(( صوت الدموع ))

الدموع ليها صوت
وجبروت
وبتفوت ، في أي وقت
ما أشجعها
الدموع لما بتنزل
تزلزل
تنده اللي يسمعها
تحكي اللي يوجعها
وتشكي أوضاعها
الدموع ساعات تبتسم
وتفرح
وساعات بتفضح
حبيب خانها وباعها
سألني صاحبي
عـ الدموع والرجولة
قلت تزيدها ، وبتعلم
وتتكلم
وتتألم
وتجري تنام في مخدعها
تحنّ
وتئنّ
ويمكن تحضن اللي خدعها
وتحب اللي ودعها
وتنضف قلوب عاشقين حيارى
الدموع مكسورة
ولكن .. جبارة
تجف سنين وسنين
ودقيقة
.............
ترجّعها