يوميات سيييييف

[center]حبيت اكتبلكم حاااااااااااااااااااااااجة فى اخر السنة الى هتكون الاخير بنا فى الدراسة

بس ان شاء الله هنفضل اخوااااااااااااااات طول العمر

ياريت تقرووووها وتقلولى رايكم

انا اصلا مش بكتب كتيييييييييييييييير بس بقى المووود الى انا فية بطلع فى الكتابة حجات كتير [i][u][strike]
‫مدرسة المحلة الثانوية بنين .. فصل الفائقين .. الحصه التالته ..
"وله يا سييييييف .. رد .. بينادوا عليك" الواد أحمد شنب –اسمه كده- بيهزني برجله اللي هي أيده علشان أقوم من النوم في الفصل و ارد على الغياب اللي بياخدوه للحصه التالته على التوالي .. "أيوه" رديت .. ببص حوليا .. لقيت زملائي الأعزاء (أيمن النادي – محمد يونس – محمد الرفاعي – محمد عامر – احمد شنب اللي أيده زي رجله و ابن عمه الحاج احمد شنب .. آه أسمه الحاج احمد .. – محمد السجيني – جون مينا – نادر شاروبيم ...) إيه العيال الدحيحه دول .. ياربي أنا عملت إيه في دنيتي علشان اكون معاهم .. دا انا حتى مذاكرتش في الاعداديه .. ببص عليهم لقيت كل واحد قاعد منتبه في الحصه .. غريبه .. و الأغرب أن الأستاذ بيسال و هم بيرفعوا أيديهم علشان يجاوبوا .. هو ده حقيقي اللي انا شايفه .. و لقيت احمد شنب بيتخانق مع ابن عمه على مين اللي يجاوب و الأمر تطور و الواد احمد شنب ضرب ابن عمه بالشلوت على وشه –قصدي بالقلم على وشه- .. و اللي محيرني إنها كانت حصة دين و السؤال كان مين اللي حافظ سورة الكهف .. و المفاجأه أن الواد جون مينا و الواد نادر شاروبيوم كانوا بيرفعوا أيديهم .. أنا هتجنن .. و في اللحظه دي اخدت قراري .. أنا هطفش من المدرسه في الفسحه.
الجرس ضرب .. الفصول كلها بتطلع و الفصل بتاعي لسه قاعد .. يا اخونا الحصه خلصت و الفسحه اللي هي احلى حاجه في الدنيا بدأت .. كله قاعد .. و الأستاذ بيتكلم .. لا حول و لاقوة إلا بالله العلي العظيم .. يا عم خلص ابوس أيدك .. ازاي يخلص و نادر باشا مش فاهم آيه في القرآن .. يا عم وانت مال أهلك .. انت خلصت كتاب الدين المسيحي و ادورت على الإسلامي علشان تصم وتقرفنا .. ما تحفظ الجرنال كل يوم الصبح وخلاص .. و عدى من الفسحه نصها .....
خدت شنطتي على ضهري و جري على الحوش .. دورت على محمد شعبان لحد مالقيته قاعد كده وهو تختوخ و ملظلظ ولامم حواليه العيال و بيحطوا الرتوش الأخيره لخطة اغتيال الأستاذ عبد الوهاب مدير المدرسه .. "وله يا شعبان .. ماتيجي نطفش و نروح ناكل لفاليف عند عم سيد ذو الأظافر المتسخه" .. و بعد تفكير عميق استغرق ثانيه واحده قال: "موافق .. آخر الفسحه .. والعيال طالعين تاني الفصول .. نجري لآخر السور و ننط من الحته اللي فيها طوب مكسور" .. "يا خططك الجامده يا شعبان" .. "بس انت اللي هتعزمني" .. "موافق"
كل حاجه بعد كده حصلت بسرعه .. الجرس ضرب .. كله بيطلع الفصول .. أنا و شعبان بنجري ناحية السور .. انا و صلت الأول .. شعبان تخين بس انا شايفه على مرمى البصر .. رميت شنطتي ورا السور و بعدين طلعت و قعدت فوق السور مستني محمد شعبان .. شعبان وصل رمالي شنطته خدتها و رمتها بره .. شعبان بيمدلي أيده علشان اساعده يطلع مسكت أيده و حاولت اشده بس أيده اتظفلت مني .. قلتله "هات أيدك تاني يا شعبان" و بضرب بعيني بعيد لقيت الأستاذ عبد الوهاب جاي من بعيد ماسك الخرزانه المتغطيه بشكرتون و ماشي نحيتنا .. "وله يا شعبان .. الأستاذ عبد الوهاب جاي" .. مسك شعبان أيدي بأديه اللاتنين .. و بص وراه لقاه ماشي نحيتنا .. شعبان صرخ صرخه لسه مش عايزه تطلع من ودني لحد دلوقتي و قاللي "الحقني يا سيييييف" .. "اطلع يا شعبان" .. أيده اتظفلتت تاني .. وقع على الأرض .. قام بسرع و بص وراه .. مسك ايدي الممدوده من فوق السور .. "شدني يا سيييييف" .. "اطلع يا شعبان" .. "شدني يا سييييييف" .. "اطلع يا شعبان" .. شعبان بيحاول يطلع برجله .. "شدني يا سييييف" .. "اطلع يا شعبان" .. بشد أيد شعبان جامد .. "شدني يا سيف" .. "اطلع يا شعبان" .. "متسبنيش يا سيييييف" .. "متخفش يا شعبان" .. و اتظفلط شعبان للمره الأخيره .. و كان الأستاذ عبد الوهاب بلغ حدا لا يمكن السكوت عليه .. و كانت آخر كلمه قلتهاله "سلام يا شعبان .. متخفش شنطتك معايا" .. و اخر كلمه سمعتها منه و الاستاذ عبد الوهاب وراه "يا سيف يا ابن الـ........" .. و نطيت بره المدرسه و نزلت أرض الزربيه .. و حطيت ودني و خدي على سور المدرسه و عنيا مدمعه و بسمع صوت صريخ شعبان "أيييييي" .. و انا بقول و بحاول اغالب دموي "استرجل يا شعبان" .. "آآآآآآآآآه" .. "معلش يا شعبان" .. "لأاااا بلاش دي" .. "انت شعبان الفارس يا شعبان" .. "دا احمد ابن رافت سيف هو الي قالي يللا نطفش" .. "آه يا ابن الكلب يا شعبان" ..
مسحت دموعي و وطيت أجيب شنطتي و شنطة شعبان من على الأرض .. و برفع عيني لقيت أربع وحوش آدميه .. ذئاب بشريه .. كائنات مداريه .. كل واحد فيهم ماسك مطوه قرن غزال .. اللي في النص قاللي "كابزن (كابتن يعني) .. انت بتعمل في الزربيه" .. "لا ولا حاجه .. انا وقعت بس من على سور المدرسه بس داخل تاني للأستاذ عبد الوهاب" .. "آه .. و انت بقى معاك شنطتين ليه؟" .. " اصل أنا في فصل المتفوقين" .. "طب بص .. هات الشنطتين و طلع اللي في جيبك" .. "لأ أنا مقدرش أديكو الشنطتين .. هي شنطه واحده" .. و اديتهم شنطة محمد شعبان .. "هات الشنطه التانيه يا روح امك" .. و فجأه لقيت خرم من وسط الأربعه .. و قلتلهم "بصوا الحمار اللي بيطير ده" .. بصوا على الحمار اللي بيطير و انا جريت .. و من نعم ربنا عليا ان انا سريع .. و جري يا عم الحج و هما ورايا بعد ما اكتشفوا ان الحمار مبيطرش .. و عبرت الزربيه .. أرض الأحلام .. و دخلت على المشحمه .. و هما ورايا .. ووقفت اشرب سوبيا من عند السمولي بتاع الكوكتيل .. و هما ورايا .. ووصلت لحد البيت وانا بنهج ....... أخ .. طيب انا اقول إيه لابويا .. هيقولي أيه اللي جابك من المدرسه بدري .. لازم حجه مقنعه .. دخلت لقيت ابويا صاحي .. وقاللي "انت أيه اللي جابك من المدرسه بدري؟" .. قلت "أصل فيه فيروس غامض في المدرسه .. والعيال كلهم ماتوا ما عدا انا .. فالمدرسين قالولي روح انت و سلملنا على بابا" .. ابويا قال "الله يسلمهم .. دول زمايلي كلهم .. آآآه ... طيب ادخل اعملي كباية شاي" .. "حاضر

احمد سيف

هههههههههههه
طب والله كانى انا في الفصل برده كان العيال اللى معايا دحاحين وانا الوحيدة الى على طول نايمة
بس بصراحة مكنتش بنط من فوق السور
بس جامدة والله هى ليها تكملة؟

شكررااااااااااا يا دكتووووووووووووووووووورة 
هى ليها تكملة بس ادعيلى يجيلى مزاج اكتب شكرا مرورك 

roma كتب:ههههههههههههههههههههههههههه
بجد عجبتنى لازم تكملها يااحمد يارافت ياسيف :D
الجرى نص الجدعنه ههههههههه بتسيب صاحبك وبتسلم شنطته كمان يالهووووووويز
طب عارف لو مكملتهاش هاجى اقول لابوك ان مكنش في فيروس ولاحاجه وانت بتكدب عليه وهو يتصرف بقي
هههههههههههههههههه
في انتظار التكمله ان شاء الله

لا منا لما خلصت الثانوية بقى قعت احكلهم كل الحجات دى 
وبتبقى زكريااااااااااااااااااات جميلة جدا جدا جدا والله والواحد كان بيتصرف بعفوووووية ومكنش فى دماغة حاجة  بلاش احكى اكتر من كدة عشان الى حصلى فى المدرسة  تانى يوم محصلش لحرامى جزم يوم الجمعة 

roma كتب:هههههههههههههههههه
شكلك كنت مشاغب وبتضرب كمان
لا مهو انت هتكملهايعنى هتكملها
احنا منتظرينها
وبعدين هى اليوميات بتبقي يوم واحد ولاايه
كمل احنا هنستناها اوكى

ههههههههههههههههههههههههههههههههههشكلك بتحبى الفضايح اوووووووووى انا فى ناس اول ما عرفت انى هكتب مزكراتى بقوا يتصلوا بيا  ويقولولى متجبش سيرتنا 
فربنا يستر على عبيدة بقى 

ايه ياعم الحلاوه دي
جامده جدا والله
وبعدين مش تقولي كنا نطفش سوا انا وانت
بدل شعبان الخايب ده هههههههههههههه
ومتخفش ماكنتش هسيبك مع الصيع دول لوحدك يعني
ياااااااااااااه كانت ايام ياسيف والله حلوه اوووي
انا منتظر التكمله بقه

roma كتب:ههههههههههههههههههه
ازاى ياخالدفي فصل واحد وانت من المحله وهو من المنصورة
واه انابحب الفضايح بقي
وقول قول متخبيش متخافش منهم ابقي قولهم شفتو الحمار الى بيطير ده واجرى منهم
ههههههههههههههههههههههه

\
لا فى معلوووومة غلط انا محلااااااااااااااااااااااااااااوى اصيل  وكمان حرام عليكى دول مبيشفوش حمااااااااااااااااااااااارر ابدا ابدا  ابدا

roma كتب:هههههههههههههه
ليه ماعتقدش انكو مدينه
مش المحله قريه بردك ولاايه
واكيد عندكو كتير يعنى

وبعدين متفتخرش اوى كده انك محلاوى انت متعرفش المحلاويه دول عاملين ازاى
لو تعرف تتبرا منهم ع طول هههههههههه
وهتكملهابرده يعنى هتكملها

لااااااااااااااااااااااااااااا
كلة الا المحلووووووية   وبلاش تخبيط فيهم عشان دول زعلهم ووووحش  اوى اوى اوى ومحلة ايه الى قرييييييييييييييييييييييييييييييية انت محسسانى انك بتكلمى عن عزبة :S:S:وملهم بقى المحلوية ما زى الفل اهم :D:D:D

ههههههههههههههههه

انا يابنى ماكنتش بنط من ع السور والحوارات دى

انا كنت بروح للأستاذ ابراهيم مدير المدرسة اقوله لو سمحت مفتاح البوابة عشان عاوز امشى

اه والمصحف

شوفت القدرة
هههههههههههههههههههههههه

مستنين الباقى ياد

ههههههههههههههههههههههههههههههه

طب والله جامده بجد

لالالالالالالازم تكملها

ماشي ياروما اتتريقي علي المحله واقتصاد ايه انتي كمان اللي انتم بتشتروا من المحله
المحله بتصدر للخارج اكتر من السوق المحلي واقتصاد مصر من الغزل والنسيج
كله من المحله
ولو مش مصدقه افتحي وبيكيديا العالميه واسمها مدينة المحله الكبري
قرية ايه انتي كمان هههههههههههههه
انتي ممكن تقولي في محلات تانيه هي اللي قري مثل محلة الزياد ومحلة حسن وهكذا....
انما ما يتحدث عنها سيف فهي مدينة المحله الكبري
واي خدمه افتكري الجمايل دي معلومات علي الماشي

على فكرة قبل ما تكمل اللى سيف بيحكيه ده يا جماعة صورة مصغرة عن ما يحدث فى مدارس الثانوى ونموذج لمعظم مش هقول كل مدارس مصر

هههههههههههههههههههههههه

جامد يا سيف
زي الحاجات اللي بيحكيهالي خالي بالظبط :D هو بيقولي انا مش عارف خلصت كلية ازاي اصلا :D
حتى عندنا في المنصورة النظام كان كده برده
بس انا مكنتش بزوغ في أولى
ومكنتش بحضر غير نادرا في تانية وتالتة
:D

بس موضوع التزويغ ده عادي يا عم

قولنا حاجة صايعة :D

ههههههههههههههههههههههههههه

عارفة الفصل دى
كان فصل رهيب الواحد كان بيحس انه مع ناس غريبة

العيال تبقى جنبك كده وانا عايزة بقى اضحك واهرج وهما قاعدين يدحوا
لا وايه كان عندنا مدرسة انجليزى كانت بتدينا كلمات اضافية
الحصة اللى بعدها القيهم قاعدين يتسبقوا مين اللى هيسمع الكلمات دى على السبورة النهارده

ولا واجب العربى دى انا مكنتش بعمل واجب فى الاعدادى هعمل فى الثانوى لييييييييييييييييييييييه
القيهم اول اما الاستاذ جهيوريله الواجب يا جماعة هو طلبه!!!!!!!!!!!!!!
ولا التعبير العشرة من عشرة على طول
حد ياخد عشرة فى التعبير

فصل غريب

لا بس حلو اوى يا سيف
مستنين التكملة طبعا
بالتوفيق

هههههههههه اه يا ايه مس عايدة كانت تدينا كمات كتيرة اوى بس انا كنت بحبها وكنت بحب احفظها

اما بالنسبة لجده سعيد بتاع العربي فدي بانسبة لى كانت احلى حصة اكل فيها السندوتشات وانام ومكنتش بسمع من صوته حاجة اساسا

بس كانت ايام والله
ياااااه ليت الشباب يعود يوما

ههههههههههههههههههههههههههههه

ابلة عايدة دى كانت فظيعة كانت بتدينا شوية كلمات
تقريبا مرة قولت اعمل زيهم اشمعنا انا يعنى
وكانت اول واخر مرة
ماكررتهاش تانى ابداااااااااااااااااااا

اما عمو سعيد دى بقى حكاية
ادانى مرة 10 فى التعبير كنت مبسوطة اوى ههههههههههههههههههههه
الواحد كان شكله وحش اوى والعيال ايه مش بيسيبوا

يابنتى اصلا كان بيكلم نفسه

ولا المزاكرة للادروس فى الحصص الفاضية والفسحة
كنت بتشل واقول انا ايه اللى جبنى هنا


هههههههههههههههههههههههههههههههه
بس والله عشنا ايام تحفة

dezner كتب:ههههههههههههههههه

انا يابنى ماكنتش بنط من ع السور والحوارات دى

انا كنت بروح للأستاذ ابراهيم مدير المدرسة اقوله لو سمحت مفتاح البوابة عشان عاوز امشى

اه والمصحف

شوفت القدرةهههههههههههههههههههههههه

مستنين الباقى ياد

ياد دة كان لسه اول سنة ليا فى المدرسة وكنت فى المتفوقين وحجات من دى 
بس بعد كدة بقى فى حاجة اسمها التصاريح  يعنى لمؤخذة الم الزبااااااااااااااالة بعد الفسحة واقوم مروح على الحصة الرابعة وبكررررررررررررامتى :D:D:D:D