بنت و ولد

هذا الموضوع كوميدي و مش عاوزين حد يقلبه سياسة.. و هذا الموضوع يحتوي على حقائق بدون تزييف لكن قد يكون بمبالغة أحيانا .. و ليس بالضرورة ان تكون كل النقاط قاعدة عامة على الجميع و لكنها موجودة.


- مميزات انك تكوني بنت:

1- هتقدري تذاكري خمس و ست ساعات متواصل .. و ده هيعتبر العادي بالنسبالك ..
تيجي تاني يوم تقولي دانا انا ما ذاكرتش امبارح كويس .. يادوب ذاكرت شوية صغيرين و بعدين زهقت فبطلت.
ما هو لازم تزهقي .. ما هو بعد خمس ساعات قعدة على الكرسي دا انتي يجيلك كساح مش زهقان بس.

2- بتقعدي في بيتكوا سنيورة يا خواتي و تستني لما ابن الحلال ييجي يخبط .. و يا تقبلي يا ماتقبليش ..

3- بحكم الذوق بتقعدي في المواصلات (تقريبا كان زمان قبل الحاج ذوق ما يموت).

4- خبيرة في المسكنة و المحن و الكهن (دي كلمات اعجمية لم استدل لها على معنى بس بسمعها) .. و بتعرفي تاخدي حقك بيهم تالت و متلت.

5- هتعرفي تاخدي حقك من الرجالة كويس .. لان غالبا الرجالة هيتحاشوا انهم يخشوا في شجار مع انثى .. لانهم هيتبهدلوا و يتضربوا و يتحبسوا حتى لو كانوا على حق و حتى لو كانوا فعلا فعلا ما عملوش حاجة .. انك بنت ده لوحده سلاح ..

6- لو ليكي في اللوع .. تقدري تسبتي اجدعها راجل .. بحركة كدة بنظرة كدة .. كل مصالحك و طلباتك و اوراقك و امتحاناتك تمام التمام بقدرة قادر ..

7- بتعرفي تعيطي بسهولة .. و ده علاج بسيط كدة لكل الضغوط العصبية .. و عشان كدة هتعيشي اكتر من الراجل .. و هتورثيه لما يموت ان شاء الله و هتاخدي معاشه كمان.

8- بعد الطلاق ليكي مؤخر و نفقة و متعة .. يعني هتخربي بيته.

9- لما بتعوزي حاجة بتعمليها .. مفيش حاجة بتحطيها في دماغك الا و تتنفذ .. و ربنا يسترها من كيد النسا.

10- ليكي اجازة وضع .. و ليكي ساعة رضاعة في وقت العمل ..



- عيوب انك تكوني بنت:

1- انتي الغلبانة علطول .. لو ليكي اخ ولد بيبقى فرعون في البيت .. و ممكن يلعب بيكي كورة شراب !

2- شغل البيت كله على راسك .. عشان 99.99 من الرجالة ملهمش في شغل البيت.

3- حمل و خلفه و بس يا واد هس يا بت .. و طبعا جوزك ملوش دعوة بكل ده ..

4- المعاكسات و قلة ادب الولاد.

5- دايما بتلاقي الناس مستقلة بيكي عشان بنت .. و كأنك بكدة تبقي ناقصة دراع و لا رجل.

6- لما تتجوزي بتلاقي سي السيد حاسس ان هو عارف كل حاجة و انتي لا .. و لازم تحسسيه بكدة لا يزعل .. هيقرفك بعنده و عقدة الراجل اللي جواه.

7- هتفضلي شاغلة نفسك من يوم ما تتولدي .. ليل و نهار .. صيف و شتا .. انك تفضلي حلوة .. مش عارف ايه عشان الشعر .. و ايه عشان البشرة .. و ليه كل ده !! .. له في ذلك حكم !

8- هتلاقي دايما عندك عقدة (التسوق) .. و ده مرض وراثي في الستات بشكل عام .. لما تعدي على اي محل هتلاقي عينك راحت نحيته لوحدها .. ده رفليكس .. و ممكن يستهلك كل فلوسك باستمرار.

9- ساعة لما تتخني شوية .. و لا تكبري في السن شوية .. و لا تتلخمي في المطبخ و العيال شوية .. تلاقي الكلام الحلو راح .. و تلاقي جوزك ما بيقعدش في البيت كتير .. و يبدأ الوسواس يطلع في دماغك .. و تتعقدي .. و تتكلكعي .. و تقعدي تبصي لنفسك في المراية .. و تفتكري ايام زمان .. يا عيني عليكي.

10- انتي رومانسية و عاطفية (بالفطرة) و ده بيكون ليه توابع سيئة في اوقات كتير .. لان غالبا هتلاقي اللي يستغل ده .. هتلاقي اخوكي يستغل طيبتك و حنيتك و يخليكي تنضفي اوضته و تغسلي هدومه و تكويها و تلمعي جذمه و في الاخر هيطردك من الاوضة! و هتلاقي الراجل اللي يحسسك انه فارس احلامك و هو معندوش غير حمار و هتلاقي جوزك اللي يفضل يغازل فيكي بس عشان تعمليله اكلة معينة هو بيحبها.



- مميزات انك تكون ولد:

1- باشا .. خروج براحتك .. تأخير براحتك .. عايش بلطجي كدة.

2- واكل شارب نايم من غير ما تعمل حاجة .. زي ما تكون وريث العرش.

3- بتتعلم من الحياة اكتر بكتير من البنت بحكم احتكاكك الاكتر بالشارع و الناس.

4- عقلك بيستمر في النضج لمراحل بعد ما يكون عقل البنت توقف عند مرحلة معينة و شطب .. فماتضايقش اذا حسيت في مرحلة من مراحل عمرك انك غبي او اهبل .. اصبر .. هييجي الوقت اللي هتبقى فيه عاقل و زي الفل.

5- معندكش سن يأس زي الستات !

6- الشرع مخلي نصيبك في الميراث ضعف نصيب البنت .. بس ما تقلقش .. بنت تانية (مراتك) هتاخد ده !

7- المجتمع مش بيحاسبك على اخطاءك .. باعتبارها حق مكتسب ليك كراجل!

8- دماغك في العلالي .. ممكن الدنيا تتشال و تتهبد حواليك و انت مفيش اي مشاكل خالص .. المشاكل و الفسافس اللي في الدنيا دي اخرها اكلة محترمة و تروح تنام و كل حاجة تهون.

9- ممكن تذاكر الربع ساعة اللي بين الشوطين .. و لا الاعلان اللي في وسط الفيلم .. و تنجح برضه .. لا و كمان ممكن تجيب مجموع .. يعني تروح تلعب كام ماتش كورة و تيجي البيت تاخد دش و تاكل و تفتح الكتاب او ما تفتحوش و تروح الامتحان تكتب وجهة نظرك و بتنجح .. و لحد دلوقتي محدش عارف ده بيحصل ازاي .. يمكن الحاسة السابعة!

10- مش شاغل نفسك طول النهار و بتدور على حقوقك (زي ما المرأة بتدور على حقوقها) .. انت راجل عاقل .. و ما بتشغلش نفسك بمنافسة الستات في الشغل عشان عارف حدود امكانياتك !.. و ما بتشغلش نفسك فلان عمل و فلا سوى .. ما دام اكلت و شبعت و مليت التنك هتعوز ايه تاني من الدنيا الفانية دي!


- عيوب انك تكون ولد:

1- اي مشوار او مصلحة ساعدتك اللي هتروح تقضيها .. انتي اشتغلي ايه .. سواقه!

2- لو فيه اي مشكلة او خناقة .. هتلاقي انت اللي لابس فيها بوشك يا معلم.

3- لما تيجي تتجوز هتلاقي قنبلة اتفجرت في وشك اسمها الشقة و الفرش و الشبكة و المهر .. يعني تعمل حسابك كدة في بنك صغنتت على اول الشارع تروح تسرقه انت و واحد صاحبك و تقسموا فلوسه و تروحوا تتجوزا بيها.

4- طبعا لما تبقى راجل البيت انت اللي عليك الفلوس .. و هات هات .. و المرة اللي تقولك خد .. هتلاقيها بتديك لستة الطلبات!

5- لو ليك في رسم نفسك .. تروح الجيم تكبر البايات تلاقي الترابيس نامت .. تكبر الترابيس تلاقي المجانص نامت .. تشد بطنك تلاقي رجليك سابت .. و سنتك مش فايتة !

6- هتقرع بدري من كتر الجيل .. و ممكن يجيلك تسمم لو من الناس اللي بتاكله بالغلط (ماقصدش الصعايدة)!

7- معظم الوقت مش بيكون معاك فلوس .. ليه بقى؟ لانك مسرف .. هم الولاد كدة ما يعرفوش يحتكموا على فلوس .. دايما تلاقي فلوسهم بتاكلهم .. لو ما جابش بيها اكل (غالبا) هيجيب بيها كورة و لا بلاي ستيشن .. او هيجيب تيشيرت عجبه و لا ساعة شافها.

8- غالبا بما انك ولد هتبقى متشلفط .. كام غرزة هنا من خناقة .. على كام كسر من الكورة .. على كام بطحة لان الولاد هواة نط من على اي سور و شعلقة في اي حاجة .. و كأنك كنت فدائي متعذب في معتقل الاعداء!

9- عندك نقطة ضعف جامدة .. الا و هي البنات .. تبقى متنرفز و متضايق و لازم تتخانق .. لما تلاقي صاحبة المشكلة بنت .. تهداااااااااااا .. و تبقى ريلاكس و حنين كدة .. و تظهر عندك سمات التعاطف و الرحمة و التسامح و العفو .. حصل خير .. مفيش حاجة !!

10- دمك بيتحرق كتير و ما بتعرفش تعبر عن ده .. فبتكتم في نفسك .. و نتيجة ده بيجيلك ضغط .. و جلطة .. و بواسير!



- مراحل حياتك لما تكوني بنت:

1- الطفولة المبكرة: غالبا مش بيكون ليكي خطة في الحياة في الوقت ده .. لان باباكي و مامتك هم اللي بيخططولك كل حاجة .. و غالبا اخوكي بيبوظ الخطط دي!
كل لعبك عرايس .. سبحان الله ..

2- الطفولة المتأخرة: عاوزة تبقي عروسة .. و مش عارف ليه .. تقريبا عاجبك الفستان الابيض!
عاوزة تطبخي مع انك لاتفقهي شئ في الطبيخ .. بس عاوزة تبقي طباخة ماهرة و خلاص .. جينات تقريباً ..
عاوزة تبقي ولد .. لانك شايفة انك مضطهدة دايما .. و اخوي الولد واخد كل الامتيازات.
عاوزة تكبري عشان تتحرري من القيود اللي عليكي في البيت ..

3- المراهقة: فارس الاحلام و الحصان الابيض.
بتبدأي تحسي بذاتك الانثوية الدفينة و تفتكري نفسك ست .. و تبدأي تتعاملي في الحياة من هذا المنطلق.
عاوزة تكبري بسرعة جدا و تخلصي من المرحلة الرخمة دي اللي شكلك اتغير فيها .. و مزاجك مش مظبوط .. و طلعلك حب الشباب.
عاوزة تبقي مذيعة او ممثلة!

4- بعد المراهقة: بيكون النضج الذهني وصل مستويات مرتفعة .. بتبدأ النظرة للحياة بشكل موضوعي اكتر.
لسة فارس الاحلام يشغل حيز كبير من التفكير .. عاوزة اتجوز يا ناس !.. انا صبرت كتير بقى !
عاوزة تسبتي نفسك في الوجود و تقولي انا اهوه .. انا كويسة جدا و ذكية جدا و شاطورة جدا.
عاوزة تشتغلي سفيرة مثلا او وزيرة خارجية .. شغلانة مهمة كدة و خلاص.
عاوزة ترجعي عيلة تاني!!

5- اواخر العشرينات و اوائل التلاتينات: بتكوني وصلتي لمرحلة استقرار ذهني و عاطفي.
شايفة الدنيا بمنظور يعتمد على حياتك قبل كدة .. يا اسود .. يا ابيض .. بس غالبا بتكون عرفتي الدنيا ماشية ازاي و عندك خبرة في الحياة.
غالبا بتكوني متجوزة و جارة وراكي عيل و لا اتنين .. و عرفتي اخرة مستقبلك !
احلامك انك تكوني مذيعة او سفيرة تلاشت .. و بقى شغلك كموظفة الصبح و في البيت بعد الضهر هو كل ما يشغل بالك.
خططلك المستقبلية غالبا بتكون عن تغيير الانترية او انك تجيبي تلاجة جديدة 12 قدم ب3 بيبان زي بنت خالتك الي جوزها شغال في السعودية !
بتبقي ضاربة الحياة صارمة قديمة .. و مش همك حد .. اصل بعد الجواز و العيال مابقاش فيه حاجة تخوف!

6- من الاربعينات للستينات: يلا حسن الختام!
عاوزة بقى تروحي تحجي عشان تكفري عن اللي عملتيه في دنيتك قبل كدة .. اصلك افتريتي كتير.
عاوزة تشوفي عيالك متجوزين و متهنيين في بيوتهم.
عاوزة تعملي اي حاجة في مرات ابنك .. ليه؟ .. كدة و خلاص ..!


- مراحل حياتك لما تكون ولد:

1- الطفولة المبكرة (و احتمال و انت في بطن امك): الاذية !! .. مؤذي كدة و خلاص .. استمتاع .. غلاسة .. وراثة .. ما تعرفش .. هو كدة و خلاص .. تأذي امك و تطلع عينيها .. تأذي اختك .. سواء اكبر منك او اصغر منك .. عايش بلطجة على خلق الله و كأن مفيش غيرك في الدنيا يا اخي.
عاوز تشتري حصنة و مسدسات و عاملي فيها ابو زيد و لا سفاح كرموز و انت قد العقلة !
مش عارف ايه غيتك في اللعب في الشارع والخناق و ركوب العجل و عمل المقالب في الناس !

2- الطفولة المتأخرة: تقريبا مفيش .. هو خبط لزق من الطفولة للشيخوخة ! الحاجات اللي في النص بتعدي عليها تخاطيف !
بتطلعلك فسفوسة في دماغك كدة اسمها انك راجل .. يعني تؤمر تطاع .. يعني الكل يسمع كلامك .. و مش عارف العدوى دي بتجيلك منين.
هاري نفسك كورة و كأنك مولود بيها .. يابني ارحم نفسك .. دا انت رجليك بقت كلها مطبات من كتر اللعب على الاسفلت. و تسيب الكورة في الشارع تروح تلعب كورة على البلاي ستيشن! دي غباوة دي و لا مرض!
عايش كدة (مطلوق) داخل طالع و كأنها وكالة من غير بواب .. كل اللي بتعمله في حياتك انك بتلعب و تاكل و تنام .. و مقتنع بشدة ان ده دورك في الحياة !

3- المراهقة: تزايد مفاجئ في الغباوة !
تصحى الصبح تلاقي نفسك طولت نص متر .. و صوتك بقى و لا الضفدع الدكر في موسم التزاوج !
بتبقى شبه الحقنة اللي طالع منه صوت قد كدة ما تعرفش طالع ازاي ..
حب الشباب مبهدلك و كأن مفيش شاب غيرك !
تبدأ بقى مرحلة الجيل .. و تسرح شعرك يجي خمسين مرة في اليوم .. و تغير هدومك تلاتين مرة .. و تلف في الشوارع على امل ان بنت معدية تبص عليك ان شالله باحتقار !
هتكون معجب باحد المطربين .. و بكام واحد من لعيبة الكورة .. و معجب بكل الفنانات الاحياء منهم و الاموات !
مزاج عندك التزويغ من المدرسة .. وبتحترف نط السور .. و ممكن تجرب السجاير ..
ما بتتفرجش في التليفزيون غير عشان تشوف المزز اللي في الافلام و الاعلانات .. باقي الحاجات اللي في الفيلم زي القصة و الحوار و الحبكة الدرامية و المغزى كل ده حشو ملوش لازمة !
تبدأ تظهر الجرايد و المجلات الصفرا بتاعة فتاة المعادي اللي عملت ايه .. و حاططلك تحت صورة واحدة بالمايوة .. و الصورة دي اصلا من النت لواحدة قاعدة على البحر في انجلترا !
فسفوسة الرجولة اللي كانت طلعتك تكبر اكتر و تبقى جعلوصة و مستني حد يدوسلك عليها عشان تتخانق .. طبعا راجل اومال .. انت مش شايف الريش .. قصدي الشعر .. اللي طالع كل شعراية في ناحية في دقنه !
دي مرحلة الغباوة و قلة الادب المطلقة في حياة اي راجل ..

4- الرجولة: و دي غالبا بتكون بعد سنة الخمسة و العشرين .. بيبدأ يشوف الدنيا بشكل متزن و بعقلانية .. مخلفات المراهقة بتكون راحت من عنده و بيفكر بعقله بشكل اكبر ..
هتبدأ تفكر ازاي تتجوز .. دي شغلانة ما يعلم بيها اللي ربنا .. بس بتبقى مقتنع ان مشوار الدشليون ميل بيبدأ بخطوة .. عشان كدة انت مش هتاخد الخطوة دي !
بتبقى بتشتغل و مسار حياتك بقى في اتجاه معين .. و شايف طريقك ماشي انهي ناحية ..
لما تتجوز بقى بتحس انك كدة كملت نص دينك .. مش عارف انها هتطير النص اللي عندك بعد كدة ..
بتبقى مشغول بيها شوية في الاول .. بس بعد كدة بتبقى عادي .. شخص متعود عليه معاك في البيت .. و لان معاك عيال فمش فاضي تقعد معاها .. و هي شكلها اصلا مابقاش يشجع انك تقعد معاها او تكلمها ..
بتبدأ تطلع همك في الازازة .. ازازة الحاجة الساقعة و انت سهران مع صحابك في اي قهوة ..!
من البيت للشغل .. و من الشغل للقهوة .. راجل مستقيم ..!
و تستمر في هذا الحياة حتى .. ..

5- الشيخوخة: بتحصل عملية بعث جديدة .. و تتعاد حياتك من اول و جديد .. اوقات تحس بطفولتك .. و اوقات تحس بمراهقتك .. و اوقات تحس بشبابك .. و اوقات تحس بوجع الروماتيزم في مفاصلك !
خلاص بقى بتبقى رضيت بحياتك و قسمتك و نصيبك ..
بيعاد البعث في العلاقة بينك و بين مراتك .. بيظهر حب من نوع جديد .. حاجة كدة اكبر من حب زمان و اكبر من العشرة و التعود .. و انما خلاص بتبقوا زي العملة .. مفيش وش يعرف يسيب التاني و لا يتخيل حياته من غيره ..
بتحاول تستمتع بالوقت الفاضل من حياتك ..
ممكن لو مراتك كانت ماتت - و غالبا بيحصل العكس – فممكن تروح تدورلك على واحدة حلوة و صغيرة كدة .. و تبدأ مرحلة الحبة الزرقا !


طبعا الكلام ده كله يحتمل ان يجانبه الصواب او الخطأ ..
و طبعا كل واحد مخلوق بالخلقة الانسب ليه ..
و انما ده سرد لملاحظات .. قد تكون غير دقيقة ..




lol