(( زمان كنا بنحبِك ))

من طرف dr_khaled السبت سبتمبر 12, 2009 9:53 am

زمان كنا بنحبِّك
لما كنا واخدين الحب غية
كل اللي نشوفه نحبه
مش مهم الأسباب ايه هيا
وعملنا حبك وعشقك
في كل حتة أغنية
(مشافش الرجال)
و(تحيا بلادي) و(تحيا الوطنية)
دلوقتي الحب بسبب
ماحنا ف عصر المادية
وايه اللي شُفناه بقى ؟
عشان نحب البلد ديا
شفنا ناس بتموت ف البحر
كانت راجعة م السعودية
اشتغلت وتعبت وغرقت
ذنبهم جابوا سبحة وبطانية
شفنا الجبل بيقع على دماغنا
عشانها منطقة عشوائية
شفنا القطر بيتحرق
والعمر بيتسرق
من قدام عينك وعينيا
شفت طوابير على لقمة
زمان سموها لقمة هنية
كنا زمان بنحبِّك
لما كنا واخدين الحب غية
كل اللي نشوفه نحبه
مش مهم الأسباب ايه هيا
شفنا وشفنا .. ومن خوفنا
سكتنا زي الحرامية
شفنا ضرب وتعذيب وحرق
في الأقسام البوليسية
شفنا قطن كنا بنصدره
بنستورده م البلاد الأجنبية
شفنا ماية صفرا مسممة
العيب فيها ولا في الحنفية ؟
شفت دنيا غير دنيا زمان
لما كان الخير بيجري
في عروق كل المصراوية
كنا زمان بنحبِّك
لما كنا واخدين الحب غية
كل اللي نشوفه نحبه
مش مهم الأسباب ايه هيا
شفنا مصالح: ادفع تمشي
مدفعتش اقف للسنة الجاية
شفنا راجل نايم في شارع
ملوش بيت ولا حتى دية
بيلعن حظه انه عايش
امال فين حقوقه الطبيعية ؟!
شفنا كتير وقلوبنا اتكسرت ..
شفنا ظلم وقسوة وجرح
وصوت مبحوح طالع م السمسمية
غني يا صالح غني يا صفوت
وانتي قومي ارقصي يا صفية
غنوا وقولوا ..
كنا زمان بنحبِّك
لما كنا واخدين الحب غية
كل اللي نشوفه نحبه
مش مهم الأسباب ايه هيا
ولإمتى بس هنفضل نحبك ؟
وانتي مفكيش ذرة حنية
-------------