{{{ أبو حلموس التعيس فى لقاء مع الرئيس }}}

{ 5 }
ومشينا على رجلينا جوه البلد

قال لى فخامته
-ما تقوم بينا نلف فى البلد شوية . . عايز اشوف الشوارع شكلها إيه والناس عايشه إزاى عايز أتفرج على شعبى ورعيتى
- إنت تأمر يا فخامة الرئيس , تحب نبتدى منين ؟

- مش مهم مكان معين , المهم نمشى فى قلب البلد وخلاص
خرجنا إلى الشارع الرئيسى ومشينا فيه بعض الوقت وفضل فخامته يكلمنى عن مناظر الزباله فى كل مكان وعن الناس المعفنه اللى بترمى الزباله فى الشارع وإزاى ما يساعدوش الحكومه فى الحفاظ على نظافة البلد , فقلت لفخامته
-فخامتك المفروض أن الناس بتعمل اللى عليها وبتدفع رغم عن بوذها مبالغ كل شهر على فاتورة الكهربا ودى مخصصه لجمع القمامه والمفروض إن فيه شركه متخصصه فى كده
-طيب هى يعنى الشركه هاتيجى تخبط على بيبان الناس وتقولهم هاتوا زبالتكم ؟
-ما حدش قال كده فخامتك , ولو إن الزبال كان بيعمل كده ودى شغلته مش عيب يعنى , لكن على الأقل تجيب صناديق للناس تحط فيها الزباله وتلتزم بجمعها كل يوم , لكن اللى بيحصل أن الشركات ما بتجمعش غير الفلوس أول الشهر على فواتير الكهربا , لكن لا فيه صناديق ولا فيه عربيات بتلم الزباله , واللى بيقدر بيدفع لزبال قطاع خاص غير اللى بيدفعه للحكومه واللى ما بيقدرش آديه بيرمى فى الشارع , يمكن الشركه تحس شوية وتيجى تلم الزباله دى
-أهو إنتم كده ,كل حاجه ترموها على الحكومه . , هى الحكومه هاتعمل لكم إيه ولا إيه ؟
-عندك حق فخامتك , ما أنا قلت لك من الأول إن ده شعب رمه ما يطمرش فيه الطيب , شركات نظافه وجبت لهم شركات نظافه . فلوس وجمعتم من الناس شلاليح ( قروش يعنى والسفروت يساوى 100 شلحوح ) بس الشلاليح دى بتجمل عشرات الملاين من السفاريت كل شهر وماله دى شركه تستاهل , وفى الآخر الشعب المأنتخ عايز كمان الحكومه تيجى تشيل له زبالته , مش بقولك شعب رمه وما يستاهل الطيب
-إستنى هنا كده , إيه الزحمه دى ؟ يا خبر أبيض , معقول فيه ناس بالكميه دى
-يا ريس ده طابور عيش ,
-طابور إيه .. طابور عيش ؟ ليه هو العيش شاحح فى البلد ولا إيه ؟
-لا يا فخامة الرئيس العيش مالى البلد وعلى قفا مين يشيل وكل مترين بتلاقى مخبز عيش بلدى وأفرنجى وإشى ساليزون وإشى باتى بان وإشى مش عارف إيه واللى معاه يدفع نص سفروت فى الرغيف بيشترى واللى ممعاهوش يروح يقف فى الطابور
-طيب ما الحكومه بتاعتى مدعمه العيش وبتبيعه بخمس شلاليح , يعنى فى متناول كل مواطن , يبقى ليه يشترو أبو نص سفروت وليه يقفوا بالشكل ده على الفرن ده بالذات , ده لازم الفرن ده عامل عرض وبيدى على كل 10 أرغفه فطيره مشلتته
-ما هى دى الأفران اللى بتبيع العيش المدعم , وبعدين عرض إيه يا فخامتك ؟ إذا كان نصيب كل واحد من اللى واقفين هناك فى الطابور ده من طلعة النهار بيكون عشر أرغفه واللى عنده عيال كتيره بقى ولا حظه الأسود وعده بضيف رزيل راسم على غدا وعايز يجيب عيش أكتر يجيب الطابور ده من أوله تانى بس لما تيجى الرشه
-رشه , , يعنى إيه رشه .. ؟ إنت عليك ألفاظ يا جدع إنت , مش فاهم منها حاجه خالص
-لا مؤاخذه يا ريس . أصل دى عدم المؤاخذه لغه أفرانى , يعنى خاصه بالناس اللى مقضيه عمرها واقفه فى طوابير العيش والرشه يعنى الدفعه , لأن الأفران دى بتخبز على دفعات , ولما بتخلص الرشه – قصدى الدفعه الناس اللى واقفه فى الطابور تفضل حاجزه مكانها لحد ما تيجى الدفعه التانيه , بعد ساعه ولا ساعتين ولا تلاته , حسب مزاج الخبازين بقى , وممكن يقولك بعد شويه الدقيق خلص وما فيش عيش النهارده والناس دول بقى ياكلوا بعضهم
-طبعاً لازم الدقيق يخلص , لما كل المنطقه كلها تقف عند فرن واحد بالمنظر ده وباقى الأفران ما فيش حد واقف عندها يبقى الدقيق هنا لازم يخلص
-هاها ها ها ها ...فخامتك ده حال كل الأفران الموجوده فى البلد , سعادتك فاكر أن الفرن ده بس اللى عليه الزحمه دى . سعادتك ممكن ألف بيك على أفران الدعم فى البلد كلها وتشوف بنفسك , وبعدين يا ريت الدقيق كان بيخلص على العيش ما كانش يبقى فيه الزحمه دى كلها , لكن أصحاب الأفران بيبيعوا الدقيق المدعم بعشر أضعاف تمنه للأفران التانيه بتاعة الناس الوحشه الفرافير دول الباتى بان والكيزر واللى ما أعرفش ايه ؟

زعق فخامته وهو ماسكنى من رقابتى

- إزاى يبيعوا الدقيق المدعم فى السوق السودا . ؟ وفين العسس والإنكشاريه ( العساكر والضباط ) علشان يقبضوا على الناس دول
- يا ريس العسس والإنكشاريه قايمين بواجبهم بس فى النهاية كل صاحب فرن بيلبس القضية لعامل من العمال اللى عنده وبيطلع منها زى القمله من راس الأقرع . وبعدين لو حنكوشية الأكل والجرايه ( زى وزارة التموين عندنا ) لو قفلت فرن من دول طيب الناس دى هتجيب عيش منين ؟ وما فيش قدامهم غير إنهم يروحوا على فرن تانى ويبقى الزحمة زحمتين والفرن اللى مش مكفى زحمه واحده تقتكر إنه هايكفى زحمتين .؟؟؟
- بردو إنتم السبب , بقالنا ميت سنه بنقولكم حددوا النسل ما فيش فايده وجبنا لكم وسائل تحديد النسل بشلاليح وما فيش فايده وصرفنا مليارات السفاريت على الإعلانات علشان ننصحكم ونوعيكم وما فيش فايده وعملنا لكم افلام ومسلسلات وأغانى ورقص وطرب علشان تفهموا لكن بردو ما فيش فايده , فالح الواحد فيكم يتجوز أرنبه كل تسع شهور تولد له عيل وأصرفى يا حكومه وأكلى يا حكومه وعلمى يا حكومه وعالجى يا حكومه . . تقولشى الحكومه خلفتكم ونسيتكم
- عندك حق فخامتك . هى الحكومه كانت جوز إمنا يعنى ولا كانت جوز إمنا , علشان تصرف علينا بعد ما أبونا مات وشبع موت , هى الحكومه هاتجيب منين سفاريت علشان تغطى مصارفها وكمان تصرف على العالم دى كمان , ده حتى بيقولك فى المثل اللى محتجاه الحكومه يتحرم على الشعب , ما الحناكيش كلهم عندهم ولاد زينا , طيب هما هايصرفوا على ولادهم ويعلموهم برا علشان يتثقفوا ويجيبوا احسن شهادات ولا هايعلموا الشعب الجربان ده , وهما الحناكيش مش من نفسهم بردوا عيالهم يركبوا أحسن عربيات ويلبسوا أحسن لبس وياكلوا أكل نظيف من غير لا إشعاعات ولا سرطانات . . طيب هما هايلاحقوا على إيه ولا إيه ؟ . . طيب تصدق بالله فخامتك , والله أنا قلبى بيتقطع لما باسمع عن الحناكيش واللى بيحصل معاهم آل إيه كل يوم والتانى إشى إستجواب وإشى طلبات إحاطه فى حوش الحرافيش ( زى مجلس الشعب عندنا كده ) صحيح أهو كله هجايص فى الآخر ولا عمرنا شفنا حنكوش عبر حد من نواب الحرافيش دول ولا سمعنا عن حنكوش كلف نفسه إنه يجاوب على أسئلتهم , بس بردوا ليه يخنقوهم كل شوية بإستفسارات وإحاطات وإستجوابات , ما يسيبوهم باللى هما فيه , مش كفايه الهم اللى ليل ونهار فيه . إشى حفلات وإشى إستقبلات وإشى كوكتيل فى سفرة مين ولا فرح إبن مين . ده غير الهم والرعب ليل ونهار أحسن البورصه تنضرب ويخسروا المليارات اللى بيضاربوا بيها فى البورصه
وفجأة وإحنا واقفين قدام الفرن بنتفرج على الناس اللى هاتموت بعضها على العيش سمعنا صوت سرينه عربية الإغاثه فسألنى فخامته بقلق

- إيه فيه إيه ؟ السرينه دى علشان إيه ؟

- إهدا يا ريس دلوقتى نعرف
وجت عربية الإغاثه وفهمنا إن فيه جثتين من إمبارح سقطوا شهداء لطوابير العيش وجت النهارده عربية الإغاثه تشيلهم علشان ترميهم فى أى قرافه لأن ريحتهم بدأت تطلع وقالى فخامته فى ذهول
- معقوله . . ؟ معقوله إتنين يموتوا فى طوابير العيش . ؟ ده لازم كان عندهم القلب ولا مرض خطير .. هيييييه أعمار بقى . , بس الغريب إن ما فيش ولا واحد ساب مكانه ولا حتى إتلفت حواليه علشان يعرف فيه إيه
- يا ريس ما هما أكيد إتعودوا على كده , هى دى اول مره يعنى ., وبعدين هو لو ساب مكانه مش هايعرف يرجعله تانى ويبات النهارده من غير عشا ..

وللحديث بقية إن كان فى العمر بقيه

{ 6 }
الشعب ده مالوش حل


مشينا فى الطريق ولسه صورة سيارة الإغاثة اللى شالت جثتى شهيدا الفرن قدام عنينا
ولم يتكلم فخامته بكلمة واحده من ساعة ما سيبنا الفرن وبعدنا وكان مسهم ومش عارف كان بيفكر فى إيه وطبعاً كنت باتكلم وألت وأعجن لكن ولا كان سامعنى ,, واضح ان الصورة اللى شافها أثرت فيه كتير وربما كان بيفكر إنه يغير الحناكشية العليا كلها فسبته يفكر براحته وسكت لحد ما وصلنا لأحد الميادين العامه وشاف فخامته زحام تانى كبير فقال
- أيه ده يا أبو حلموس . . ؟ ده فرن تانى ولا إيه ؟
- ها ها ها ,, لا فخامتك ده مش فرن .. دى سينما .
- سينما ؟ ,, امال إيه البشر اللى واقفه قدامها دول كلهم ؟ يكونشى فيه ممثل دابح عجل وبيوزع لحمه ؟
- لا فخامتك ,, أصل الفيلم الجديد بتاع الممثل المشهور ( شخروم المفش ) نزل السينما النهارده بعد ما قعدوا شهرين يعلنوا عنه . علشان كده الناس هاتموت بعضها علشان تاخد تذكره وتشوف الفيلم
- أما إنتم شعب رمم صحيح ,, يعنى من دقايق الناس بتموت بعضها علشان تجيب رغفين عيش ؟ . . وهنا هاتموت بعضها علشان تتفرج على فيلم ؟ ده غير اللى بشوفه لما بحضر ماتش كوره لمنتخب نهابونيا والبشر اللى بتقطع بعضها علشان تذكره وفالحين فى الآخر يشنعوا على الحكومه ويقولوا إنها مقرطه عليهم .. ومنشفه ريقهم وجايبلهم الضغط
- ما انا قلت لفخامتك ده شعب نمرود . مالهم هما لما حنكوشية التثقيف تتقلب وتبقى حنكوشية الرقص والراقاصات وتصرف الملاين بتاعة الثقافه على المهرجانات والإحتفاليات اللى بتلم علينا خلق الله من كل مكان , مالهم هما لما حنكوشية المسموع والمرئى لما تلمع العالم دى وتخلى منهم نجوم مجتمع وسفرا لبلدنا , تلاقى الواحده من دول جايه من بلدهم الشق فى رجلها يستخبى فيه حنش وبعد ما تهز هزتين ولا ترقع لها صوتين فى شريط فجأه تبقى بفضل تلميع الحنكوشيه سفيره لنهابونيا فوق العاده
- بس بردو يا حلموس الفنانين دول فعلاً سفرا للبلد ورافعين راسها فى كل الدول فى الجزيره الام بتاعتنا
- طبعاً فخامتك . . عندك حق , وهما فعلاً يستحقوا الملايين اللى بيهبشوها من جيوبنا , والتثقيف اللى بيثقفوه لولادنا .. هو كان فيه بنت فى البلد بتعرف ترقص إلا لما شافوا الأفلام والكليبات .. ما شاء الله البلد كلها بقت الستات ترقص والرجاله تطبل على قفاها . . وشبابنا اللى كان زى الطُربش ما يعرفش غير البيت والمدرسه والجامع وكانوا دافنين نفسهم بالحيا ..النهارده الشاب من دول يبقى لسه ما طلعش من البيضه ويغازل اجدعها بت بكلام يدوب الحجر , تفتكر فخامتك هو عرف كل الكلام ده منين ؟ مش من الأغانى والأفلام والتمثيليات ؟ شوف بقى لو ما كانتش الحاجات دى موجوده كان هايفضلوا على عماهم . . وكان اللوح منهم يشوف البت وهى متكلفته فى الحجاب – والعياذ بالله – يقولها السلام عليكم يا أختاه , , بدل ما يقولها إيه ( الأساتك ده . اللى ماشى يتك ده ) ويفقعها رمش عين تطب فى دباديبه يقوم مطلع ورقة كراسه ويكتب عقد عرفى وبينا على شقة واحد صاحبى . . مش كل ده بفضل السينما والتليفزيون ؟
- ومش بس كده يا حلموس . . يكفينا فخراً إننا عندنا قمم الغنا والتمثيل والرقص اللى بيجيبوا جوايز من كل حته

- لا ياريس والسياحه كمان اللى روجوها .. مش كل العالم اللى فى دول الجزيره بتاعتنا بييجوا هنا علشان يتفرجوا على حريمنا وهى بترقص ويغرقوهم بالدولارات والسفاريت .. يعنى عمله صعبه يا ريس ماعمالهاش حنكوش التجاره البرانيه وما يعرفش يجيب العمله الصعبه دى ,, هيجيبها منين يعنى وإحنا لا عندنا حاجه نصدرها ولا حاجه نصنعها ونبيعها لغيرنا .. لكن ماشاء الله رقصاتنا بيروحوا ويلفوا الدنيا كلها ويلموا النقوط بكل العملات السهله والصعبه والمعصلجه كمان .. بس فيه حاجه بقى مضيقانى ,, صحيح الناس دول بيجوا ويغرقونا بفلوسهم لكن فى الآخر بيعايرونا ويقولوا علينا بلد رقاصات ,, شفت قلة أصل أكثر من كده .. يجوا يتفرجوا علينا وبعدين يعايرونا ,, وآل إيه كل ساعه والتانيه تلاقيهم عندنا بيتكلموا عن الحب اللى بنتمع بيه منهم وعن الأخوه والوحده القوميه ومش عارف إيه وأبصر إيه وما أدرك إيه .. آل حب آل ,, ؟؟ هى العالم دول مش فاهمين إنهم بيحبوا رقاصتنا والراقصين بتوعهم بيحبونا علشان بييجوا هنا ويتشهروا والناس تعرفهم بعد ما كانوا نكره فى بلدهم
كفايه إن عندنا قمم الغناء والتمثيل والرقص اللى عملوا تاريخ البلد دى , , يا أخى كفايه إن عندنا ( أم طرطوم ) سيدة الغناء النهابونى
- أيوه فخامتك , الناس دول رفعوا راسنا فى كل حته فى العالم . . وآل دول العالم الكبيره بتتفشخر علينا بالصواريخ والنووى واللى مش ننوى ونسيوا إن عندنا صواريخ الغناء والرقاصات الذريات وإذا كان هما عندهم عُلما فإحنا عندنا عَوالِم يهزوا أجدعها شنب على واحده ونص . . فيها إيه لما العالم المبرشطه علينا فى كل حته يضربونا ليل ونهار بالقنابل والطيارات اشى الشبح وإشى العفريت . . طيب ما إحنا ما سيبناهومش فى حالهم وهريناهم غنا ورقص وكله بيدعى عليهم , اللى بتدعى بكليب فى الصحرا مع حصان واللى بتدعى على الروف وتحط النقط على الحروف لا كله كوم واللى قالت لأتخن شنب فيهم ( الصراحه راحه يا روحى إنت ما بتعرفش ) دى كوم لوحدها . . ولا المغنى المعجزه ( حمروش العفش )
- مين حمروش العفش ده .. ؟ طيب عفش ومغنى يركبوا على بعض إزاى ؟
- يا ريس حمروش العفش . . فيه حد ما يعرفوش . ده الجدع اللى كان مكوجى وبعدين طقت فى دماغه يبقى مغنى . اللى بيطلع على المسرح يلعلط وشبه القُلة بتاعة السبوع ده . . طيب شوف بقى العفش ده رغم إنه عفش راح رازع ( قسطائيل ) اللى ناهبه أراضينا لكن ده ولا همه منهم وقالهم ( أنا بكره قسطائيل وأقولها لو أتسأل .. إن شالله أموت قتيل او أخش المعتقل , , وهييييييييييييه ) شوفت فخامتك جهاد أكبر من كده ولا جراءه وشجاعه أكتر من كده , , طيب والله أنا لو مكان قسطائيل دى لأرمى نفسى فى البحر بعد الكلام ده
- يا حلموس الناس دى ما تعرفش رسالة الفن وقيمتها فى بناء الحضارات والتقدم على كل المستويات والبلد اللى ما فيهوش فن لسه عايش فى عصر الكهوف
- أيوه فخامتك صح . . دول ناس مش فاهمه حاجه , فالحين بس يتفشخروا علينا ويقولوا علينا غنم وبهايم ., طيب إيه رأيك فخامتك إن العالم دول هما اللى بهايم وما بيفهموش وإحنا اللى غزلنا برجل حمار وعملنا من الفسيخ شربات , , شوف فخامتك العالم دى صرفت مليارات وأبحاث وتجارب على مدار سنين وسنين علشان آل إيه يطلعوا القمر شفت هبل أكتر من كده . . طيب شوف إحنا بقى ., وإحنا قاعدين فى بيوتنا القمر جه لحد عندنا من غير ما نصرف ولا شلحوح واحد .,
- مش شايف إنها واسعه شوية دى يا حلموس ؟ , , قمر إيه اللى جه لحد عندنا ؟؟
- أيوه يا ريس جه لحد عندنا . . هو فخامتك ما سمعتش المغنيه اللى قالت ( ياما القمر على الباب نور قناديله , , ياما أرد الباب ولا اناديله ) شوفت بقى فخامتك أهو القمر جه على الباب وبيخبط عليها كمان . . لا وإيه وبتتنك عليه وعايزه تكرشه وتسك الباب فى وشه . . شفت بقى فخامتك إحنا انصح منهم قد إيه ..

{ 7 }
إنت جايبنى فين يا معفن


وصلت بنا أقدامنا الى منطقة من المناطق اللى بيقولوا عليها عشوائيات وما ان داست رجلينا أول الشارع وقابلتنا ريحة المجارى المعطنه وأكوام الزباله المعتقه وجميع انواع الحشرات ما ظهر منها وما بطن ما عرفناه وما لم نعرفه , منها ما هو يمشى على بطنه ومنها ما يمشى على أرجل ومنها ما هو طائر وده طبعاً غير الحفر اللى مليانه بمية المجارى واللى لو وقع فيها فيل ما يظهرش تانى
و إتفزع فخامته من هول المناظر اللى شافها وأخرج منديل من جيبه وحطه على مناخيره وهو بيصرخ ويقول

- إيه ده . .؟ إيه القرف ده .. ؟ إنت جايبنى فين يا جربوع يا معفن ..؟
- لا مؤاخذه فخامتك , أنا ما جبتكش هنا . . ده إحنا رجلينا اللى وصلتنا لحد هنا
- إحنا فين طيب . . إنت جايبنى الخرابه دى ليه ؟
- لا مؤاخذه فخامتك دى مش خرابه .. دى منطقة ( الدوعيكه ) حته فى قلب نهابونيا لسه ما خرجناش من حدود بلدنا
- معقوله . , ؟ معقوله يكون فيه منطقه فى بلدى زى دى ؟ إستحاله يكون فيه ناس عايشين هنا ؟
- لا فخامتك . . فيه ناس كتير قوى عايشين هنا , ويتمنوا إنهم يكملوا بقية حياتهم هنا , لأن ما لهمش متوى غير هنا
وفجأة هجم علينا مجموعة عيال من سن 4 سنين وإنت طالع, وهدومهم مقطعه ووشوشهم معفره ومطينه والجلخ على جسمهم بالكيلو وطبعاً اول ما شافوا نظافة فخامته وهدومه اللى بتبرق . وشافوا عفانه حضرتى وزاكتتى السينيه اللى أصغر رقعه فيها شبرين فكرونى أنى من منطقتهم وإنى صايد صيده علشان أقلبها وأهبش السفاريت اللى فى جيبه طبعاً إتلموا حولينا وعايزين يقلبونا إحنا ويطلعوا منا بأى مصلحه , قمت لقيت فرع شجره صغير طحت وراهم بيه وأخيراً قدرت أفرقهم وفى نفس الوقت خدنا ديلنا فى سنانا وطلعنا نجرى قبل ما يروحوا يلموا علينا أهاليهم , , وأخيراً خرجنا من المنطقه دى وشمينا نفسنا وشال فخامته المنديل من على مناخيره وزعق فيا
- إنت أكيد كنت عايز تموتنى . , إنت عميل ومتآمر . . وجايبنى هنا فى منطقة السفاحين دول علشان يغتالونى . . ؟
- فخامتك أغتالك إيه بس . ؟ هو انا أستجرى ؟ وبعدين أنا لو متآمر ولا عايز أغتالك فخامتك والعياذ بالله أنا كنت سيبتك وسط العيال دول وجريت وساعتها تأكد أنه بكره كنا هاندور على رئيس تانى . . بعد الشر عليك طبعاً
- أمال يا جربوع يا معفن جايبنى هنا ليه ؟
-فخامتك هى مش دى بردوا حته من بلدك ؟ وفخامتك قلت لى انا عايز أشوف اللى ما شفتوش ؟ فأنا وريتك اللى عمرك ما شفته ولا هاتشوفه حتى فى كوابيس فخامتك
هدى شوية فخامته بع ما شاف رنة الصدق فى كلامى وبعد طبعاً ما بنطلونى إتبل للمره التانيه النهارده وقالى فخامته
- إنت قلت لى المنطقه دى إسمها إيه ؟
- إسمها ( الدوعيكه ) يا فخامتك
- الدوعيكه , , ؟ متهيألى سمعت الإسم ده قبل كده ؟
- أيوه فخامتك أكيد سمعته بس ما شفتهوش . . ما هى دى المنطقه اللى السنه اللى فاتت وقعت عليها صخره من الجبل وبططت الناس فى بيوتها وراحوا فى شربة ميه يا ولداه . ومن ساعتها بقى إسمها الدوعيكه على أساس أن الناس إندعكت فيها
- أيوه أيوه إفتكرت . . مساكين . حد قالهم يسكنوا تحت الجبل ؟ بس مش الحكومه صرفت لهم تعويضات وجابت لهم مساكن تانيه يسكنوا فيها ؟
- أيوه طبعاً فخامتك وبفضل توجيهات عظمتك الحكومه كلها إتحركت وجت هنا من اول سكرتير اول الحى لحد مأمور قسم الدوعيكه . و السيد الأستاذ الدكتور الوزير عمدة المقاطعه أمر بصرف تعويضات فوريه للمدعوكين والمدعوكات . 500 سفروت للمصاب و 1000 سفروت للى إتكل على الله وبلغ فرار من الدنيا دى . وطبعاً كل ده بفضل توجيهات فخاماتك أما بقى عن المساكن الظاهر إن الناس المعفنه دى غاويه عفانه وفقر وما رضيوش يسيبوا الشقوق اللى عايشين فيها دى ويروحوا على المساكن الجميله اللى الحكومه عملتهالهم وطبعاً الحكومه كتر خيرها عملت اللى عليها بفضل توجيهات فخامتك لكن هما اللى ولاد هرمه وواخدين على العفانه فالحكومه إضطرت طبعاً إنها توزع الشقق دى على المحاسيب والقرايب والحبايب علشان ما تفضلش فاضية والعفاريت تسكن فيها
- بس إيه اشكال العيال دى . ؟ دول زى ما يكونوا ساكنين فى حفر فى قلب الأرض . ؟ شفت الطينه عليهم قد إيه . ؟
- ما هو مافيش ميه هنا علشان يستحموا فخامتك . . الحكومه رفضت توصلهم ميه وكهربا علشان تجبرهم إنهم يسيبوا المنطقه المعفنه دى ويروحوا يسكنوا فى مناطق تانيه نظيفه . علشان كده فخامتك هما ما بيستحموش
- الله . . طيب لما هو ما فيش عندهم ميه ؟ طيب البرك والمستنقعات اللى ماليه الشوارع دى جت منين ؟
- ما هى دى مية المجارى يا ريس . . أصل المنطقه دى حواليها مناطق تانية نظيفة وهاى لايف والناس اللى عايشين فيها بيستحموا كل يوم وطبعاً لازم يصرفوا مية المجارى . . طيب هايصرفوها فين غير هنا فخامتك ؟

{ 8 }
وفيه ناس تانيه لسانها طويل بردو

أذن علينا العصر وإحنا فى منطقه على أطراف الدوعيكه فقال لى فخامته
- إيه يا أبو حلموس ؟ إنت مش بتصلى ولا إيه . ؟ ما تيجى نصلى العصر فى الجامع اللى هناك ده ؟
- لا طبعاً بصلى فخامتك وكل حاجه . أمال هادعى على المفتريين إزاى ؟ . . بس الله يكرمك بلاش نصلى فى الجامع ده وتعالى سعادتك نصلى فى جامع تانى برا المنطقه دى

- أما أمرك عجيب يا بنى آدم إنت . . هى مش كلها بيوت ربنا ؟ والصلا فيها جائز ؟
- أيوه فخامتك . . بس الله يكرمك بلاش الجامع ده ونشوف جامع تانى يليق بفخامتك
- يليق إيه وبتاع إيه . ؟ هو أنا هاصلى ولا هاعمل عيد ميلاد ؟ وبعدين أنا شايف الناس ماليه الجامع اهوه وعمالين يدخلوا ويصلوا . . إشمعنى إحنا بقى اللى مش هانصلى هنا ؟ أيه الموضوع بالظبط
- هاقول لفخامتك وامرى لله . . فخامتك الجامع ده أصله بتاع ناس من الجماعه اللى ذقونهم طويله ومش بس ذقونهم هى اللى طويله ده لسانهم كمان طويل وما بيبطلش لت وعجن . وبعدين هما كل يوم ما بين العصر والمغرب بيقولوا درس من الدروس علشان كده الجامع مليان على تمة عينه
- طيب وماله ؟ شئ كويس . نخش ونسمع هايقولوا إيه . . ده حتى أنا مركب ذقن أهه ولابس جلبايه وعبايه . يعنى شبههم ومش هافرق عنهم وما حدش هايعرفنى فى وسطهم
- ما هى دى الكارثه ؟
- كارثة إيه يا جربوع إنت . ؟ كارثه إنى مركب ذقن ؟
- ما تآخذنيش فخامتك وإذا عرف السبب بطل العجب . . بقى فخامتك الشيوخ اللى هنا وبيقولوا الدروس لسانهم طويل حبتين وبيقولوا كلام مش بيعجب الحكومه فخامتك علشان كده فى الأيام اللى فيها دروس زى دى بتلاقى الجامع مرشق ناس بس فخامتك نصهم جايين علشان يصلوا ويسمعوا الدرس والنص التانى من عسس إدارة العصا لمن عصى . علشان لو الكلام اللى بيقوله الشيخ ما عجبهمش كل إنكشارى وهو خارج يسحب واحد من المصلين دول من قفاه . وفخامتك لو لفينا ورا الجامع هتلاقى عربيات ( العسس المتمركز ) واقفه ورا الجامع مستنيه تعبى وتروح تفضى فى إدارة العصى لمن عصا . . طبعاً ممكن فخامتك لو دخلنا نصلى هنا وذقن فخامتك طويله كده وييجى الشيخ على الحظ يقول النهارده كلام مش ولابد . يقوموا يفكرو فخامتك إنك منهم ولا مؤاخذه يعنى فى الكلمه . ياخدوك معاهم
- ياخدونى إزاى يا جعر وأنا رئيس البلد ؟ . إنت إتهبلت فى مخك ولا إيه ؟
- فخامتك ما تزعلش منى . هما يعنى يعرفوا منين أن فخامتك هو فخامتك ؟ وفخامتك متنكر كده , وعلى ما تثبت لهم بقى فخامتك أنك فخامتك . . يكون اللى حصل حصل . , وربنا ما يوريك اللى ممكن يحصل من الناس دول
- أه صح عندك حق يا جربوع . . هما هايعرفوا منين انى الريس ؟ إلا إذا كشفت عن نفسى وساعتها بردوا مش هاسلم . . ما أنا لو فلت من إدين العسس والإنكشاريه مش هافلت من أمات ذقون دول . حكم هما بيحقدوا عليا ولو شافونى هايقرقشونى . ما شفتش عملوا إيه فى الريس اللى قبلى ؟ ناس قلوبهم سوده وكلها إرهاب
- شفت بقى فخامتك أنا خايف عليك قد إيه ؟
- خلاص يا عم ؟ إنت هاتعمل فيها شهيد الواجب ؟ . . بس لازم الناس دى خطيره جداً وبتدبر حاجه لقلب نظام الحكم أو تحريض الناس على الثورة والعصيان وشق عصا الطاعه على الحاكم والتآمر على وحدة البلد والتفرقة بين عنصرى الأمه وإثارة الرأى العام
- ما هى دى التهم بردو اللى بيوجهوها للى بيقع فى إيديهم بس بصراحه هما ما لهومش دعوه بالحاجات دى خالص . . كل ما فى الأمر أنهم بيحرموا على الناس عيشتهم ويقولوا ده حرام وده حرام لكن مالهمش دعوه بالسياسه . . تخيل فخامتك دايرين يقولوا للناس آل إيه الخمره حرام والنسوان اللى ماشيه فى الشارع لابسه من غير هدوم حرام والإختلاط بين البنات والشباب فى سن المراهقه حرام والرقص حرام والغنا حرام حرموا علينا كل حاجه . ده حتى فوايد البنوك اللى شيخ الشيوخ أعلن بكل صوت عالى إنها حلال طبعاً علشان يحافظ على البنوك من الكساد حسب تعليمات الحكومه الرشيده يقوموا هما يقولولك فوائد البنوك ربا والربا حرام ..
- طيب هما لما مالهومش دعوه بالسياسه أمال إدارة العصا لمن عصى مدبآهم ليه ؟
- يا ريس ما هما بردوا لسانهم ما بيبطلش لت وعجن . . يعنى ينفع مثلاً إن ( شيخ الشيوخ ) اللى ماشى فى ظل الحكومه وبيسمع كلامها فى كل حاجه ومطيع وزى الفل , ينفع يقول على حاجه حلال وهما يقولوا عليها حرام ؟ طيب ما شيخ الشيوخ ربنا يكرمه قالك إن النقاب عاده وربنا يقطعها دى عاده وهزأ البت المعفنه ام شكل وحش اللى كانت لابسه النقاب . ينفع لما شيخ الشيوخ يقول كده يقوموا يقولوا إنه غلطان وبيحارب الحجاب . . ينفع لما شيخ الشيوخ يسكت عن مصانع الخمور اللى الدوله بتكسب منها علشان تطفحنا اللقمه بالسم الهارى وكمان يسكت عن القرى السياحية اللى مليانه نسوان ورجاله عريانين زلط ملط من كتر الحر يا ولداه مش طايقين هدومهم علشان الدوله تنشط السياحه اللى بتدخلنا العمله الصعبه . ينفع هما يقولوا إن ده حرام ولازم الدوله تاخد موقف من كده , ينفع لما التليفزيون ليل ونهار بيحارب الحجاب فى كل حاجه وفى أفلامه ومسلسلاته وبرامجه . وحتى رؤساء الجامعات يمنعوا البت اللى لابسه نقاب إنها تدخل الجامعه لكن يسيبوا البت المتربيه بنت الناس النظيفه اللى لابسه المينى جيب واللى من غير جيب والمحزق والملزق ينفع لما شيخ الشيوخ يسيب ده كله ما يتكلمش فيه ينفع هما يقولوا لأ ده حرام ويحرضوا الناس على الحجاب والإحتشام . . . طبعاً فخامتك ما ينفعش . . بس بينى وبين فخامتك حكومة فخامتك ناصحه قوى
- ناصحه إزاى يعنى . . ؟ هى ليه ما تقصفش عمرهم وتقلعهم من جدورهم طالما ماشيين يحرضوا الناس على العصيان ومخالفة شيخ الشيوخ الراجل اللى ما بتنيش كلمه للحكومه واللى ماشى فى طوعها ..
- فخامتك خلى بالك إحنا دلوقتى فى عصر السما المفتوحه والأخبار بتتنقل بسرعة البرق . وعدم المؤاخذه الدش النهارده بقى بتمن 2 كيلوا لحمه يعنى العربجى مركب دش على الزريبه اللى عايش فيها وبيشوف الدنيا كلها
- يعنى إيه مش فاهم . . ؟ إيه دخل ده بأن الحكومه سيباهم وما يتقفشهومش إلا لما يعيبوا فى السلطه والنظام ويحرضوا على المظاهرات والعصيان ؟
- يا فخامة الرئيس انا قصدى أن الدنيا بقت مفتوحه والحاجه اللى بتحصل فى حوش بيت فى بلدنا بعدها بدقايق بتكون واصله للعالم كله . . وبعدين الجماعه بتوع دولة ( انتيكا ) عاملين فيها زعيم العالم ومش سايبنا فى حالنا آل عمالين يقولوا عندنا كبت للحريات وقصف للأقلام وتزوير للإنتخابات وحبس وتعذيب ومش عارف إيه ؟ يعنى حاطين عينهم علينا . . قوووووم الحكومه تعمل إيه .؟ الحكومه سابتهم يتكلموا براحتهم وإبقوا قابلونى لو حد عبركم , وفى نفس الوقت حاطه عنيها عليهم لو شطوا فى الكلام تقطم رقابتهم والتهم جاهزة يا ريس وأوول سايز -. . يعنى حبتين عماله على شوية تآمر على كام شهاده أنهم بيتلقوا تمويل من الخارج لزعزعة الإستقرار . تقوم تلمهم وإبقوا بقى حلنى على ما يعرفوا يثبتوا غير كده . ؟ وحتى لو المحاكم حكمت ببرائتهم تقوم حنكوشية التأديب العليا تلمهم تانى علشان فيه قانون طوارئ فى البلد وتخفيهم فى اماكن ما حدش يعرف عنها حاجه وما فيش مانع إنهم يستخدموا الإعلام بتاعهم إنهم يشنعوا عليهم ويقولوا أصل الشيخ فلان هرب مع البت فلانه وراح فى بلد تانيه علشان يتجوزها , ولا علان هربان من حكم نفقه لمراته اللى دوخته فى المحاكم وما فيش مانع يجيبوا واحده لابسه نقاب تقول إنها مراته – هو حد شايف حاجه بقى - وتقعد تدعى عليه ليل ونهار وإنها ياما نصحته لإنه يتوب ويرجع عن طريق الدين اللى ماشى فيه ده ويمشى فى طريق الحكومه لكن ما فيش فايده .

{ 9 }
حكايتك إيه يا جدع إنت

مشينا كتير وتعبنا من كتر المشى ومش عارف فخامته قدر يمشى كل ده إزاى .. الظاهر القعده فى قلعة الرئاسه واكل الوز والبط بتقوى الصحه وترم العضم , وماله لما نقر عليه شويه طبعاً كان نفسى القعده تطول أكتر من كده علشان أقوله كل اللى فى قلبى . . بس فخامته قالى

- يلا بينا نرجع على القهوة يا حلموس . . علشان انا سايب العربية بتاعتى وراها
- أمرك يا فخامة الرئيس , إنت تأمر
وخرجنا للشارع الرئيسى علشان نوقف تاكسى وطبعاً ولا تاكسى راضى يقف لنا حكم شكلنا ما يشجعش أى سواق تاكسى . . سواقين الاجره النهارده بينقوا زباينهم وإحنا شكلنا مريب . . واحد مربى ذقنه ولابس عبايه مغطيه نص وشه والتانى شكله عامل زى اللى هربان من مجاعه . . قام فخامته زقنى لورا وقالى

- إبعد إنت شويه بشكلك ده ما فيش ولا تاكسى هايقف لنا
المهم قعد فخامته يشاور لتاكسى وفين وفين لحد ما واحد وقف له وسأله هو رايح فين فقاله على المكان فقال له السواق

- طيب حضرتك هاتدفع كام
- يعنى إيه يا بنى آدم هادفع كام . . ؟ هى مقاوله ولا إيه ؟

- جرى إيه يا حضرة ؟ هو إنت اول مره تركب تاكسى ولا إيه ؟
- إنت مالك اول مره ولا عاشر مره ؟ أنا عايز أفهم , إنت مش عندك عداد فى العربيه بتحاسب بيه الناس ؟
- ها ها ها ها ها ها .. عداد إيه يا حضرة ؟ , ما نجيلكش فى عداد .. لا مؤاخذه بقى من الآخر العداد بايظ وأنا هاخد منك فى المشوار ده أربع برايز وأبقى كارمك كمان
- كل الدوشه دى على أربع برايز ؟. . مش البريزه دى يعنى عشر شلاليح ؟
- ها ها ها ها . .عشر شلاليح إيه يا عمونا ؟ إنت باين عليك يا حضرة مش من البلد دى ؟ البريزه عدم المؤاخذه أم شلاليح دى كانت زمان أيام التاكسى أبو منافله . لكن دلوقتى البريزه يعنى 10 سفاريت يعنى يا حضرت هاخد منك أربعين سفروت
- إيه . . ؟ أربعين سفروت على المشوار اللى ما ياخدش عشر دقايق ده . ؟ إنت حرامى ونصاب .. هات رخصك وإنزلى هنا .؟
- رخص إيه يا حضرة . . ؟ هو إحنا هنلاقيها من إنكشارية الطريق ولا من الزباين كمان ؟ والله عاجب حضرتك تدفع أهلاً وسهلاً مش عاجبك شوف حد غيرى ؟ وأدى ذقنى لو خد منك أقل من 50 سفروت فى التوصيله دى .. مش كفايه هارجع فاضى ؟
حسيت إن الجو إتكهرب فميلت على فخامته ووشوشته وقلت له
- فخامتك هو ده النظام اللى ماشى فى البلد . . وبالطريقه دى لا مؤاخذه هاتكشف نفسك
- بس دى سرقه عينى عينك
- مشى حالك .. ودارى على شمعتك تقيد
المهم فخامته كظم غيظه وركبنا التاكسى والسواق لسه عمال يضحك ويلقح بالكلام على زباين آخر زمن اللى مش عارفين البريزه من الشلاليح واللى ما بيعرفوش يركبوا تاكسيات واللى مالهومش غير الدعكه فى الباصات فقال له فخامته
- إنت عمال تبرطم تقول إيه . ؟ يعنى إنت حرامى ونصاب ومش عاجبك كمان
- يا حضرة أنا لا حرامى ولا نصاب . . إنت مفكر يعنى إن الفلوس دى كلها بتدخل جيبى . ما انا كل يوم ربنا يوعدنى بإنكشارى من بتوع الطريق ولازم أأبجه علشان ما يرزنيع مخالفه على أى حاجه والسلام . . غير لا مؤاخذه كل شوية حنكوش الولعه بيغلى الولعه علينا يعنى العربية اللى كانت بتفول بعشرين سفروت النهارده مش أقل من خمسين ستين سفروت علشان تفول . . ده غير الميكانيكيه وهبشهم

المهم وصلنا للقهوة وقلت لفخامته
- لسه فخامتك مش عايز تشرب ولا تاكل حاجه ؟
- مش كفايه الشاى اللى كان هايجيب أجلى .. المهم سيبك من الشرب والأكل , أنا لازم أمشى بقى . . بس قبل ما أمشى عايز أعرف إنت مين بالظبط
- . . ما أنا قلت لفخامتك إنى أبو حلموس المتعوس . واحد غلبان من دولة فخامتك
- ما انا عارف يا جربوع إنك أبو زفت الطين , وإنك جربوع من جرابيع البلد .. بس إسلوبك وطريقتك ما لهاش علاقه بشكلك ومظهرك . . إنت إسلوبك اسلوب واحد متعلم ومثقف وفاهم . . إوعى يغرك إنى سكت على تعليقاتك وتفكر إنى ما فهمتش إنت عايز تقول إيه من وراها . ؟ لا أنا فاهمها كويس بس سيبتك علشان تطلع اللى جواك . علشان كده رغم إن منظرك يقرف الكلب الأعور الحزين لكن إسلوبك وطريقتك تدل على واحد مثقف وفاهم كويس هو بيقول إيه
- أكيد طبعاً يا ريس إنك لماح وتفهمها وهى طايره . . أنا يا فخامة الرئيس إنسان عادى بس الزمن شقلب لى حالى , وحكايتى حكاية طويله ما ينفعش أقولها لفخامتك على الواقف كده . . وأنا طبعاً شايف إنك مشغول وعايز تروح ؟
- فعلاً أنا عايز أروح لكن فعلاً أنا مشتاق أعرف حكايتك . . لكن سيبها للظروف , بس بجد أنا إستفدت كتير من قعدتى معاك النهارده , , ومصير الحى يتلاقى وأعرف أكافأك على ده . . ودلوقتى أسيبك
مشى فخامته وإختفى من قدامى وكأنه كان حلم وولى , , ورجعت أنا وقعدت على القهوة مسهم وفى دنيا غير الدنيا وبفكر على الطريقه اللى هايكافئنى بيها فخامته
يا ترى هاتكون اللومان ولا إقطاعية العصى لمن عصى


,,,,,,,,,,,,,,,,,,,,,,,,,,,,,,


وأخيراً إخوانى وصلنا إلى نهاية تلك الرحلة الطويله رغم أنها لم تستغرق سوى ساعات قليله
أشكر لكم حسن متابعتكم لها
وإنتظرونى قريباً إن شاء الله فى الجزء الثانى
والأن نفتح باب النقاش فى الاحداث التى واكبت تلك الرحلة لمن يريد النقاش فيها