في الميدان

من طرف sheref ashraf الأحد فبراير 20, 2011 8:51 pm

وصف عام لما رأيته في ميدان التحرير .... و لكن الحقيقة أروع

في الميدان ..فاكر مكاني

و الايمان سندي و أماني

لما تبقا بايع حياتك

علشان هتحيي حد تاني

علشان بلادك تِحيا تاني

انا مش هألف ولا أقول أغاني

كل الي شفته , شفته بعينايا

و الي سمعته سمعته بوداني

____________________

في الميدان ..الراجل يبان

الميدان ..مفيهوش جبان

الكل قادر يفدي بالدم الرسالة

و ان قالوا جاسوسية و ان قالو عِمالة

راح هنكون يا بلادنا فداكي

قال ايه قالو بتوع كنتاكي

في الميدان الأرض هي السرير

و الرصيف هوا المخدة

في الميدان الناس كتير

فَ البرد منــّا خاف و عدّا

و الناس بقوة مستعدة

تفضل تنام كدا عالرصيف

لحد ما طلبهم يكون

و لأن مطلبهم شَريف

مكانش ضعف ولاكانش ردّة

_________________________

أول ما توصل

بتلاقي لجنة

ماتخافش منها ..هتفتشك

و بالبطاقة…. تدخلك

مسلم هتدخل

و مسيحي يدخل

ولا حاجة بتفرق مابينا

قالك ما بينهم شِبه فتنه

طب ييجو ويشوفو وقت الصلااااة

ان صلّى المسيحي …المسلم حَماه

_______________________

و في الميدان

أشكال و ألوان

فيه الجديد

فيه اللي بايت من زمان

هتلاقي ليبرالي

اشتراكي

و تلاقي أخوان

حتى الجيوب

فيه اللي فاضي

و فيه مليان

_________________________

اول ما تدخل اعمل جولة

هتحس ان ميدانك دولة

عامل نظافة .. و شغلته مهندس ديكور

هتــــّيف مظاهرة ... في الأصل كان دوكتور

أصل الميدان مفيهوش مغرور

الكل دايما أيد واحدة

علشان نظام الظلم يغور

في الحيرة كله يكون حيران

ساعة القلق هتكون قلقان

ساعة الغضب بتكون غضبان

و اكيد تلاقي حد هيطبطب عليك

في الضعف هتلاقي الف واحد ياخد ايديك

_____________________________

و ساعة الفرح فرحتنا بتهز الجبال

جايين بقا يحاربونا ببغال و بجــِمال

مين الي يقدر على ملايين

حبة حثالة من زبالة المجتمع؟

امين شرطة؟

بلطجي ماشي ف ايده بلطه؟

عسكري مالمركزي فاكرنا عملاء من سويسرا ؟؟

دنا كنت اروح و اعيش في مالطة

رافعينلي صورة حسني و جايين يتمختروا

بالرغم من استفزازهم محدش اتعرضلهم

اتغاظوا بقا و حدفو طوب و حديد.... و ازاز علينا يكسروا

و قصاد كل حدفة منهم ...الله أكبر مننا

مستحيل مأجور و قاتل يغلب أيمانّــا ف قلبنا

مع كل كلمة الله أكبر

قوتنا تكبر

عال خوف بنقدر

والفجر يطلع..

و دا يوم جديد...

يعني لازم البلطجي ياخدله أجره من جديد..

و عابال ما يرجع عملنا متاريس من حديد..

كل الي يجي مالزباله يبعد بعيد

أصل الميدان..

دولة أمان ....

دولة أيمان.......

_______________________________

عال منصة... واقفة أم شهيد بتبكي

بتقولنا راح مني ولدي....

بس انت ولدي, و انتي بنتي , وانت ولدي

لازم تجيبو حق ولدي...

حق بلدي...............

اوعوا في يوم تستسلموا

تدمع دموع العين ..

تطــّفي نار قلبها..

و تسمع صوت ابنها ...بيقولها

في الجنة .. أنا

ضاع الألم و اليوم هنا

يا ريتكو كنتو تستشهدوا

في الجنة مش راح تتألموا ....

__________________________

و اما غار ... راس الفساد و العار

فرحتنا .. زادت قوتنا

لكننا لسة ماتوهناش

عارفين بان الفساد و الظلم هنا موجود

و مسكتناش

لسة الميدان موجود

و الفرق عن البداية ...إن العدد هيجود

و ان فضل الفساد و الظلم راح ننزل و من تاني

و دا لاني ...في الميدان فاكر مكاني

في الميدان سندي و ايماني

____________________________

شريف أشرف غالي

18/2/2011