رمضان خلص ..طب وبعدين ؟!!!

اولا كل سنة وانتو طيبين
ثانيا
رمضان خلص صحيح
طيب هنرجع بقى تانى ونعيش حياتنا
ماحنا صلينا وخدنا الثواب وتمام
...لا طبعا دة عمره ماكان الهدف من رمضان
خلينا نخلى شعارنا
رمضان ثمرة سنة ماضية وبذرة سنة قادمة
اكيد فى مننا ناس بتفكر
السنة دى ماكنتش كويس اوى ماحستش بخشوع اوى
ممم.. معلش يبقى اكيد ماكنتش قريب من ربنا اوى السنة اللى فاتت
بس نثبت عاللى وصلناله السنة دى
ورمضان الجاى هنلاقى قلبنا نقى بالفعل واقرب لربنا
خلونا نتعاهد على شوية حاجات

ازاى ممكن أثبت !!؟؟
أخلى قلبى موصول ديما بربنا وعمرى مانسى
اكيد كل حد مننا بتاخده دوامة الحياة ف وقت وبينسى وبيبعد وبيتعب جدا ومابيرتاحش الا ف القرب من ربنا
طيب ازاى اخلى قلبى موصول ديما بربنا ؟
هصلي !؟
...طبعا
بس مش هقول البؤين وانزل واطلع كأنى بلعب رياضة
لا هخشع فى صلاتى ودى أهم نقطة
هرفع ايدى كأنى بطرد الدنيا كلها ورا ضهرى
واقول الله اكبر .. الله اكبر من كل شئ ومن اى حد ممكن يشغلنى عن صلاتى
هفكر انى الوقتى بين ايدين ملك الملوك . بين ايدين العزيز الجبار
هلكمه هناجيه هناديه هدعيه باخلاص ومن كل قلبي وانا واثق انه قريب مجيب

هصلى الصلاة ف وقتها
هحاول احافظ على النوافل

القيام
لا انا بعد مادقت حلاوة القيام مش هسيبه تانى
ركعتين كل يوم مش بقول زى رمضان
هحاول احافظ على الوتر والضحى

هصوم النوافل ,, والاتنين والخميس على قد ماربنا يقدرنى
هخلى لسانى ديما رطب بذكر الله
تخيل عداد حسنات شغال ليل نهار
هقول اذكار الصباح والمساء. مش هفوتها تانى

قراءة القرآن
طبعا لازم احافظ على ورد يومى ولو حزب على قد ماربنا هيقدرك وهيقدرك والله لو اخلصت

...طيب كدة كفاية اوى انا كدة تمام

لا طبعا نسيت حاجة مهمة جدا
فى حديث بيقول
" مامن عمل أثقل فى ميزان العبد يوم القيامة من حسن خلقه "
هحسن معالمتى للناس
واولاهم اهل بيتى
أبويا أمى .. أولادى . إخواتى .. زوجى أو زوجتى
مش أبقى ذوق مع الناس وارجع اخلع القناع
لا طبعا دة عمره ما يرضي ربنا

هتبسم ف وجه إخواتى
مش هنافق
لن أتملق صاحب جاه أو مال أو سلطان
هعامل الناس كلها زى بعض
الغنى زى الفقير . القوى زى الضعيف
هاكون بار بوالداى و والدتى

طيب دة كفاية !!؟
دة كله ضرورى عشان تنجح ف حياتك
ربنا عايزك ناجح ف حياتك عشان ترفع راية الاسلام لأعلى عليين
إحنا تاعبين نفسنا اننا نفهم الغرب ان الاسلام دين سماحة ومحبة وسلام
وعمرهم ماهيفهموا
...لان القوى هو اللى بيسيطر على وسائل الاعلام وعلى عقول الناس

لو أنا طالب
هذاكر كويس جدا وأحتسب أجرى عند ربنا إنى أكون ناجح وأنفع الاسلام
لو ماخدتش حقى عند الناس حقي عمره ماهيضيع عند العدل .. فعنده وحده العدل المطلق

لو أنا بشتغل هراعى ربنا ف عملى
لو موظف حكومى هشتغل كويس واراعى ربنا ف الناس
مش هسيبهم واقفين عالشباك واقولهم فوت علينا بكرة واذلهم وامرمطهم واستهتر بكرامتهم
هعامل كل الناس زى بعض
مش هاخد رشوى أبدا عشان أمشي مصلحة اللى معاه على حساب اللى معاهوش
ايا كان المسمى .. الدخان ولا الحلاوة
مش هروح متاخر وامشي بدري

هتعامل مع زمايلي وزميلاتى ف الشغل بس فى اطار العمل
فى اطار اللى ربنا شرعه
فى حدود اللى يمشي العمل باحترام ودون اى تجاوزات او كلام مالوش لزمة
ومع ذلك هكون جدع معاهم ولو احتاج مساعدتى اكيد هساعده وانا اللى هعرض عليه كمان

هقرأ
فى ديني .. اه تمام دة مطلوب بل واجب
بس كمان هقرا ف كل المجالات
فى تخصصى اولا عشان ابقى مواكب لكل جديد
وفى كل التخصصات ثانيا
عشان ابقى عارف شئ عن كل شئ
هقرا فى الادب.. فى الفلك .. فى الطب . هتابع أخبار عشان ابقى عارف ايه اللى بيجرى مش عايش بطيخة كدة مش عارف المركب موديانى على فين!!


هعاهد ربنا إنى مش هسكت على ظلم
مش هسيب واحدة بتتأذى فى الشارع وأسكت
مش هشوف متجبر بيجبر عالناس ويسعى فى الارض فسادا واقول وانا مالى وامشي واديله ضهرى
تفتكر كدة ربنا هيرضى عنك ؟
الساكت عن الحق شيطان أخرس
...مش هسكت على منكر بيحصل أمامى من غير ماأحاول أغيره بيدى فان لم أستطع فبلسانى فان لم أستطع فبقلبي وليس وراء ذلك ذرة ايمان
هأمر بالمعروف
هدعو لديني وأكون نموذج للمسلم العالم العامل بعلمه

هساعد الناس

وعشان انا بحب ربنا هحافظ على نظافة بيتى بلدى
هو مش إماطة الأذى عن الطريق صدقة ؟
طيب يبقى إلقاء الأذى فى الطريق مش ذنب هيحاسبنى ربنا عليه
مش دي بلدى ولازم أحافظ على جمالها ونضافتها ومنظرها قدام القريب والغريب؟؟
من هنا ورايح عمرى ما هرمى ورقة ولا حتى قشرة لب عالارض
ولا فى المدرج ولا فى حديقة . أيا كان
ليه أشخبط على الدرج واشوه منظره ؟؟
ليه أكسر لمبة فى الشارع ؟؟

فى حاجة لازم كلنا ناخد بالنا منها
هى المحافظة على المال العام
سواء كهربا ولا مية ولا تليفون



وعشان أحافظ على صلتى بربنا
هسعى ديما يكون ليا صحبة صالحة
هنتجمع مع بعض وونصلي ونقرأ قرآن
ونقرأ حديث . أو أى علم نافع
ونبتغى فى كل دة وجه ربنا
هنتفق مع بعض على اننا نخلى صحوبيتنا لله فى الله وانها تكون سبيل يقربنا من ربنا مش يبعدنا عنه
يعنى مثلا نتفق اننا هنصلي الليلة دى ركعتين قيام
او نصوم مع بعض يوم معين وندعى دعاء معين اعة الافطار
صدقونى دى اكتر حاجة بتشجع وبتقوى على الخير

وأهم أهم شئ
قبل ماعمل اى اى حاجة
أفكر فيها كويس
انا بعملها ليه وعشان مين
وأخلص نيتي
أنا بعملها لربنا وحده
هعبد ربنا وهذاكر وهلعب وهتفسح وكل دة لربنا

انا عارفة المواظبة ممكن تكون صعبة
بس طول مالنية موجودة
وانا بجددها ديما
وبفكر نفسي
وطول مانا بجاهد نفسي
أكيد بإذن الله هوصل


هستشعر دائما معية الله
الله معى الله بجانبي الله شاهد علي
وان فى ملكين بيراقبونى فى كل اقوالى وافعالى

هثق بقدراتى .. هثق فى عقلى
هطالب بحقوقى
انا انسان زيي زي اى انسان فى أى دولة عربية كانت أو غريبة
بل أنا أحسن منهم لان ربنا اصطفانى بالاسلام
وأعطانى دستور أمشي عليه عشان أنجح مش أتوه فى ظلمات الجهل والشهوات


هنجح .. بس عشان ربنا .. هعيش حياتى صح .. هعيش فى سعادة بس فى طاعة ربنا

وأخيرا
أنا مش بنصحكم انا أقل بكتير من إنى أنصح
دة حديثى مع نفسي ودة حلمى اللى تكون عليه حياتى وحياة كل مسلم
علشان نشوف راية الاسلام عالية زى ماكانت زمان ايام الخلفاء الراشدين

أسألكم أن تدعوا لكاتب الموضوع بالإخلاص والهداية
م ن ق و ل

الله أكبر

موضوع رائع جدا يا محمد

جزاك الله كل خير على حسن النقل يا صاحبى

أدعوا الله أن يتقبل منا صالح الأعمال و يرزقنا الإخلاص والتقوى