اصحابى ومايقولوش نسافر بس بجد فكره جامده وربنا معانا

هههههههه ان شاء الله ما هتشوف صحابك دولت وان شاء الله كلنا مع بعض

ههههههههههههه ااااااااااااامين يا رب

طب طالما هنذاكر بقى
حد يقوللي ال 7 رسومات بتوع هيستولوجي اللي في الاخر
stomach,ileum,skin و كده بيتحفظوا ازاي؟؟!!!!

بقالي اسبوع ببصلهم و اعيط
ومفيش جديد
ممكن يكونو هما حفظوني
بس انا لسة :(

ما شاء الله .. أحسن حاجة في دفعتنا انها بجد بتحاول تساعد بعضها .. الحمد لله
1- ورق الميكرو بتاع د. محمد ابو المعاطي نصحوني بيه الدفعة اللي قبلنا فعلا .. بس لو هنذاكر من الdata show بتاعت الدكتور هيكون احسن لانه اكيد ده مصدر الامتحانات .. بس انا مش عارفة اذاكره من على الكمبيوتر .. تفتكروا ممكن نشترك ونطبعه وننزله في مكتبة مثلا ولا ايه ؟؟

2- الاوبتكس فعلا الدكتور بيقول فيها على صفحات .. بس انا لسه محاولتش اقراها .. وبعدين في ناس قالولي ان امتحانات د. فكري بتحتاج كتابة كتير .. مش فهم بس زي ما هو بيقول .. وبعدين بتهيألي مش بينزلها ورق .. انا بفكر اروح اسأله نذاكر منين

3-ورق فسيولوجي النبات لازم نقرأه شئنا ام ابينا .. احنا ما صدقنا ان فيه مصدر من دكتور هييجي منه الامتحان اكيد .. وطبعا هيكون ادق من اي ورق تاني

4- ورق د.احمد عطية جبته بس مش فتحته ..يارب يكون كويس .. وعلى فكرة اللي مش بياخد كورسات زيي كده لازم يحضر المحاضرات .. لأن الاحصا ميتهيأليش ممكن تتفهم من غير شرح

5-اقتراح المذاكرة مع بعض ده كويس جدا .. لان كلكو عارفين ان نظام الجداول ده فاشل وغالبا مش بيتنفذ .. بس لما نتابع بعض اكيد هيكون احسن

6-اما شرائح الهستولوجي يا د. خالد فانا اول مرة اذاكرها النهاردة وهي فعلا رخمة .. حاول تقرأهم كويس وترسمهم كتير وتقارن بينهم وتكون عارف كل نوع خلايا مكانه فين في كل رسمة .. وقبل الامتحان راجع عليهم كويس .. ويارب القطاعات دي متجيش اصلا

اسفة طولت عليكو .. بس كنت عايزة ارد على كل حد ... ويارب ينفع بينا
وبعدين ... هنذاكر ازاي واحنا طول اليوم على النت :D

امر واقع يعني ؟؟؟؟
يبقى خلاص .. حضرتك تحاول فيهم على قد ما تقدر
وبعدين انا دايما اطمن نفسي واقول
اكيد الناس اللي عدوا السنة اللي فاتت مش احسن مننا

يا جماعه هدوا اعصابكوا .. الموضوع مش معقد ان شاء الله .. احسن حاجه في الرسومات

والحاجات المعقده دي ان الواحد يذاكر مثلا النهارده رسمه او اتنين ويضبطهم اوي ولو نساهم بعد

شويه مش مشكله .. ييجي بكره يراجعهم كويس ويذاكر كمان غيرهم ويضبطهم .. واليوم للي

بعده يراجعهم كلهم ويذاكر الجديد وهكذا .. اهم حاجه المراجعه الكتير .. والله انا كتير بيجيلي

حالات الاحباط والياس دي والاحساس بالضياع بس بحاول ابقي رايقه واعصابي بارده .. وجربوا

تحسوا ان مفيش حاجه صعبه كله ان شاء الله سهل .. وزي ما N قالت اللي قبلنا مش احسن

مننا .. اكيد كان فيه منهم ضايعين ونجحوا وقدروا كمان ..

وبعدين انا بحس انا مناهجنا دي نعمة مقارنه بمناهج صحابي اللي في طب وصيدله ..

عشان كده روقوا واستكنيسوا وانتخوا وربنا معانا ان شاء الله :) ..!!

يا خالد انا هذاكرهم كده انا بمسك اتنين اتنين منهم واحاول ارسمهم واحفظهم وكل شوية اراجع عليهم وهكذا وربنا يوفقك

أنا حاولت أحفظ الست رسومات اللى فى الأخر دول ورسوماتهم سهلة بس المشكلة إنهم تحت الميكرسكوب إخوات معظمهم شكل بعض أوى يعنى stomach زى ileum و oesophagus فيه إختلافات بسيطة اوى مش عارفة هنفرق بينهم فى الإمتحان إزاى

بجد ده اللي حاصلي بالضبط يا د/امنية انا كنت هتهبل وانا في المراجعة اللي اتعملت دي شبه بعض اوي ولو الشريحة اتحركت سنة ضغنونة بيتغير الشكل تماما عن اللي شفناه قبل كده :(