مين قال إن الصعيدى غبى

من طرف dezner الأربعاء ديسمبر 31, 2008 11:52 am

وصلت الطيارة اللي جاية من السعودية وكان عليها ناس كتير منهم واحد صعيدي ومعاه شنطتين كبار جداً

حطهم على العربية بعد ما شالهم من على السير بتاع الشنط

خلص الباسبور وماشي ..

وقفه موظف من بتوع تفتيش الشنط والجمارك الموجودين في صالة المطار

خده على ترابيزة من الموجودين عشان يفتشه

الموظف : معاك إيه ياعم الحاج

الصعيدي : معايا فيتيو

الموظف : قصدك فيديو

الصعيدي : أيوه فيتيو

الموظف : طيب طلعة يا عم الحاج

الصعيدي : أهو يا باشا

الموظف : إيه ده يا عم الحاج .. ده راديو ترانزستور

الصعيدي : سستور إيه يا باشا .. ده فيتيو من الأصلي بتاع بره وأدي الفاتورة بتاعته

الموظف بعد ما بص في الفاتورة وقراها: ياعم الحاج دي فاتورة فيديو ثمنه 1200 ريال

الصعيدي : أيوه مظبوط أنا دافع 1200 ريال

الموظف مع زميله الموظف التاني : الراجل انضحك عليه

الموظف التاني : مشيه ده باين عليه اتنصب عليه في السعودية

الموظف : طيب ياعم الحاج اتفضل اقفل الشنطة وروح بالسلامة .. ربنا يعوض عليك

الصعيدي : يعوض عليا ليه يا باشا .. والله انتوا ما تعرفوا أي حاجة عن الفيتيو

خرج الصعيدي بره المطار .. ووقف عند موقف الأتوبيس

واحد محترم حضر الموقف من أوله .. صعب عليه الصعيدي .. راح يفهمه

المحترم : يا حاج تسمحلي بكلمة

الصعيدي : اتفضل يا باشا

المحترم : الجهاز اللي انت اشتريته من السعودية ده عبارة عن راديو ترانزستور

الصعيدي : عارف يا باشا

المحترم : وازاي تدفع فيه 1200 ريال وهو تمنه 45 ريال

الصعيدي : ياباشا أنا اشتريته بـ 40 بس

المحترم : والفاتورة اللي انت طلعتها لبتاع الجمارك ؟!!

الصعيدي : ياباشا الفيديو أهو .. وده كمان دي في دي .. وده كمان كاسيت شارب 1200 وات

ويستطرد : واللا كنت عاوزني أديهم 1500 جنيه أونطة في أونطة

المحترم : دا أنا اللي طلعت مغفل ودفعت 2000 جنيه جمارك

تمت