فرصة ذهبية

بسم الله الرحمن الرحيم
الحمدلله الذي فرض على عباده فريضة الصيام
والصلاة والسلام على أشرف الخلق والأنام
سيدنا محمد ابن عبدالله القائد والإمام
وعلى آله وصحبه ومن تبعهم بإحسان إلى يوم البعث والقيام
ثم أما بعد،،،،،،
((((فرصة ذهبية))))
جعلته عنوان موضوعي النهاردة يا ريت يا دكتور ما تغيرش الصفحة وكمل معايا الموضوع للآخر
فرصة ذهبية لكل مذنب ومسيء وعاصي
يوم عرفة
ايه ده ....أنا شايف الماوس بتاعك رايح على أيقونة (باك ) .... استنى استنى ما تقلبش كمل بس الموضوع للآخر مش هياخد منك 3 دقايق
ماذا قال رسولنا الكريم عن يوم عرفة
قال النبي :" صيام يوم عرفه أحتسب على الله أنه يكفر السنة التي قبله والسنة التي بعده " [ رواه مسلم ]

انت مركز معايا .....يكفر السنة الي قبله والسنة الي بعده ؟؟؟؟!!!!! تخيل
طيب تعالا كده نحسبها مع بعض
انت لو جيت تحسب دلوقتي عدد ساعات الصيام في اليوم تلاقي الفجر بيأذن الساعة 4:47 صباحا والمغرب بيأذن الساعة تقريبا 5 مساء
يعني عدد ساعات الصيام قول 12 ساعة تقريبا ......يعني صيام 12 ساعة هيكفر ذنوب سنتين ؟؟؟؟ اه هيكفر ذنوب سنتين
طب تعالا ندقق في الموضوع شوية
لو قسمنا 12 ساعة على سنتين؟؟
يبقى صيام 6 ساعات يكفر ذنوب سنة
طيب لو قسمنا 6 ساعات على 12 شهر ؟؟
يبقى صيام نص ساعة يكفر ذنوب شهر
طيب لو قسمنا 30 دقيقة على 30 يوم؟؟
يبقى صيام كل دقيقة يعادل تكفير ذنوب يوم كامل
يوم كامل قعدت تعصي فيه ربنا ال24 ساعة سواء بالكذب أو بالنميمة أو بالغيبة أو بالنظر المحرم أو .... أو .... أو ....... إلخ
تخيل أخي الحبيب صيام دقيقة واحدة في يوم عرفة يعادل تكفير ذنوب 24 ساعة كاملة
كلنا غرقانين ذنوب ومعاصي ، مين مننا ما بيعصيش ربنا ؟؟
فاللبيب اللبيب من يحافظ على صيام هذا اليوم
اللبيب اللبيب من يحرص على قضاء هذا اليوم في العبادة والطاعة

ملحوظة صغيرة جدا
أغلبنا بيجي بوم عرفة ده يفتح قناة السعودية ويتفرج على الحجاج وهما قاعدين على جبل عرفات وبيدعوا ربنا ....طيب ... إنت أستفدت إيه ؟؟؟؟؟؟ هما قاعدين في عرفات بيدعوا ربنا وبيستغلوا وقتهم في العبادة والطاعة وقراءة القرآن ....إنت لما قعدت قدام التلفزيون تتفرج عليهم إستفدت إيه ؟؟؟
أنا مش قصدي ما تفتحش التليفزيون وتشوفهم مثلا كل ساعتين أو 3 ساعات
أنا أقصد ما تضيعش يوم من أغلى أيام حياتك قدام شاشة التليفزيون لكن استغل الفرصة العظيمة ديه في العبادة والذكر والصيام وقراءة القرآن وأفضل الذكر قراءة القرآن .... وكتروا في الأيام الجميلة ديه من التسبيح والحمد والتهليل والتكبير والتلبية
سبحان الله والحمدلله ولا إله إلا الله والله أكبر
لبيك اللهم لبيك لبيك لا شريك لك لبيك إن الحمد والنعمة لك والملك لا شريك لك

فيا باغي الخير أقبل
فيا باغي الخير أقبل
فيا باغي الخير أقبل
ويا باغي الشر أقصر

سبحانك اللهم وبحمدك أشهد أن لا إله إلا أنت أستغفرك وأتوب إليك

والسلام عليكم ورحمة الله وبركاته

تحياتي ،،،،،،،
عاشق مصطفى اسماعيل