يا حبيبتى يا مصر يا مصر

ندخل بقى على الأغاني اللي كلها فرفشة..
ساعة الانتخابات الرئاسية.. زي ما يكونوا حسوا إن المصريين ما بقوش مصريين.. فقالوا نديهم جرعة وطنية بكام أغنية كده في العضل.. عشان يروحوا ينتخبوا "اللي هيخدم مصر"

هتلاقي عندك
ارمي حمولك عليا.. وأنا أشيل عنك شوية
يا مصر يا أغلى عندي .. من كل الدنيا دية

كتر خيرك يا راجل.. ده مش بيحب مصر بس.. مش عايز يساعد مصر بس.. ده الراجل داخل بصدره وعايز مصر ترمي حمولها عليه.. وهو هيشيل شوية كده لحد ما مصر ترتاح من الحمل ده وبعدين تكمل..

هتلاقي عندك برضه
مصر اللي بتضمنا.. نبض الحياة في دمنا
نوهب عشانها حياتنا ... لو كنا بنحبها
"بعد كده بشوية"
عايزة الإيدين تعلي ... وإيدين لفوق تصلي
وعيون صاحية تخلي ... بالها من أرضها

طبعا كلكوا عارفين إن اللي هيشيل حمول مصر ده و اللي عايز عيون صاحية عشان تخلي بالها من أرضه.. الاتنين ضربوا شهادات إعفاء من الجيش..

نيجي بقى لمسك الختام .. ده مش كلامي .. ده كلام كل اللي سمعوا الأغنية
ما شربتش من نيلها؟.. جربت تغنيلها؟
جربت في عز ما تحزن تمشي في شوارعها وتشكيلها
غالية بلدنا علينا.. وهتفضل في عينينا
ومادام بنحب بلدنا يبقى هتتغير بإيدينا
إحنا اللي نعليها.. بإيدينا نخليها
أجمل لينا ولولادنا مهما العمر يعدي علينا

الكلمات بصراحة كويسة..
طبعا بغض النظر عن الناس اللي بتشرب من نيلها مية مخلوطة بالصرف الصحي..
وبغض النظر برضه عن الناس الكتير اللي ماشية تشتكي في الشوارع لمصر اللي بنقول عليهم مجانين وبيكلموا نفسهم دول..
فالكلمات كويسة

خصوصا إن إحنا هنعليها، وكمان هنخليها أجمل لينا - أيوة دي شايفينها في الواقع - ولولادنا "وخلوا بالكوا من ولادنا دي"

عشان كده المغنية دي لما جت تولد سافرت أمريكا عشان ابنها ياخد الجنسية الأمريكية..
عشان الجنسية المصرية بقت سوفاج ..

يا نهااااااااااااااار انعدام
مصر هي امى
وهشتكنا وبشتكنا ياريس
هتودينا السجن باينك كده