صدقنى انا عارف

صدقني انا عارف



صدقني أنا عارف إن الصلاة فرض وإني لازم أصلّي في الجامع

صدقني انا عارف إن السجاير حرام وإنها بتضيع فلوسي وصحتي

صدقني أنا عارف ان القهاوي حرام

صدقني انا عارف إن المفروض ماارتبطش بالبنات وأكلمهم..

وإن اللي هعمله معاهم هيتردلي في عيلتي

صدقني انا عارف إن أنا على غلط وإن أنا كده قريب من النار

صدقني أناعارف أن الحشيش والإستيلا والمخدرات حرام وبتضيعلي عقلي وبتخليني زي الحيوان

صدقني أنا مش وحش وأنا بحب ربنا وبحب النبي صلي الله عليه وسلم

صدقني.. وصدقني.. وصدقني

صدقني أنا عارفة إن شعري لازم أغطيه وإني بآخد سيئة بكل شعرة بتبان منه..

وإن كل شاب بيتفتن بيّا بآخد سيئة عليه

صدقني أنا عارفة إني لازم أصلي.. وإني أحافظ على نفسي لحد ما أتجوّز

صدقني انا عارفة إن المفروض مقعدش على قهاوي وأشرب شيشة

صدقني انا عارفة إن المفروض محدش يلمسني غير اللي يحلّ ليّا بس

صدقني أنا عارفة إني المفروض ما أنزلش من بيتنا بالهدوم دي

صدقني.. وصدقني.. وصدقني

وفي الآخر إدعيلي ربنا يهديني

معلومة بسيطة:::

المعرفة غير الإيمان

إنك عارف ان الصلاة فرض ... مش كفاية

كلنا عارفين ان اللي بيسمع الأذان بيوطّي صوت الكاسيت وقت الأذان..

إنما لو كان مؤمن كان نزل صلّى

انا عارف إنك عارفة إن الحجاب فرض..

بس فين حجابك؟ فين إيمانك؟

إنك لازم تكوني عفيفة..


إنك أغلى من الجواهر..

متقوليش القماشة اللي على الراس دي حجاب مش هنضحك على بعض

إنتوا فين؟.. ورايحين فين؟

انتوا مستنيين إيه؟

مستنيين إن أخوك أوأختك أو بنتك تموت قدامك وهي بتعمل المعصية؟

مستني إن ربنا يبتليك بسرطان ولاّ شلل علشان تتوب وتفوق من اللي انت فيه؟

مستنية إن ربنا يبتليكي بمرض جلدي عشان تخبّي لحمك اللي مفرّجة الناس عليه؟

ولاّ يوقعلك شعرك اللي مطيّراه على الناس؟

ولا مستني ربنا يعميك بعينك اللي ما بتسيبش بنت معدية إلا وفحصت بيها كل حتّه فيها؟

مستني إنك تدخل القبر ويسألك الملكين: من ربك؟ ومن نبيك؟ وما دينك؟

هترد بإيه؟

هترد باللي كنت عايش عليه في الدنيا؟

كنت بتعيّط عشان حبيبك.. ومعيّطش من خشية ربنا؟

كنت بتبص للبنات ومبصّتش في كتابه تقرأ قرآنه؟

هتقول إيه لنبيك على الحوض؟ هتقولّه انا بحبك بس مبسمعش كلامك؟

فوقوا بقى

فوقوا بقى قبل ما تموتوا

اللهم اهدنا واهدي بنا



منقوول

صدقينى الموضوع حلو اوى
جزاكى الله كل خير
ربنا يهدينى ويهديكى ويهدنا كلنا
ياااااااااااااااااااااااااااااااااارب

مش عارفه اقولك ايه
بس توبيك تحفه تحفه والله ياميما
والكلام جميل والاسلوب برده جزاب كده
ربنا يجعلنا نعمل بيه بجد ونتجنب المعاصي دى كلها
امين يارب وربنا يهدينا كلنا ويجازيكى خير علي التوبيك
الروعه ده

امين يا رب
منورين يا جماعة والله
ايه وايموووو وسماااااح
وربنا يهدينا يا رب جميعا

جزاكم الله خيرا وجعله فى ميزان حسناتك

الإيمان هو ما وقر فى القلب ( يقين) وصدقة العمل ( فعل)

شكرا د/ ميما

بجد ياميما فوق الرائع
جزاكى الله كل خير
وربنا يهدينا جميعا ويهدى شباب المسلمين
تقبلى مرورى

ربنا يهدينا جميعا يارب
جزاكى الله خيرا

شكرا لمروركم الكريم
د/ديزنر
منمون
بوسي

ربنا يبارك فيكم
ويا رب يهدينا جميعا

شكرا يا ميما على الموضوع الجميل والمفيد دا وربنا يجعلة فى ميزان حساناتك

ربنا يهدينا جميعا

تسلم ايدك يا اميمة توبك رائع ربنا يهدينا كلنا جميعا يا رب
وحشانى والله

شكرا لمروركم
رونا: امين يا رب منورة التوبيك
روينا:سلمتى من كل سوء .. وانتى وحشانى اكتر

موضوع رائع.... ربنا يحفظك وينفع بيكى

شكرا يا د/مودى
مرورك الاروع

صفة إيجابية للموضوع المغزى رائع وغرضة الهداية
سلبية الأسلوب مكرر ويتردد كل يوم بكل مافية
الحل تغير الأسلوب الموضوع يصبح أكثر من رائع
تقبلى مرورى ولكى جزيل الشكر

شكرا لمرورك ورايك
بس هو انا نقلاه مش كتباه عشان اغير اسلوبه
نورت اتوبيك

ابداع ايه يا بنتى انتى تعرفي عنى كده .. ههههههه
نقلاه بكل فخر ماشاء الله ... لازم يعنى تكسفينى كده ههههههه

منورة يا يويو

بجد من اجمل المواضيع اللى شفتها و اسلوبه رائع جدا
ربنا يهدينا فعلا
شكرا د.أميمة