كرسي الاعتراف

وأكيد شوية وهسامحك يا روما ع الخضة بس مش قادر دلوقتي بصراحة انا اتخضيت اوي





هههههههههههه
والله معرف ان قلبكو رهيف كده
انا لو مكانكو هتخض بس فكرة الموضوع عجبتنى
قلت اشوف هتعملو ايه
بس اكيد انت مسامحنى شكلك طيب وهتسامحنى صح
خلاص بقي انت كده حددت نوعيت اسئلتك ههريك اسئله هتشوف
ههههههههههههههه

1- اسم الدلع الي بيناديك بيه اصحابك او اقرب الناس ليك
2-مقوله مشهورة انت مقتنع بيها ودايما ترددها
3-امتى بدات تكتب شعر
4-ايه الي حببك في الشعر امتى حسيت انك موهوب
5-مين اول حد شجعك وقالك انت موهوب اكتب كمان
6-من الي له فضل في انك بقيت الدكتور خالد
7-لو مكنتش دخلت اسنان كنت تحب تدخل ايه تانى
8- حلم ضاع منك وكنت بتتمناه
9- دايما حاسه انك حزين ياترى حزنك ده ميزة فيك يعنى نقدر نقول دفعك للكتابه اكتر
10-مين اقرب اخواتك ليك ومين احنهم عليك ومين انت احن عليه من الباقي
11-بتحب الافلام الهنديه طب ايه رايك فيها
12-ايه نوع الاغانى الي بتحب تسمعها غير الانجليزى يعنى رومانسيه او اي اغانى والسلام كده ةيعنى
13-ايه الاغنيه الي بتحس انها بتعبر عنك اوى وكانها متالفه عشانك غير بتاعت مدحت صالح ههههههه
14-قلت عليا ايه في سرك لما قريت التوبيك ولقيت ان الموضوع هزار بس بصراحه ومش هزعل وربنا
15-كلمه نفسك تسمعها وتحس بيها
16-شايف انك شيك وماشي عالموضه ولا مش بيفرق معاك المظهر
17-ايه اكتر حاجه ممكن تجزبك للبنت الي قدامك (جمالها)زى ماانت كاتب فوق
18-لو اختارت بنت تتجوزها وكنت بتحبها اوى ومامتك وباباك مش موافقين ومفيش احتمال يوافقو عليها هتعمل ايه
19-موقف معلق في دماغك من صغرك ومش قادر تنساه
20-بتقدر تنسي جرحك بسرعه وتعيش حياتك تانى ولا بتتاثر بيه فترة
21-مين اكتر حد بيقف جنبك في ازاماتك ومن الي وقف جنبك في اخر ازمه ليك
22-اوصف نفسك في بيت شعر فاهمنى يعنى شوف صفاتك وحطهم في بيت شعر بحيث انه يطلع محافظ علي الوزن والقافيه(صعب ده مش كده) احسن عشان تبقي تسامحنى هههههههههه
23-اكله بتموت فيها اوى واكله مش بتحبها
24-بتعرف تطبخ ايه ولا مبتعرفش تعمل حاجه ولا حتى كوبايت شاى
25-لما تتجوز وتخلف ان شاء الله تختار تجيب كام ولد وبنت واساميهم ايه(طبعا كل حاجه بمشيت الله )

كفايه عليك كده دلوقت زمانك زهقت منى بس رجعالك تانى
يالا سلااااااااااااااام

Busicat كتب:والله الكرسى نور
شد حيلك

استعددددددددددددددددددددددددددددددددد
على اما افكر فى حبة اسئلة حلوين

ميرسي busicat
ربنا يخليكي
انا مستني

شكرا علي رايك فيا...
العفو بس أنا مش بجامل ده بجد :)


ميرسي مرة تانية د\خالد
واتمني اني اكون كدا بجد....

1- اسم الدلع الي بيناديك بيه اصحابك او اقرب الناس ليك
خالودة .. وساعات لودا

2-مقوله مشهورة انت مقتنع بيها ودايما ترددها
ده مكرر في أسئلة د/إسراء
u'll never satisfy all people

3-امتى بدات تكتب شعر
أولي ثانوي

4-ايه الي حببك في الشعر امتى حسيت انك موهوب
يعني بدأ معايا الموضوع باني كنت بحاول اكتب حاجة تعبر عن نفسي
كنت كتبت أول قصيدة بتقول :
نعاني ويلات الدهر والناس معذبونا
نميل لحب أقوامٍ حتي إذا ما أحبونا

بس بدأت احس ان انا بكتب كويس لما لقيت الناس بتقول علي كتاباتي كلام حلو كتير بالذات كان جروب ع الفايس بوك

5-مين اول حد شجعك وقالك انت موهوب اكتب كمان
الجروب ده اللي ع الفايس .. كانوا بيقولوا كلام انا لسة حاسس انه كتير عليا

6-من الي له فضل في انك بقيت الدكتور خالد
ربنا يخليكي مش أوي كده
أنا لسة طالب صغنن
بس أي حاجة حلوة أنا فيها بفضل ربنا وبعدين بابا

7-لو مكنتش دخلت اسنان كنت تحب تدخل ايه تانى
طب بشري
صيدلة
بيطري
علاج طبيعي
تمريض

8- حلم ضاع منك وكنت بتتمناه
الحب

9- دايما حاسه انك حزين ياترى حزنك ده ميزة فيك يعنى نقدر نقول دفعك للكتابه اكتر
انتو ليه حاسين كده ؟؟
تاني حد يقولي كده في يوم واحد :D
بس هما بيقولوا ان معظم كتاباتي حزينة يبقي أكيد دفعني للكتابة أكتر

10-مين اقرب اخواتك ليك ومين احنهم عليك ومين انت احن عليه من الباقي
أقرب اخواتي : هما كلهم قريبين وكل واحد ممكن تقولي متخصص في حاجة وبحتاجه في وقت معين كلهم زي بعض
أحنهم عليا : أخويا الكبير د/ محمد
أحن عليه من الباقي : أكيد أختي لأنها أختي الوحيدة

11-بتحب الافلام الهنديه طب ايه رايك فيها
لأ خالص
أنا بقرف أتفرج علي ناس بتعبد البقر
مش بجبهم الهنود دول
ومش بحب أتفرج علي أفلامهم

12-ايه نوع الاغانى الي بتحب تسمعها غير الانجليزى يعنى رومانسيه او اي اغانى والسلام كده ةيعنى
الهادية اللي مبتعملش صداع
بكره الشعبي وبكره الميتال

13-ايه الاغنيه الي بتحس انها بتعبر عنك اوى وكانها متالفه عشانك غير بتاعت مدحت صالح ههههههه
أكتر أغنية بحبها
بحس ان انا عايز أغنيها أنا
مروان خوري "كل القصايد"

14-قلت عليا ايه في سرك لما قريت التوبيك ولقيت ان الموضوع هزار بس بصراحه ومش هزعل وربنا
قلت بتفول علي نفسها
وحرام عليها
واتسرعت في التوبيك
بجد أنا قفلت كل حاجة وكنت زعلت لأن حد يكون معايا امبارح وانهاردة مات
شئ صعب
ربنا يسامحك بقي
مجاش في بالي ان حد يهزر في الموت

15-كلمه نفسك تسمعها وتحس بيها
أي حد نفسه يسمع بحبك ويحس بيها .. بس الكلام والإحساس مش كفاية

16-شايف انك شيك وماشي عالموضه ولا مش بيفرق معاك المظهر
لأ بيفرق بس مش موضوع موضة .. موضوع اني ألبس حاجة لايقة عليا .. حاسس ان شكلها حلو .. مش أكتر

17-ايه اكتر حاجه ممكن تجزبك للبنت الي قدامك (جمالها)زى ماانت كاتب فوق
براءتها

18-لو اختارت بنت تتجوزها وكنت بتحبها اوى ومامتك وباباك مش موافقين ومفيش احتمال يوافقو عليها هتعمل ايه
هفضل وراهم لحد ما يوافقوا .. الا لو كان عندهم سبب مقنع في رفضهم

19-موقف معلق في دماغك من صغرك ومش قادر تنساه
ياااه في مواقف كتير أوي
بس ممكن أقولك نتيجة خامسة ابتدائي كنت جايب مجموع حلو أوي وكان الناس كلها طايرة بيا حتي المدرس بتاعي .. وكان في حفلة وكده

20-بتقدر تنسي جرحك بسرعه وتعيش حياتك تانى ولا بتتاثر بيه فترة
بتأثر بيه كتير
بس مش بوقف حياتي .. دايما في أولويات

21-مين اكتر حد بيقف جنبك في ازاماتك ومن الي وقف جنبك في اخر ازمه ليك
دايما أخويا د/ محمد هو بتاع الأزمات
ودايما بيقف جنبي
وكمان واحد صاحبي دايما واقف جنبي وفي صفي مهما حصل

22-اوصف نفسك في بيت شعر فاهمنى يعنى شوف صفاتك وحطهم في بيت شعر بحيث انه يطلع محافظ علي الوزن والقافيه(صعب ده مش كده) احسن عشان تبقي تسامحنى هههههههههه
صعب الانسان يقول صفات نفسه :D

اسمي خالدٌ
ولا يخلدُ في الدنيا أحد
أحب الناسَ
سأحبهم طولَ الأبد
الصحاب عكازي
والأهلُ خيرُ سند
حلمي وردٌ وشجرٌ
حلمي بعيدٌ
أسعي أن أجد

حاجة صغيرة كده :D .. قوليلي رأيك بقي

23-اكله بتموت فيها اوى واكله مش بتحبها
بموت فيها : الرز بالكاري مع فراخ مشوية .. من إيد ماما تحفة بقي :D
مش بحب السمك

24-بتعرف تطبخ ايه ولا مبتعرفش تعمل حاجه ولا حتى كوبايت شاى
بعرف أعمل شاي وأقلي بيض :D

25-لما تتجوز وتخلف ان شاء الله تختار تجيب كام ولد وبنت واساميهم ايه(طبعا كل حاجه بمشيت الله )
كتير ان شاء الله :D
أنا أصلا بحب الأطفال
الولد ان شاء الله كريم
بس مفيش اسم بنت معين في دماغي
تبقي تختاره هي بقي :D

كفايه عليك كده دلوقت زمانك زهقت منى بس رجعالك تانى
يالا سلااااااااااااااام

لأ خالص أسئلة حلوة وعجبتني
ميرسي

مين اقرب الناس ليك
مين اللى بتحس ادامه انك كتاب مفتوح وقادر يفهمك كويس
مين اكتر حد عجبك شعره فى المنتدى
لو حد غلط فى خقك غلطة كبيرة ورجع واعتذرلك هتسامحه ولا لا
ايه الصفة اللى مش بتحبها فى نفسك
ايه اكتر صفة بتحبها برده
ايه اكتر حاجة ممكن تزعلك من نفسك
امتى ممكن تقول لنفسك برافو يا خالد
بتحب القراءة ولو ايوه مين اكتر حد ةبتحب تقرا له
كرامتك اهم حاجة فى حياتك
بتتبع مين الاول قلبك ولا عقلك
اكتر حاجة بتكرهها فى حياتك
لو قلتلك لو اتمنيت حاجة دلوقتى هتتحقق
امنية واحدة بس هتتمنى ايه
ايه اكتر حاجة عجبتك فى كليتنا واكتر حاجة مش عجباك

معلشى بقه طولت عليك شوية

مين اقرب الناس ليك
بابا

مين اللى بتحس ادامه انك كتاب مفتوح وقادر يفهمك كويس
لودا صاحبي

مين اكتر حد عجبك شعره فى المنتدى
والله في ناس كتير بتكتب كويس .. العطار مثلا وفي ناس كتير الخواطر بتاعتها بتبقي خارجة م القلب وجميلة

لو حد غلط فى خقك غلطة كبيرة ورجع واعتذرلك هتسامحه ولا لا
علي حسب الغلطة لو خيانة أو كدب هيبقي صعب أوي

ايه الصفة اللى مش بتحبها فى نفسك
اني ممكن ابقي علي حد مش باقي عليا بس ان شاء الله هتتغير :D

ايه اكتر صفة بتحبها برده
اني بحب الناس كلها .. بحس ان كل الناس تهمني

ايه اكتر حاجة ممكن تزعلك من نفسك
اني ابقي مش بعمل حاجة مفيدة .. اقصر في المذاكرة أو في حق ربنا .. لما أحس يعني اني مش منتج

امتى ممكن تقول لنفسك برافو يا خالد
لما انجح في أي حاجة حطتها في دماغي حتي لو صغيرة

بتحب القراءة ولو ايوه مين اكتر حد ةبتحب تقرا له
ايوة ... بحب أقرا شعر لنزار قباني
وفي كاتب اسمه عمر طاهر بحب أقراله
ود/ أحمد خالد توفيق

كرامتك اهم حاجة فى حياتك
مش ممكن اسامح حد يهين كرامتي أبدا

بتتبع مين الاول قلبك ولا عقلك
أنا بحب أفكر بالاتنين بس لو الاتنين متعارضين غالبا قلبي بنتصر

اكتر حاجة بتكرهها فى حياتك
سلبية المجتمع
والوضع اللي مصر فيه
والعرب كلهم

لو قلتلك لو اتمنيت حاجة دلوقتى هتتحقق
امنية واحدة بس هتتمنى ايه
ان ربنا يرضي عني

ايه اكتر حاجة عجبتك فى كليتنا واكتر حاجة مش عجباك
اكتر حاجة عجبتني اني الحمد لله اتمنتها ودخلتها
كمان عرفت ناس جميلة
وبقي ليا صحاب جامدين
يمكن لو كنت دخلت كلية تانية مكنتش لقيت زيهم

اكتر حاجة مش عجباني:
حاجات كتير
مثلا انها صغيرة شبه علبة الكبريت
مدرجات صغيرة ومعامل صغيرة
ومفيش امكانيات
و اننا اتظلمنا جامد في الجدول


معلشى بقه طولت عليك شوية
لا ولا يهمك
ثانكس

اسمي خالدٌ
ولا يخلدُ في الدنيا أحد
أحب الناسَ
سأحبهم طولَ الأبد
الصحاب عكازي
والأهلُ خيرُ سند
حلمي وردٌ وشجرٌ
حلمي بعيدٌ
أسعي أن أجد

حاجة صغيرة كده :D .. قوليلي رأيك بقي


جميله اوى اوى ومن غير مجامله
ع فكرة انا صريحه لدرجه متتخيلهاش
لو انت وحش هقولك انت وحش
بس ياترى انت بقي كنت مجهزها ولا الفتها
في سعتها لو في سعتها يبقي خلاص انا كده اتاكدت انك موهوب بجد
هدخل تانى ان شاء الله اسالك بس يارب متزهقشي منى هدخل بالليل علي مفكرلك
في شويه حلوين التانين عجبوك؟؟؟؟

نكمل بقي ياخالد دا لو مكنشي يضايقك طبعا

1-ايه احلامك بالنسبه لاخواتك يعنى نفسك اختك تكون ايه وتجوز مين وتبقي حياتها عامله ازاى كده يعنى

2-انت سالتينى مرة التمريض بياخد من كام ليه؟واختارت تمريض من ضمن اختياراتك لومكنتش دخلت اسنان برده ليه رغم ان نادر لما تلاقي ولاد في تمريض بس الكليه بقت بتقبل صبيان لو حد هيدخل عندكو؟ليك ميول تمريضيه

3-انت كاتب في اسئلتى(أي حد نفسه يسمع بحبك ويحس بيها .. بس الكلام والإحساس مش كفاية)يعنى ايه الكلام والحساس مش كفايه طب الكلام ماشي طب الاحساس مش كفايه ليه وتختار انهى طريقه تتحب بيها ؟

4-انت بتقول نفسك تغنى اغنيه كل القصايد انت صوتك حلو ؟جربت تغنى قبل كدا ؟
5-لما ببتحس انك مخنوق بتعمل ايه ؟
6-ايه الحاجه الي متقدرش تستغنى عنها ابدا ؟
7-عمرك شديت مع حد من اخواتك وفي الاخر شتمته او ضربته ؟
8(-ان عشنا وكان لينا عمر هفكرك انا كنت باقي عليك وخلتنى اخسرك انا مش هقول بعت ليه وايه غيرك البعد لو كان صعب بكرة استسهله)تقول كدا لمين؟وليه
9-ايه الحاجه الي مش عايزة تحصلك تانى ابدا لانك اسيت منها اوى ؟
10-ايه الحاجه الي انت عملتها وبعد معملتها قعدت تضحك علي نفسك اوى؟
11-غلط في حد قبل كده ؟لو اه بعدها عملت ايه اعتزرتله؟
12-اشمعن اسم كريم الي اختارت تسمى ابنك المستقبلي بيه؟ان شاء الله
13-رحت سينما قبل كدا ؟اختار شخص تروح معاه لو مرحتش ؟
14-ايه الحاجه الي نفسك تحصلك قريب اوى ومستعجل عليها ؟
15-اكتر انسان بتحبه اوى وعزيز علي قلبك غير امك وابوك؟
16-ايه الحاجه الي ممكن تخليك تبكى من جواك ؟
17-اختار اغنيه لعمرو دياب بتحبها اوى وبتستريح لما تسمعها؟
18-لما بتكون في فرح بتحب تهيص مع الناس وكده ولا بتاخد ركن وتقعد لوحدك ؟
19-لو قلتلك ايه رايك في الشعر الي انت بتكتبه تقول ايه ؟
20-حاسس انك مقصر في حق حد ؟لو اه مين وازاى ؟
21-من الي وجوده ضرورى في حياتك ومن غيرة تحس انك ضايع غير امك وابوك؟

يالا كفايه عليك كده دلوقت زمانك زهقت من كتر الاسئله
اصل محدش بيسال كتير الا انا
ليا رجعه ان شاء الله لو اكتشفت اسئله جديده ولا حاجه

نكمل بقي ياخالد دا لو

نكمل بقي ياخالد دا لو مكنشي يضايقك طبعا

1-ايه احلامك بالنسبه لاخواتك يعنى نفسك اختك تكون ايه وتجوز مين وتبقي حياتها عامله ازاى كده يعنى
أختي هي الحمد لله بتجيب نتايج كويسة وعايزة تدخل صيدلة ان شاء الله
تتجوز مين بقى ده لسة بدري أوي بس لازم يكون متدين وعنده أخلاق ويعرف يحافظ عليها جوة عنيه
يا إما والله هبهدله :D

2-انت سالتينى مرة التمريض بياخد من كام ليه؟واختارت تمريض من ضمن اختياراتك لومكنتش دخلت اسنان برده ليه رغم ان نادر لما تلاقي ولاد في تمريض بس الكليه بقت بتقبل صبيان لو حد هيدخل عندكو؟ليك ميول تمريضيه
ليه سألتك لأننا بنشوف بنات تمريض ماشيين جنب كليتنا باليونيفورم بتاعهم ده وانا مكنتش اعرف الكلية دي ايه نظامها وبتاخد من كام وكده وصحابي كمان مكنوش عارفين عشان كده سألتك .. أنا اخترتها لأنها برده في مجال الطب وأنا بحب المجال ده .. هي فعلا بتقبل بس في القاهرة حسب ما سمعت

3-انت كاتب في اسئلتى(أي حد نفسه يسمع بحبك ويحس بيها .. بس الكلام والإحساس مش كفاية)يعنى ايه الكلام والحساس مش كفايه طب الكلام ماشي طب الاحساس مش كفايه ليه وتختار انهى طريقه تتحب بيها ؟
يعني مثال صغير لو اتنين بيحبوا بعض أوي وحاسينها بس في فروق كبيرة في السن أو في الأماكن أو في المستوى الفكري أو الاجتماعي هيبقى صعب أوي انهم يرتبطوا
فأنا قصدي ان غير الحب بالكلام والإحساس لازم نراعي ان الظروف تكون مناسبة
ناس كتير بتنسى موضوع الظروف


4-انت بتقول نفسك تغنى اغنيه كل القصايد انت صوتك حلو ؟جربت تغنى قبل كدا ؟
صوتي ساعات بيكون حلو :D

5-لما ببتحس انك مخنوق بتعمل ايه ؟
بخرج اتمشى .. أو بنام أو بتكلم مع حد صاحبي

6-ايه الحاجه الي متقدرش تستغنى عنها ابدا ؟
حب اللي حواليا يمكن

7-عمرك شديت مع حد من اخواتك وفي الاخر شتمته او ضربته ؟
أكيد مفيش اخوات معملوش كده :D بس لما كنا صغيرين

8(-ان عشنا وكان لينا عمر هفكرك انا كنت باقي عليك وخلتنى اخسرك انا مش هقول بعت ليه وايه غيرك البعد لو كان صعب بكرة استسهله)تقول كدا لمين؟وليه
لأي حد باعني ..

9-ايه الحاجه الي مش عايزة تحصلك تانى ابدا لانك اسيت منها اوى ؟
التسرع .. أنا اتعلمت أفكر قبل كل حاجة وقبل كل كلمة
الحمد لله

10-ايه الحاجه الي انت عملتها وبعد معملتها قعدت تضحك علي نفسك اوى؟
مش عارف بجد .. مش لاقي حاجة

11-غلط في حد قبل كده ؟لو اه بعدها عملت ايه اعتزرتله؟
اه بس أنا مش ببدأ لكن بعتذر لما يكون غلط سطحي ومش مهم والحد ده يهمني
لكن لو هو بدأ وأنا رديت الغلط وكان هو غلط جامد يعني طبعا مش بعتذر
لأن بتهيألي ده معنى القصاص أصلا

12-اشمعن اسم كريم الي اختارت تسمى ابنك المستقبلي بيه؟ان شاء الله
يعني بحبه بس السبب المهم إن حد عزيز عليا كان عايز يسميه بس الله يرحمه مات

13-رحت سينما قبل كدا ؟اختار شخص تروح معاه لو مرحتش ؟
اها رحت كتير كان اخر فيلم كلمني شكرا

14-ايه الحاجه الي نفسك تحصلك قريب اوى ومستعجل عليها ؟
اني ابقى عم ان شاء الله :)

15-اكتر انسان بتحبه اوى وعزيز علي قلبك غير امك وابوك؟
وغير اخواتي أكيد :D
لودا ومصطفى اصحابي

16-ايه الحاجه الي ممكن تخليك تبكى من جواك ؟
الظلم

17-اختار اغنيه لعمرو دياب بتحبها اوى وبتستريح لما تسمعها؟
تملي معاك

18-لما بتكون في فرح بتحب تهيص مع الناس وكده ولا بتاخد ركن وتقعد لوحدك ؟
مش بحب الموضوع ده بس ساعات ببقى مجبر عليه
زي فرح أخويا .. كان فرض :D

19-لو قلتلك ايه رايك في الشعر الي انت بتكتبه تقول ايه ؟
ههههههههه وحش
هو من رأي معظم الناس فهو كويس .. في ناس بتنتقدني .. وكمان بتنتقد بشدة بس أنا بعتمد على رأي الأغلبية من الناس في شغلي

20-حاسس انك مقصر في حق حد ؟لو اه مين وازاى ؟
في حق ربنا .. وفي حق المذاكرة

21-من الي وجوده ضرورى في حياتك ومن غيرة تحس انك ضايع غير امك وابوك؟
ده نفس السؤال اللي فوق :D

يالا كفايه عليك كده دلوقت زمانك زهقت من كتر الاسئله
اصل محدش بيسال كتير الا انا
ليا رجعه ان شاء الله لو اكتشفت اسئله جديده ولا حاجه

لا والله متقوليش كده
u r welcome anytime

رجعتلك تانى يادكتور

1-حاجه لفتت نظرى حبك لوالدك اوى وكمان انت قلت فوق انه اقرب انسان لقلبك دا غير القصيده الي كتبتها فيه ربنا يخليهولك طبعا ؟طب فين مامتك من كل ده لو سؤال هيضايقك متردش عليه

2-مش ملاحظ ان معظم الصفات الي في قصيدتك دى تخص الام مش الاب ليه اختارت الاب تكتب فيه القصيده
3-بتحب السهر ولا النوم بدرى؟
4-ايه الحاجه الي نفسك تشتريها وتبقي بتاعتك لوحدك
5-لو معاك فلوس كتير اول حاجه تختار تعملها ايه
6-ماذا يمثل للك هذه الكلمات
الحب
الصداقه
القلب
الرومانسيه
الشعر
الام
المنتدى
خالد نفسه
7-لو اختك في كليه حلوة واتقدملها واحد في كليه اقل منها وكان بيحبها اوى وهى موافقه عليه هتوافق انت كمان ولا هتقول لا دا اقل منها ع فكرة دا موضوع نقاش لينا كلنا في المناقشات العامه وكلنا مختلفين عشان كده بسالك

8-انت ممكن تحب وتتجوز واحده مش معاها كليه ولا لازم تكون في نفس مستواك العلمى ومستوى تفكيرك
9-عمرك اتطردت من محاضرة وليه
10-الفت القصيده بتاعت نبض قلب في وقت قد ايه
11-هتزعل لو حد انتقضك في المسابقه ؟
12-امتى حسيت انك اتظلمت اوى ؟ وعملت ايه
13-قول مثل شعبي انت بتحبه وحفظه
14-قول جمله سمعتها مرة في فيلم وعجبتك اوى وحفظتها يعنى انا مثلا بحب(ازا اردت شيا فاطلق صراحه فان عاد اليك فهو ملك لك وان لم يعد فهو لم يكن للك من البدايه)كده يعنى
15-قول فزورة ونكته لما سمعتهم عجبوك ومت من الضحك؟
16-متوقع تقدير ايه في الترم الاول ؟
17-انت بتعرف تكتب مقامات او رباعيات ولا هو شعر بس؟
18-ايه رايك في قلب ام الي سامح داخل المسابقه بيها بس بصراحه ومن غير مجاملات انا اختارتها لان محدش نزل غيره لسه
19- لو ماشي في طريق مع خطيبتك ولقيت طفل صغير جاى يقولك بابا مجتش ليه يابابا داانت وحشنى اوى هتتصرف ازاى وتفتكر هيكون ايه رد فعل خطيبتك
20-لو ماشي مروح بيتكو بعد الجامعه وشفت بنت زميلتك في الكليه انت تعرفها بس هى لامتعرفكش ولقيت ناس بتضيقها في الطريق هتتصرف ازاى
21-لو زميلتك برده وتعرفها وهى لا وشفتها في المواصلات هتحاسبلها ولا مش هتحاسبلها؟
22-لو واحد صاحبك خد كتاب منك مهم وكان عندكو امتحان في نفس الماده وعايز الكتاب منه وطلبته قالك مش لاقيه او اخويا قطعه هتعمل ايه والكتاب ده انت مستعيره من المكتبه يعنى لازم يرجع
23-لو واحد صاحبك عمل فيك مقلب وحش ووقعت قدام البنات عالارض والبنات ضحكو عليك هتعمل فيه ايه وهتتصرف ازاى
24-كنت عايز يبقي ليك اسم تانى غير خالد ولا انت حابب اسمك
25-لو زعلت مامتك وخصمتك بتعمل ايه وتصالحها ازاى


بس بقي انا تعبت والله مبالك انت بقي بس عموما هسيب غيري يسال ولو لقيت محدش دخل ابقي ادخل اسالك تانى
داانت زمانك استحلفتلي ولما اقعد عالكرسي هتهرينى اساله زى مابعمل فيك ههههههه بس لو مضايق قول والله وانا مسالش تانى عادى مش هزعل والله

انا جيييييييييييييييييييييييييييييييييييييييت

فى حاجات معينة بتفتكرها ايام الابتدائى ولو اه ايه هى
مرحلة الاعدادى بتمثلك ايه
وبدال سالتك على الابتدائى والثانوى لازم اسالك على الثانوى
ايه اكتر مادة كنت بتحبها وايه المادة اللى كنت بتكرهها
عملت ايه بعدامتحان الفزياء
كنت متوقع النتيجة اللى جبتها
ايه شعورك بعد اما التنسيق ظهر
مرحلة الجامعة بتمثلك ايه
لو فى ايدك ترجع لمرحلة معينة فى حياتك تختار ايه
اول مرة اعجبت ببنت وحسيت انك بتحبها كان عندك كام سنة
ايه اكتر لون بتحبه
لو جبت لحد هدية تفضل تجيبله ايه
لو مش عجبك فى حد حاجة معينة هتقوله ولا لا
لو حد سالك ايه رايك فى حاجة جابها مش عجباك هترد تقوله ايه
لو قدامك ورقة وقلم وقولتلك اكتب اللى بيدور فى دماغك دلوقتى
طب لو كراسة رسم والوان هترسم ايه
على اى اساس بتختار اصحابك
ازاى بتتعامل مع الناس حسب شخصيتك ولا على حسب شخصيتهم
ولا الاتنين
اكتر مادة عجبتك السنة دى واكتر دكتور عجبك شخصيته
واكتر مادة مش بتحبها
موقف مضحك حصلك فى الكلية ولسه فاكره

كفاية كده موقتا لاحسن اكتر من كده هبقى برخم جامد
شكلك اصلا بتدعى علينا
وبتقول انا ايه اللى جابنى هنا
هههههههههههههههه

رجعتلك تانى يادكتور

1-حاجه لفتت نظرى حبك لوالدك اوى وكمان انت قلت فوق انه اقرب انسان لقلبك دا غير القصيده الي كتبتها فيه ربنا يخليهولك طبعا ؟طب فين مامتك من كل ده لو سؤال هيضايقك متردش عليه
لا طبعا سؤال منطقي .. أكيد بحب ماما جدا بس انا متعلق ببابا أكتر

2-مش ملاحظ ان معظم الصفات الي في قصيدتك دى تخص الام مش الاب ليه اختارت الاب تكتب فيه القصيده
لأ كل الصفات دي أنا حاسسها فيه .. وكل كلمة ليها موقف .. مش مجرد كلام يعني .. فأنا مخترتش الصفات تكون فيه هي فعلا موجودة

3-بتحب السهر ولا النوم بدرى؟
بحب السهر جدا بدليل اني برد عليكي الساعة 7 الصبح وأنا مطبق :D

4-ايه الحاجه الي نفسك تشتريها وتبقي بتاعتك لوحدك
عربية

5-لو معاك فلوس كتير اول حاجه تختار تعملها ايه
أكيد بجد هيبقى في جزء لله
بس هجيب عربية عشان تعبت بقى :D

6-ماذا يمثل للك هذه الكلمات
الحب
مفيش حياة من غير حب

الصداقه
هي الونس وانك تلاقي حد يسمعك ويشيل عنك

القلب
أهم حاجة في الإنسان
"إن الله لا ينظر إلا أجسادكم وإنما ينظر إلى قلوبكم"

الرومانسيه
صفة بتخلي الإنسان يشوف حاجات غيره مش شايفها

الشعر
هوايتي المفضلة

الام
تضحية لا منهية

المنتدى
مكان جميل بشوف فيه الناس اللي بحبهم

خالد نفسه
واد رخم :D:D

7-لو اختك في كليه حلوة واتقدملها واحد في كليه اقل منها وكان بيحبها اوى وهى موافقه عليه هتوافق انت كمان ولا هتقول لا دا اقل منها ع فكرة دا موضوع نقاش لينا كلنا في المناقشات العامه وكلنا مختلفين عشان كده بسالك
في حاجات كتير بتبقى محل سؤال لازم نعرفها لو كان كويس في كل الحاجات التانية يبقى هتغاضى عن دي وهوافق .. يعني ممكن يكون أقل منها دراسيا بس ذكي وبيفهم ويقدر يسعدها .. وممكن يكون خريج طب بس دكتور فاشل ومش هيسعدها .. لازم أسأل عن حاجات تانية وأعرفها

8-انت ممكن تحب وتتجوز واحده مش معاها كليه ولا لازم تكون في نفس مستواك العلمى ومستوى تفكيرك
بتهيألي لازم تكون بنفس مستوى التفكير مش عشان حاجة إلا إننا نفهم بعض .. كده أنا بظلمها معايا مش بظلم نفسي بس

9-عمرك اتطردت من محاضرة وليه
لأ الحمد لله .. دي م الحاجات اللي بفتخر بيها
يارب متطردش أبدا
بس مرة السنة اللي فاتت دكتور الإحصا طرد الولاد كلهم وساب البنات :D وأنا كنت مع الولاد اللي اتطردوا

10-الفت القصيده بتاعت نبض قلب في وقت قد ايه
هي اسمها "نبض الحنان" :D:D
ألفتها في حوالي ساعة ونص

11-هتزعل لو حد انتقضك في المسابقه ؟
انتقدني .. لأ طبعا هفرح
ياريت كل الناس تدخل تنتقدني وتقول اللي مش عاجبها عشان أطور نفسي
لو معرفتش ايه الغلط عمري ما هبقى صح

12-امتى حسيت انك اتظلمت اوى ؟ وعملت ايه
السنة اللي فاتت .. ضحكت ضحك حزين .. يعني هعمل ايه :D

13-قول مثل شعبي انت بتحبه وحفظه
اقلب القدرة على فمها ، قال الغرب يطردونا
هههههههههه
بجد مش فاكر مثل معين

14-قول جمله سمعتها مرة في فيلم وعجبتك اوى وحفظتها يعنى انا مثلا بحب(ازا اردت شيا فاطلق صراحه فان عاد اليك فهو ملك لك وان لم يعد فهو لم يكن للك من البدايه)كده يعنى
اه انا بحب مقولة في فيلم فتح عينيك بتاع مصطفى شعبان كان بيقول : "لو شفت منظر مخيف اوعى تغمض عينك لأن اللي هتشوفه في خيالك أكبر بكتير من اللي موجود في الحقيقة" ... بالمناسبة أنا مش بحب الجملة بتاعة أطلق سراحه دي .. لأنها قمة السلبية

15-قول فزورة ونكته لما سمعتهم عجبوك ومت من الضحك؟
مرة إبرتين وقعوا ع الأرض واحدة رنت والتانية بعتت كلمني شكرا .. دي قمة الرخامة كنت هكسّر الموبايل لما قرتها
----
فزورة انتي تجاوبيها بقى ايه الفرق بين اليسا وعمرو دياب ؟ :D

16-متوقع تقدير ايه في الترم الاول ؟
معندناش نتيجة في الترم الأول :)

17-انت بتعرف تكتب مقامات او رباعيات ولا هو شعر بس؟
الرباعيات بالنسبة لي أسهل وبكتبها بس ولا مرة كتبت مقامة

18-ايه رايك في قلب ام الي سامح داخل المسابقه بيها بس بصراحه ومن غير مجاملات انا اختارتها لان محدش نزل غيره لسه
أنا والله مكنتش شفتها بس قريتها دلوقتي
حلوة جدا

19- لو ماشي في طريق مع خطيبتك ولقيت طفل صغير جاى يقولك بابا مجتش ليه يابابا داانت وحشنى اوى هتتصرف ازاى وتفتكر هيكون ايه رد فعل خطيبتك
:D:D
لأ أكيد مش هتصدق كده عليا .. ده مش شكل أب أصلا .. ده أنا يادوب ابن :D

20-لو ماشي مروح بيتكو بعد الجامعه وشفت بنت زميلتك في الكليه انت تعرفها بس هى لامتعرفكش ولقيت ناس بتضيقها في الطريق هتتصرف ازاى
أكيد هساعدها وهبعد الناس اللي بتضايقها

21-لو زميلتك برده وتعرفها وهى لا وشفتها في المواصلات هتحاسبلها ولا مش هتحاسبلها؟
أكيد هحاسب أنا مش بخيل على فكرة :D

22-لو واحد صاحبك خد كتاب منك مهم وكان عندكو امتحان في نفس الماده وعايز الكتاب منه وطلبته قالك مش لاقيه او اخويا قطعه هتعمل ايه والكتاب ده انت مستعيره من المكتبه يعنى لازم يرجع
أكيد هدفع البدل بس لو هو صاحبي أنا متأكد ان هيكون عنده دم ويروح يتصرف هو معاهم

23-لو واحد صاحبك عمل فيك مقلب وحش ووقعت قدام البنات عالارض والبنات ضحكو عليك هتعمل فيه ايه وهتتصرف ازاى
عادي جدا

24-كنت عايز يبقي ليك اسم تانى غير خالد ولا انت حابب اسمك
لا أنا بحبه جدا

25-لو زعلت مامتك وخصمتك بتعمل ايه وتصالحها ازاى
هما كلمتين وبنتصالح
:D

بس بقي انا تعبت والله مبالك انت بقي بس عموما هسيب غيري يسال ولو لقيت محدش دخل ابقي ادخل اسالك تانى
داانت زمانك استحلفتلي ولما اقعد عالكرسي هتهرينى اساله زى مابعمل فيك ههههههه بس لو مضايق قول والله وانا مسالش تانى عادى مش هزعل والله

لا والله مش متضايق انتي منورة :)

ايه اكتر عضو تحس انه..

يشبهك..
LODA
بس هو عضو تعبان شويتين :D مش بيدخل كتير

يناقض افكارك تماما..
مفيش حد بيناقضني دايما يعني

معجب بذكائه..
ناس كتير منهم حضرتك وروما وبوسي

معجب بمواضيعه..
د/ إيمان إيران
ومصطفى الشربيني
بصراحة بحب مواضيعهم بالذات في الصور

تهتم بارائه..
كل الأعضاء

هل تؤمن بالصداقة بين الولد والبنت؟؟وماحدودها؟؟
هل ترضي ان اختك مثلا يبقي عندها اصدقاء ولاد؟؟

هي ممكن بس ليها أخطار وممكن تتحور في أي وقت لنوع تاني من العلاقة وعشان كده مرضاش أختي يكون ليها صحاب .. خالص ..

حاجة ع السريع كدا... ثاكس دكتور

انا جيييييييييييييييييييييييييييييييييييييييت
أهلا دكتور :D

فى حاجات معينة بتفتكرها ايام الابتدائى ولو اه ايه هى
حب الطفولة في خامسة ابتدائي

مرحلة الاعدادى بتمثلك ايه
بتمثلي اتنين صحابي واحد مسلم وواحد مسيحي ودروس ومذاكرة ومفكرش في أي حاجة

وبدال سالتك على الابتدائى والثانوى لازم اسالك على الثانوى
الثانوي ده بقى ينقسم مرحلتين
أولى ثانوي : لا مبالاة ومفيش مذاكرة ماهو يعني هذاكر ليه ؟ :D ولف وخروجات وفي الآخر كلنا نجحنا بمجموع مش عارف ازاي
تانية وتالتة بقى درسين كل يوم ومذاكرة وامتحانات عشان احقق حلمي وأدخل الكلية اللي عايزها
والحمد لله ربنا كرم

ايه اكتر مادة كنت بتحبها وايه المادة اللى كنت بتكرهها
كنت بحب الكيميا جدا
وكنت بكره الفيزيا

عملت ايه بعدامتحان الفزياء
أعدت أعيط لحد ما بابا قالي لو ملحقتش أسنان هنا هدخلها في أي حتة برة .. ساعتها بس هديت .. بس الحمد لله محتجتش أخرج برة

كنت متوقع النتيجة اللى جبتها
كنت متوقع نتيجتي بس متوقعتش نتيجة التنسيق

ايه شعورك بعد اما التنسيق ظهر
أكبر فرحة في حياتي

مرحلة الجامعة بتمثلك ايه
بداية حياة جديدة

لو فى ايدك ترجع لمرحلة معينة فى حياتك تختار ايه
ولا حاجة

اول مرة اعجبت ببنت وحسيت انك بتحبها كان عندك كام سنة
10 في خامسة ابتدائي
بس بتهيألي ده كان لعب عيال

ايه اكتر لون بتحبه
البينك

لو جبت لحد هدية تفضل تجيبله ايه
ورد

لو مش عجبك فى حد حاجة معينة هتقوله ولا لا
لو قريب مني وممكن يتقبلها مني أكيد هقولهاله بشكل مناسب ميجرحوش

لو حد سالك ايه رايك فى حاجة جابها مش عجباك هترد تقوله ايه
هقوله انها مش عجباني بس برده بأسلوب كويس

لو قدامك ورقة وقلم وقولتلك اكتب اللى بيدور فى دماغك دلوقتى
أنا مرهق وأريد أن أنام :D

طب لو كراسة رسم والوان هترسم ايه
هرسم سحابة وولد وبنت واقفين عليها :)

على اى اساس بتختار اصحابك
يكونوا متوافقين معايا .. فيهم شبه مني من حيث الشخصية .. وقريبين من تفكيري

ازاى بتتعامل مع الناس حسب شخصيتك ولا على حسب شخصيتهم
ولا الاتنين
بحس اني بكلم كل واحد بالأسلوب اللي يمشي معاه أو اللي يفهمه .. مش بكلم كل الناس بأسلوبي أنا .. لأن الناس شخصياتهم ومستواهم الذهني مختلف

اكتر مادة عجبتك السنة دى واكتر دكتور عجبك شخصيته
أكتر مادة عجبتني الجنرال هيستولوجي يعني 70 صفحة كده ومريحة :D
أكتر دكتور عجبني شخصيته طبعا د / يسري الهواري
بس انتي معانا في الكلية ؟؟

واكتر مادة مش بتحبها
الماتيريال
:S :S

موقف مضحك حصلك فى الكلية ولسه فاكره
مرة كنت بقول للمعيدة بتاعة الهيستولوجي الشريحة دي شبه شريحة تانية اسمها كذا .. قالتلي صح بس هي مش موجودة انت عرفت منين ؟ قلتلها انا يعني فاكر شوية من السنة اللي فاتت .. قالتلي اه ماهي كانت موجودة السنة اللي فاتت وشلناها :D افتكرتني مدبلر وأنا كنت بتكلم عن إعدادي :D

كفاية كده موقتا لاحسن اكتر من كده هبقى برخم جامد
شكلك اصلا بتدعى علينا
وبتقول انا ايه اللى جابنى هنا
هههههههههههههههه

لا والله اسئلتكم زي العسل

تعليقاتى علي اجابتك
هي اسمها "نبض الحنان" :D:D
(سورى والله اصل انا قريتها مرة واحده ومركزتش في الاسم اوى متزعلشي )

. بالمناسبة أنا مش بحب الجملة بتاعة أطلق سراحه دي .. لأنها قمة السلبية
(ميرسي لرايك فيا )بس هي مش قمه السلبيه انت بصيت ليها من منظور تانى خالص انا واخدها بمعنى كل شي نصيب يعنى لو حاجه ضاعت منك لو ليك نصيب فيها هترجعلك تانى ولو مرجعتش يبقي متزعلش لانها كده متبقاش نصيبك انا واخدها علي اساس كده مش زى ماانت فهمت

فزورة انتي تجاوبيها بقى ايه الفرق بين اليسا وعمرو دياب ؟ :D
اليسا بتعمل شريط كاسيت وعمرو دياب بيعمل شريط كراجل هههههههههه
امال ايه فاكرنى شويه في البلد طبعا كنت هحلها المهم اجى استلم الجايزة امتى هههههههه(مبحثتش عنها ع فكرة انا عارفاها)

لا والله مش متضايق انتي منورة :)
دا نورك والله ميرسي لزوقك

كفايه عليك كده ولا عايز اسئله كمان لو عايز عادى يعنى انا عندى كتييييييييير ميهمكش بس المهم انت مكنشي زهقت

لا ياسامح انت فهمت غلط
انا قصدى كفايه عليك اسئله منى مش
كفايه دوره عالكرسي هو الي بيحدد امتى يقوم من عالكرسي
ويختار حد تانى
مش انا
انا اقصد كده ياخالدوالله مش قصدى اقلك دورك خلص

تعليقاتى علي اجابتك
هي اسمها "نبض الحنان" :D:D
(سورى والله اصل انا قريتها مرة واحده ومركزتش في الاسم اوى متزعلشي )
ولا يهمك

. بالمناسبة أنا مش بحب الجملة بتاعة أطلق سراحه دي .. لأنها قمة السلبية
(ميرسي لرايك فيا )بس هي مش قمه السلبيه انت بصيت ليها من منظور تانى خالص انا واخدها بمعنى كل شي نصيب يعنى لو حاجه ضاعت منك لو ليك نصيب فيها هترجعلك تانى ولو مرجعتش يبقي متزعلش لانها كده متبقاش نصيبك انا واخدها علي اساس كده مش زى ماانت فهمت
أنا مش رأيي فيكي كده خالص والله :D أنا بس قصدي إن الجملة بتقول لو حبيت حاجة سيبها .. لأ أنا مش مؤمن بكده .. أنا مؤمن اني لوحبيت حاجة أفضل وراها وأعمل كل اللي أقدر عليه عشان تبقي ليا ... مش أسيبها


فزورة انتي تجاوبيها بقى ايه الفرق بين اليسا وعمرو دياب ؟ :D
اليسا بتعمل شريط كاسيت وعمرو دياب بيعمل شريط كراجل هههههههههه
امال ايه فاكرنى شويه في البلد طبعا كنت هحلها المهم اجى استلم الجايزة امتى هههههههه(مبحثتش عنها ع فكرة انا عارفاها)
لا انتي كده شاطرة بجد :D والجايزة في أي وقت واللي تؤمري بيه والله


لا والله مش متضايق انتي منورة :)
دا نورك والله ميرسي لزوقك

كفايه عليك كده ولا عايز اسئله كمان لو عايز عادى يعنى انا عندى كتييييييييير ميهمكش بس المهم انت مكنشي زهقت
بتهيألي أنا كفاية كده عشان الواحد مش ضامن ظروفه بعد كده :)
thnx Roma

roma كتب:لا ياسامح انت فهمت غلط
انا قصدى كفايه عليك اسئله منى مش
كفايه دوره عالكرسي هو الي بيحدد امتى يقوم من عالكرسي
ويختار حد تانى
مش انا
انا اقصد كده ياخالدوالله مش قصدى اقلك دورك خلص

أنا مقهمتش غلط علي فكرة :)

كانت فرصة سعيدة والله يا جماعة
اتمنى انكو تكونوا عرفتوني أكتر
وأتمنى اني مكنتش تقيل عليكم
ميرسي بالذات د/إسراء و روما و busicat



أختار بعدي










لو مصممين تعرفوا يعني










هو حد













هو أكيد عضو معانا يعني












ولازم يكون بيدخل كتير
















وأكيد شارك في اللعبة وعارف النظام













وكمان سألني

















اللي هيكون ع الكرسي















Roma

روما انا
ميرسي ليك ياخالد طبعا وانا موافقه ولو انى
متخيلتش نفسي خالص هقعد عليه
لانى بعصر الناس اسئله مش متخيله انى هتسال

عموما انا قدها وقدود الي عايز يسال يتفضل