المواقف الاستهباليه فى الحياة الطبية

من طرف dega الخميس أكتوبر 01, 2009 1:15 am

كنوع من الفضفضة
كلنا طبعا حصل معاه مواقف كتيير من اياها سواء اتخرج واشتغل او لسه طالب وبيجوا يصحوه في نص الليل علشان يعمل حاجة لسة متعلمهاش
يركب كانيولا
يدي حقنه
يركب قسطرة
يشيل قسطرة

المهم المواقف الاستهبالية دي بتحصل مع الكل
حبيت اقولكم شوية مواقف استهبالية كدة حصلت معايا وانا بزاول الناس قصدي طبعا بزاول الطب مع الناس انا هاحكي الموقف وانتوا علقوا والي عندوا المزيد يمتعنا

الموقف الاستهبالي الاول:

وانا قاعد (نايم قصدي ) في السكن فوق بتاع مركز الكيلو 4 في مطروح الساعة تلاتة الفجر في عز البرد والشتا (بقولك مطروح )الجرس ضرب بمعني ان فيه حالة في الاستهبال
قمت لبست البالطو ونزلت اخبط في الحيطة واتدحرج على السلم
لقيت راجل عجوز نايم على سرير الكشف
يا فتاح يا عليم شكله كدة ام اي ولا ايه بس الراجل لوحده ليه ؟
السلام عليكم خير يا حاج الف سلامة عليك ؟
الله يسلمك يا دكتور
مالك ياحاج سلامتك ياوالدي؟
انا يادكتور (ويسكت شوية وياخد نفس عميق ) انا
حاسس كدة اني هاصدع

ايه يا عم الحاج ؟

حاسس اني هاصدع فقلت اجي لحضرتك تشوفلي حاجة للصداع

ابتسامة تجمع بين المرح والغل والبرادة والشلل وكل حاجة لو في ابتسامة كدة رسمتها على سحنتي

طب يا حاج حضرتك ساكن فين ؟

في العمارة الي جنب المركز على طول يابني

ماشي يا حاج لما تصدع -كفا الله الشر -ابقى تعالى ونشوف ان شاء الله هنعمل ايه للصداع

الموقف الاستهبالي الثاني

في يناير الي فات راجع من الشغل زي الساعة واحدة بعد منتصف الليل (تلامة من الدكتور الي جاي يستلم والله ) المهم راجع خلصان وبعد خلصان بشوية مشفتش مراتي وابني بقالي يوم كامل 24 ساعة
المهم مصدقت دخلت البيت وخلعت الجذمه والدنيا بره ايه عواصف واعاصير وسيول
الموبايل بيرن
دا ماجد (صديق دراسة من ايام اعدادي وبقي محاسب )
السلام عليكم ازيك يا ابوحبيبة
ازيك يا دكتور صحتك عاملة اية؟
الحمد لله؟ خير يا ماجد في حاجة ولا ايه ؟
ايوا يا عماد والله البنت تعبانه جدا
لا حول ولا قوة الا بالله مالها ؟
مش عارف كدا فجأة في حاجة غريبة ظهرت في رقبتها وعماله ترجع
حاجة غريبة ازاي يعني ؟
مش عارف حاجة حمرا كدة وشكلها يخوف
ظهرت فجأة كدة يعني ؟
انا مشفتهاش الا دلوقت ومامتها بتقول مكانتش موجودة قبل كدة
طب يا ماجد هي سخنة ولا حاجة ولا لونها ازرق
لا لا مافيش حاجة من دي
وبترضع كويس وصدرها مش بخروش ولا حاجة؟
لا
طب انا بكرة ان شاء الله وانا راجع من الشغل هعدي عليك اشوفها
لا ياعماد لو مش هتيجي دلوقت انا هروح بيها للدكتور
دكتور ايه يبني ؟ الجو وحش جدا وانا شايف ان مفيش حاجة خطيرة يعني تستاهل تطلعها في الوقت دا
انت اصلك مشفتش رقبتها عامله ازاي
خلاص يا ماجد انا جاي
في الواحدة والنصف في الشتا والبرد بعد يوم مايعلم بيه الا ربنا اروح لماجد ماشي حوالي كيلو ونص
علشان الاقي البنت بتقشط بعد الرضاعة (هو بيقول بترجع) والفولدز بتاعة رقبتها محمرة شوية علشان القشط بيجي عليها ومابيتمسحش كويس!!!!

الموقف الاستهبالي الثالث:
في المستشفى الي انا شغال فيها في ميامي قبل الفجر بشوية اذ بسيارة فاخرة ينزل منها شاب في غاية الاناقة والشياكة
لو سمحت انا كنت عاوز دكتور يجي معايا البيت
خير؟
ابدا المدام تعبانة شوية؟
طب لحظة واحدة
اجهز الشنطة بتاعة الزيارات واتوكل على الله
(بصراحة العربية البي ام دي خطيرة قوي )
وانا راكب معاة قلت ادردش شوية اخد فكرة عن الحالة يعني

هو المدام بتشتكي من اية ؟
والله يا دكتور انا معرفش بالظبط هما اتصلوا بيه وقالولي هات دكتور
يعني انت اخر مرة شفتها كويسة من اد ايه؟
انا بقالي فترة مش فالبيت وعامل معاها كلاش من فترة
بس الموضوع اننا كنا متفقين ان مفيش حمل دلوقتي فاهم حاجة انا عاوز اعرف هي حامل ولا ايه؟
الله المستعان

تتوقف السيارة امام بيت تحت التشطيب مظلم
ونصعد السلم المظلم الغير ممهد الي الطابق الوحيد المأهول والاخير
(غريبة جدا العربية مش ماشية ابدا مع البيت )
يضرب الجرس
الباب يفتح وتطل فتاة شابة يبدوا انها لم تكن على استعداد كاف لاستقبال غرباء
الدكتور معايا
اتفضل يا دكتور
شقة ليست بالمتسعة ومستوى نظافتها على سيء من الاهمال والاثاث يشبه الي حد كبير اثاث شقق المصيفين
يعني كنبة كدة وكرس كدة وتلفزيون على الارض في الصالة وكدة يعني
وهناك حوالي ستة او سبعة فتيات في سن متقارب (ويبدوا ان جميعهم لم يكن مستعدا لاستقبال اغراب ) وامرأة كبيرة ينادونها ب يماما
المهم (االمدام بتاعة البية ) نايمة بلبس خروج على سرير سفري كدة السفنج ده ويعني قال مغمى عليها
خير يا مدام ؟
انا يا تشكتشور اخدت شريط برشام
شريط ايه ؟
دا (ابيمول اكسترا )
كان كامل؟
لأ كان فيه حوالي نصه
من امتى ؟
من حوالي ساعتين تلاتة كدة
طب ماشي
(ضغط ونبض وحرارة ) ..... شغال
لا الف سلامة عليكي يا مدام
انا يا دكتور البريود مجاتليش الشهر دا
متأخره بقالها ادية يعني ؟
حوالي اسبوع كدة
طب يريت تبقي تحللي الصبح في المعمل

خير يا دكتور حامل؟
(بجفاء )ان شاء الله التحليل يبن ؟
ثم (بجفاء اكبر ) استأزن بقى علشان الحق الصلاة؟

اه اتفضل يا دكتور اتفضل
وعندما وصلنا الي العربية اذ برجل ليث غضنفر ينحني على صاحب السيارة : هو حضرتك كنت فين يا باشا
انا كنت فوق
اه فوق عند مين يعني؟
(وهو يبتعد بالسيارة ) عند ام محمود!!!!!!!!

لم اتمالك نفسي ان سألته : هو حضرتك شغال ايه؟
بنظرة زباله زيه ... انا ملازم شرطة !!!!!!!

ونكمل بعدين ان شاء الله