حقى الذى انتزعته منى نفسى ..!!

من طرف روح الفؤاد الأربعاء أغسطس 05, 2009 9:08 pm

صحباتى هما أكبر نعمة ربنا بعتهالى بعد نعمة الإسلام

لما بقابلهم بحس إنى بنسى كل همومى ، بيخففوا عنى ..بابتسامتهم ، بحنانهم ، بحبهم لي ، وأحلى ما فيهم إنهم بيتمنولى الخير زى ما بتمنوا لنفسهم ويمكن أكتر ، عشان كده اليوم اللى بقضيه معاهم بيبقى من أجمل أيام حياتى
ومش هنسى اليوم ده لما اتجمعنا وفضفضنا لبعض واتكلمنا وحكينا يااه الواحد بيحس فعلا إنه فى جنة
وفى وسط الكلام جت سيرة المرأه وإزاى الإسلام عزها بعد ما كانت لاقيمة لها وحمدنا ربنا فعلا إننا معشناش فى زمن الجاهليه وإلا كانت مننا اللى هيدفنها أبوها وهى حية وكانت مننا اللى هيجبروها إنها تتجوز غصب عنها وكانت مننا اللى هتورث زى ما يورث المال والعزال

واحنا بنتكلم عن الحقوق اللى ربنا منحها لينا قامت واحده من صحباتى قالت كلمة أدهشتنا كلنا ....
قالت ..
أعظم حق ربنا أعطاه لى هو حق الحجاب
:good:
سكتنا لبرهه ..وبعدين علقت وقلتلها :
الأصل فى الحجاب إنه واجب ربنا فرضه علينا ، لكن فعلا لما ركزت فى كلامها لقيت إنه حقى ..حقى اللى بتحاول الناس تاخده منى لإنى اتخلقت على حب الزينه والجمال

طيب هو ليه ربنا فرض عليا الحجاب ؟ !
لأنى جميله .. أيوه وطبيعى الجمال ده لو كان مكشوف الناس هتحاول يعنى ينالها من الحب جانب ، يحاول الرجاله يقربوا واما يقربوا أبقى بالنسبه لهم محل شهوه عايزين يفرغوها وخلاص وبعد كده مش لازمانا فى حاجه
لكن ربنا ميرضاليش كده أبداً لازم يكون لى كيانى ، أمشى بعزة وسط الناس ، أنا مش مجرد جسم جميل وطقم شيك متكلف 200 ولا 300 جنيه ، أنا لى كيانى ولى دورى ولى رسالتى
شوفتى إزاى ربنا أعطى لنا أعظم حق
حق الأمانه ..حق العزه ..حق الكرامه

يقول تعالى
( يا أيها النبى قل لأزواجك وبناتك ونساء المؤمنين يدنين عليهن من جلابيبهن ذلك أدنى أن يعرفن فلا يؤذين وكان الله غفوراً رحيماً ) الأحزاب

شوفتى الرحمه والود اللى فى الآيه ، ربنا عايزك تبقى ماشيه معروفه إنك عفيفه وقريبه من ربنا ، محدش يأذيكى ، ربنا يريدك قريبه منه مش مهانه وسط الناس !!

الآيه دى حستها بجد فى أول أسبوع فى الدراسه السنه دى ، كنت فى كلية من الكليات و شوفت هناك معارض أزياء عالميه لكن فى نفس الوقت شفت أد إيه البنت مهانه أوى
تمشى البنات والولاد وراها يشاوروا عليها ويوصفوا لبسها ويتريقوا عليها والبنت وشها فى الأرض ، وأنا ماشيه قدامهم رافعه راسى محدش قدر يمسنى بكلمه.

فسبحان الله تكاليف بسيطه جدا وتعطى معانى وقيم ومزايا فى منتهى الرقى ومنتهى الروعه .

لكن مشكلة نفوسنا إنها لو مش عاجبها حاجه ومش عايزه تعملها ، تخلق مليون شماعه عشان تبرر موقفها وتحافظ على نظرة الناس ليها ، ونسينا ان ربنا يعلم ما نخفى وما نعلن ،

ورضا ربنا أعظم وأعلى من نظرة الناس لينا .. ومن ضمن الشماعات دى :

• هذا مجرد أمر مظهرى وأنا أحب الله وعلاقتى معه بقلبى :

• طيب سؤال ..انتى اتعلقتى بشاب وحبتيه بصدق وتمسكتى بعلاقتك بيه ، وجه قللك البسى حجاب كامل ! عندك استعداد تقولى لأ وتخسريه ؟! ولله المثل الأعلى فالحب فى الاتباع ..كيف أجزم أنى أحب الله وأنا لا أطيعه ؟!

• أنا مش مقتنعه أصلا إنه فرض :nono:
• يعنى بعد كلام ربنا وبعد أحاديث النبى صلى الله عليه وسلم وبعد سيره الصحابة والصحابيات ، وكل الحجات دى لا تخفى على أحد تقولى مش مقتنعه أصلا !!

• أنا مش مقتنعه بحكمة فرض الحجاب
• فرض الحجاب حفاظا عليكى وحفاظا على المجتمع كله فالإسلام لا يبنى مجتمعا غارقا فى شهواته مقصر فى أمر دينه ودنياه ثم أنكى مسلمه ومسلمه يعنى إسلام والجه لله عن حب بمعنى مش أنا اللى هسأل ربنا لماذا فرضت على كذا وكذا ؟
وأنا لا حول لى ولا قوة ، أنفاسى التى ألتقطها ليست بإرادتى
يقول تعالى ( وما كان لمؤمن ولا مؤمنه إذا قضى الله ورسوله أمراً أن يكون لهم الخيرة من أمرهم )

• أنا لسه صغيره :walk:

• انتى مسلمه عاقله بالغه إذا أنتى مكلفه ، فلا تتثاقلى على الطاعه لأن التباطؤ فى تنفيذ أوار الله كان أحد أسباب غضب الله على اليهود ، يلا جاهدى نفسك وارفعى شعار سيدنا موسى ( وعجلت إليك ربى لترضى ) لأنك انتى اللى محتاجه لربنا مش ربنا اللى محتاج طاعتك عشان كده لازم تقبلى بسرعه فانتى اذا نمتى النهارده متعرفيش هتصحى بكره ولا لأ ؟!

• لما أتجوز :maheart*:
• ترضى تبنى بيتك على معصيه منين هتجيبى السعاده والراحه اللى بتحلمى بيها ؟ ترضى تتجوزى واحد عجبه لبسك وشكلك وبعد شويه يشوف واحده تانيه أحلى يرجع فى كلامه !!

ودلوقتى إيه الأخبار حسيتى إنك عاوزه تغيرى حاجه فى لبسك ..يلا روحى افتحى الدولاب واقفى قدام المرايه وظبطى لبسك بحيث يكون ..

• مغطى جسمك كله يعنى مش قصير ولا ب 3/4 كم
• تكون قمشته سميكه علشان ميصفش جسمك
• ميكونش شفاف
• يكون واسع ميوصفش جسمك
• بلاش الإسراف فى الزينه والألوان اللى بتجذب العيون
• أرجوكى بلاش برفانات ولا مكياجات ولا كعب عالى ولا تظبيط حواجب بلاش تعرضى نفسك لعقوبة الزنا والطرد من رحمه الله

لأن إذا ربنا طردنا من رحمته مين لينا غيره؟!
مين يستاهل أضحى علشانه غير اللى بيرزقنى روحى اللى بعيش بيها ؟!

:flowerReal*:
يا رب ينتفعوا بالكلمات دى ويبدأوا بعون الله التغيير للأفضل وفرصه إن رمضان جاى نقدر نقرب فيه لربنا أكتر..