(( خايف ))

من طرف dr_khaled الإثنين أغسطس 30, 2010 5:27 pm

جاية والوردة في اديكي
أرجوكي متقوليش
انك بتحبيني

متقوليش "حبيبي"
وحياتي انت ..
ونور عيني

ده أنا دقت م الحب مُرُه
ومش أول اما الأيام يمروا
تيجي انتي وتشوفيني

أيوة حبك على راسي
ويمكن حبك في القلب راسي
لكن لسة الماضي
بجرحُه كاويني

خايف ...
أيوة خايف أكون

أول حد يعلمك
ايه معنى الشجون

يعني ايه بعد الفراق
تشوفي الإسود ...
ألف لون

خايف تشوفي العشق
بعد قصر كبير
يِصبَح سجون

أصل الحب يا غالية دين
وأنا أصلي ...
محبش أكون مديون

سهل أحبك
وأقولك بحبك
وأكتب قصيدة ع العيون

وقصيدة ع الرموش
وقصيدة ع الجفون

وأفضل أغازلك وأغنيلك
كله عـلـــشانِك
يهون

وأعيش حالم
زي ما حلمت قبلك

ويقولوا تاني
بالحب صار مجنون

أصل انتي مش دريانة
باللي .... دار ياما
لما عشقت واتجرحت

لما بخيالي حلمت
عشت ...
وسرحت

وقبلك باحولي بحبهم
وليهم كمان
بحت

ورد الزمان ع العشق أسى
والغرام في عيونهم قسى
ولسة مش ناسي ...
اللي عندُهم اتــنـسى

جاية زي طفلة
والشوق في عنيكي باين
جاية زي طفلة
و لــكـــــن ...

عليكي خايف
لأني شايف
اللي برقة قلبك متشوفيهوش

جاية دلوقتي
تقولي بتحبيني
ياريتك جيتيلهم
قبل ما تـجيني
يمكن بَحبك
بس خايف
بعدين تشوفيني

كأنك .. ما شفتيني

من طرف esraamohsen57 الإثنين أغسطس 30, 2010 9:01 pm

جميلة
وعجبنتى اوووى
بس لية كدا حزينة؟؟

من طرف dr_khaled الإثنين أغسطس 30, 2010 11:43 pm

esraamohsen57 كتب: جميلة
وعجبنتى اوووى
بس لية كدا حزينة؟؟

معلش بقى
كان مودي ساعتها حزايني شوية :)
ميرسي يا إسراء

من طرف Dr/Asmaa الثلاثاء أغسطس 31, 2010 12:07 am

حلوة يا خالد
بس تقيلة شوية في القراية

مستنين جديد

من طرف dr_khaled الثلاثاء أغسطس 31, 2010 1:02 am

Dr/Asmaa كتب:
حلوة يا خالد
بس تقيلة شوية في القراية

مستنين جديد

ماهو العامية بالذات الالقاء فيه أحسن م القراية
لو ألقتهالك هتبقى أحسن
:D
ميرسي يا أسماء

من طرف roma الثلاثاء أغسطس 31, 2010 1:24 pm

جاية دلوقتي
تقولي بتحبيني
ياريتك جيتيلهم
قبل ما تـجيني

وضح :
ياريتك جيتلهم
هم دى عايده علي مين ؟

يعني ايه بعد الفراق
تشوفي الإسود ...
ألف لون

المفروض بعد الفراق تبقي شايفه كل حاجه في عنيهاسودا مش العكس شايفه الاسود الف لون

حلوة ياخالد وحزينه فعلا
مش انت الى كنت بتقولى بلااش حزن بتكتب ليه حزين بقي :D
في انتظار مزيدك

من طرف sheref ashraf الثلاثاء أغسطس 31, 2010 3:31 pm

بعد فراقو هوا يا روما مش فراقها هي :]
بس جيتلهم قبل ما تجيلي دي فعلا مش فاهمها

حلوة يا خالد

من طرف dr_khaled الثلاثاء أغسطس 31, 2010 4:49 pm

جيتيلهم قبل ما تجيني :
عايدة ع اللي هو حبهم قبلهاعشان تعرف منهم ان نهاية الحب كانت الفراق والعذاب .. ودي تتفهم م الأبيات اللي قبلها

تشوفي الإسود ألف لون :
لما يكون الاسود لون واحد وسط الالوان احتمال انها تصادفه في حياتها بيكون قليل .. لكن انا اقصد ان الاسود هيكون منتشر .. بدل ما هو لون واحد هيكون الف لون .. ودرجات كتير .. الحياة بتكون غامقة يعني

معلش بقى عشان حزينة .. بس مش دايما بكتب حزين يعني :)

ميرسي يا سماح
وميرسي يا شريف