خيبه الامل الكبيرة.......و الهزيمه المستحقه

بعد اذنك يا خالد انا غيرت العنوان بتاعك....لانى بصراحه مش لاقى حاجه اقولها

علامه تعجب طولها 2 متر و عرضها متر و نص نطت ف نفوخى و انا بتفرج ع الماتش........ايه ده يا جدعان؟؟؟مين اللى بيلعبوا دول...؟؟هم دول اللى لعبوا ادام انترناسيونال ف 2006 و عملوا ماتش عالمى و خسرنا 2-1 بس انا يوميها كنت فرحان جدا بفرقتى...هم دول؟؟؟و لا انا مش لابس النضارة....و لا انا بتفرج على فرقه تانيه لابسه فانله حمراء و خلاص؟؟؟ اللاعبين كلهم مش ف المستوى خااااالص....امير مهزوووووووز جدا...و شادى اسوا واحد ف الماتش كله ووائل مش مركز اطلاقا و ابو تريكه تايه و فلافيو حيران مش عارف يعمل ايه......معقول من اول الشوط التانى لنهايه الماتش(يعنى 75 دقيقه)ما اشوفش و لا هجمه فيها معنى كره القدم......و ايه التخاذل ده...حتى لما كنا متقدمين 2-1 اللاعيبه بتلعب بحنيه و بيتمشوا ف الملعب...يا حلاوة....و حتى جوزيه تغييراته كلها عيزه ضرب النار...الاول يغير احمد حسن...ماشى و بعدها ينزل سيد معوض....و ماله...انا قلت بقى يعمل جبهه مع جيلبرتو لان الوينج اليمين بتاع باتشوكا اللى نزل ف الشوط التانى عدى من جيلبرتو كتير و الشغل كله كان من ناحيته.......و قلت كمان ممكن يسقط جلبرتو ارتكاز تالت يقوم يطلع جلبرتو بعدها؟؟؟؟؟؟؟ مش فاهم و ينزل حسين ياسر اللى ما شافش الكورة من بعد ما نزل الا مرتين!!!........ ما حصلش ف تاريخ النادى الاهلى كله يبقى كسبان 2-0 و يخسر 4-2 ما حصلتش ابدا.......دا انا امبارح قعدت اعمل سيرش و اقرا ف التقارير بتاع ماتشات باتشوكا و تحليل لاعيبتها.....و عرفت ان الحارس بتاعهم ضعيف و ان كل ماتش تقريبا بيدخل فيهم جون ف اخر 10 دقايق...بس النهارده لقيت العكس....الاهلى متهاون بدرجه لاتوصف...كانهم جايين يشتروا تليفزيونات سونى و يروحوا مصر تانى.....عموما احنا نستحق الهزيمه و انا بقولها كان ممكن نتغلب 6 و اعتقد ان جوزيه و اللاعيبه كلهم يتحملوا المسؤوليه.......للاسف الماتش ده مسح كل اللى الاهلى عمله السنه دى من انتصارات باستيكه... و مش استيكه اى كلام.....دى استيكه ميلان كمان....لان الهزيمه كانت مخزيه جداااااااااا

و للى عايز يعرف يا جماعه...ماتش الاهلى الجاى ع المركز الخامس يوم الاربعاء ان شاء الله الساعه 9 و نص الصبح

قال مانويل جوزيه المدير الفني للأهلي إن فريقه لايزال يفتقر إلى خبرة البطولات الدولية وأن اللاعبين فشلوا في تحمل الضغط العصبي في الشوط الثاني من الخسارة 4-2 أمام باتشوكا المكسيكي في كأس العالم للأندية.

وقال المدرب البرتغالي في المؤتمر الصحفي الذي أعقب اللقاء صباح السبت: "على الرغم من فوز الفريق بعدد من البطولات الإفريقية، فإننا لانزال نفتقد نضج المشاركة في البطولات الدولية الكبرى".

وأضاف "لم يستطع اللاعبون التعامل مع الضغط العصبي في الشوط الثاني بسبب رغبتهم في الحفاظ على التقدم بهدفين".

وتابع "الخطأ الأكبر كان في السماح لهم بتسجيل الهدف الأول في مرمانا مبكرا في الشوط الثاني وهو ما تسبب في تحويل إيقاع المباراة لصالحهم حتى نهاية اللقاء".

وأنهى الأهلي الشوط الأول متقدما بهدفين نظيفين من توقيع فوستو بينتو مدافع باتشوكا في مرماه وفلافيو أمادو من تسديدة من مدى قريب.

ومع بداية الشوط الثاني، انتفض باتشوكا ليسجل هدفين متتاليين مع نهاية الوقت الأصلي ثم هدف في كل شوط من الفترتين الإضافيتين ليتأهل إلى نصف نهائي البطولة.




وأكد جوزيه أنه بنى خطته في الشوط الأول على اللعب على تضييق المساحات على لاعبي الفريق المكسيكي ثم اللعب على الهجمات المرتدة وهو ما أتى بثماره.

ولكنه قال: "على الرغم من تقدمنا بهدفين، فإننا لم نقدم مستوانا المعهود حتى في الشوط الأول".

واعترف جوزيه أن فريقه يعاني من أخطاء دفاعية واضحة كان ثمنها أربعة أهداف في شباكه إضافة إلى الإرهاق الشديد الذي أصاب اللاعبين مع نهاية المباراة.

وأشاد جوزيه كثيرا بفريق باتشوكا، مؤكدا أنه حقق فوزا مستحقا وكان الأفضل على مدار اللقاء.

وأضاف "تمتع باتشوكا بدرجة عالية من ثبات المستوى طوال المباراة، وحتى اللاعبين الاحتياطيين الذين دخلوا اللقاء كانوا على مستوى الأساسيين".

ازاى فرقه كسبانه 3 بطولات قاريه ف 4 سنين تفتقر للخيرة يا عم جوزيه؟؟؟؟؟؟
no comment
واضح انه مش لاقى حاجه يقولها

هههههههههههههههههههههههه

مبروووووووووووووووووووك


يا مصطفى


يا فرحتك يا نبيه

و انت فرحان يا فرج......طيب
ما علينا....
عموما باتشوكا مش زى بترول اسيوط

بليز يا شباب إن كان حد فرحان إن الأهلي إتغلب أو بيقول مبروك زي أحمد فرج فعادي جدا ً و بقوله الله يبارك فيك .
بس ممكن نفتكر الأهلي كان بيلاعب مين بطل أمريكا الشماليه و بطل المكسيك إلي نظمت كاس العالم مرتين و عضو دائم في كاس العالم ( يعني يفرق كتير عن بطل اسيوط ) الأهلي صعد البطوله دي بعد ماغلب الفريق إلي غلب ديناموز هراري بتاع زيمبابوي إلي غلب الزمالك عادي جداً كل الفرق بتتغلب ( بس بصوره طبيعيه مش كل متش ) يعني من ألخر هناك فرق .
و على العموم الكوره مش حتخسرنا بعض حبيبي يا فرج يا زملكاوي :affraid: .

Mostafa ElShirbeny كتب:بعد اذنك يا خالد انا غيرت العنوان بتاعك....لانى بصراحه مش لاقى حاجه اقولها

ولا يهمك يا صاصو

يا خالد و لا حرام و لا حاجه....ببساطه:لكل مجتهد نصيب....و احنا لعبنا شوط واحد...و باتشوكا يستحق الفوز الف مرة لانهم لموا بعض و لعبوا برجوله و حماس و قدروا يكسبوك بكل سهوله....و انا شخصيا اتمنى ان باتشوكا يصعد النهائى......و بالاداء بتاع الاهلى النهارده يبقى كفايه عليه يلعب ع الخامس .........خلينا واقعيين

mahma 7asal elahly fe elyapan we elzamalek fe 7elwan

لو فيه حاجه ممكن تتكتب ع الماتش الرهيييييييييييييب اللي شوفته الصبح كنت كتبت بس انا بجد مش عارفه اتكلم ده ماكنش ماتش دي كانت مهزله انا كنت بجد يا جماعه هتشل لا انا اتشليت فعلا بعيد عن التعصب ده ماكنش ماتش ماكنش في لاعيب بيلعب في الماتش
حد يقولي يا جماعه كان فيه ايه؟
ايه اللي حصل؟
حد يقولي ليه؟ حد يقولي ليه؟
كانوا بيعملوا ايه في الماتش؟ بيتمشوا طب ياريت كانوا عملوا منظر
ولا كوره شراب طب ايه اللي كانوا بيلعبوه ده؟
ولا الكورتين اللي كانوا في اخر الشوط التاني وقولت ربنا كان معانا فيهم

خلاص كده لحسن انا اعصابي تعبانه جداااااااااااااااا
لكل مجتهد نصيب واحنا ماكناش في الماتش خاااااالص
اللاعيبه لسه هنا ماسفروش اليابان حتى

للأسف شكل عصر الأهلي انتهى
على فكرة أنا اهلاوي

مهما حصل الاهلي فووووووووووووووووق الجميع
والضربه اللي ممكن توجعنا بعد كده بتقوينا
واحنا عمر عصرنا ما هينتهي
الاهلي وبس علطوووووووووووووووووووووووول
زي ما طول عمره مفرحنا ومخلينا مبسوطين زي مااحنا هنقف جنبه لحد ما يبقى زي الاول

الاهلي فوق الكل وفوق الجميــــــــــــــع وان وقع وقعه لا يمكن ابدا يضيــــــــــــــــــــــع

ايه الحماس ده يا رنا.....خلاص بقى...استنوا بطوله الامارات السنه الجايه و عليكوا خير

والله العظيم انا روحت البيت وانا حاطه وشى فى الارض000
اصل انا صاحيه من الفجر ومصحيه البيت كله 000 طبعا الاهلى فى اليابان
واتجمعنا عند عمى الصبح بدرى علشان نتفرج 00وخلاص باه الشوط الاول معقول وكسبانين 2-0 يعنى تقريبا ضمنا الماتش
المهم كان عندى سكشن الساعه 8 000قلت كفايه كده الساعه 8ونص اقوم اروح الجامعه وخلاص مش مشكله النتيجه 2-1 عادى الاهلويه هيلعبوا كويس0
استنى ابويا يكلمنى يقولى ان الماتش خلص واحنا كسبنا 00ما اتصلش
قلت اتصل انا 000المهم كلمته حوالى اربع مرات وهو يقفل فى وشى000قلت خلاص اكلم ابن عمى
اول ما قولت الو ها الاهلى عمل ايه 000لقيته بيقولى بس بلا اهلى بلا نيله خليكى فى اللى انتى فيه احسن000مصدقتش طب ايه اللى حصل 000يقولى مفيش كل الحكايه اتغلبنا 4-2
والله ما صدقت انت بتتكلم جد واحلف فيه 000والاخر اتاكدت
والله انا ماكونتش عارفه اعمل ايه
حسيت انه جتلى حاله بلاهه ولا مباله
عالعموم حصل خير000وقدر الله وما شاء فعل

يا جماعه انتوا مكبرين الموضوع...ببساطه احنا ما لعبناش عشان نكسب.....و مفيش فرقه ف العالم فوق الهزيمه.....عادى .....ريال مدريد مثلا ف الدورى الاسبانى مغلوب 4 ماتشات لحد دلوقتى.....و بعدين ما تنسوش ان باتشوكا كان ماتش حياه او موت بالنسبه لهم ...مش معقول تانى سنه يشتركوا ع التوالى و يخرجوا من اول ماتش.....و كمان حسيت ان لاعيبه الاهلى اتاثرت بالضجه الاعلاميه زى ما حصل ف 2005 بالظبط.........حصل خير يا جماعه و عادى جدا...ما تزعلوش نفسكوا......نركز ف الدورى التعبان بتاعنا احسن

واحنا مهما كنا زعلانين مش لازم ننسى الاهلى فرحنا كام مرة ف اخر 5 سنين يا جماعه..... صحيح انا زعلان جدا من جوزيه بس برضه مدرب ممتاز مهما حصل.....متهيالى لو انا كنت المدرب النهارده كنا لعبنا احسن من كده على فكرة :D

ههههههههههههههه
طب تصدقى......لو انا كنت مدرب الفرقه النهارده بجد كنا هنلعب احسن من كده.....الاسلوب غلط و التغييرين التانى و التالت قمه الغلط.....هو نفسه كان قاعد مش عارف يعمل ايه.....متهيالى كان عنده افضل من كده بكتير بس خانه التوفيق ف بعض الحاجات...و بعدين انا دماغى شغاله ف تكتيك الكورة كويس و الحمد لله :)

يا عينى عليك يا مصطفى
احنا طبعا واثقين انك ممكن تدرب الاهلى احسن من جوزيه
ههههههههه

هههههههههههه
مش موضوع احسن من جوزيه بس النهارده بالذات كان ممكن ابقى احسن منه.....و بعدين جربوا كده........هتعرفوا ان دماغى كلها لاعيبه بتجرى ورا بعض :D