أوهااام الحب الأول....((متجدد))

بسم الله الرحمن الرحيم



الحب.. .ياسلام


كلمه جميله...تلفت النظر...وأكيد له معانى كتيييييير


بس النهارده حا نتكلم عن النوع اللى محيرالكل


ايوه.. ..


افتحواقلوبكم....وكمان عقولكم...وتعالوا..يا أجمل أعضاء منتدى


حاسس انى عاوز أقول لكم كلام لأنى خايف عليكم قوى


يمكن علشان بأفكر فى اخويا...وأبص له...وأقول


يا ترى لو كبر...حا يشوف الحب ازاى؟؟؟

بالفطره




....ربنا خلقنا كده...


هو يميل الى هى


وهى تميل الى هو


هى....فى أحلام يقظتها فارس نبيل....وسيم. ..طويل...يأتى على الحصان الابيض


هو فى أحلام يقظته فتاة جميله. ..كالقمر..رقيقه....رشيقه...رائعه...يسير معها على شاطىءالبحر


عادى ...من حقك تحلم....هو حد يقدر يسجن خياله!!


هو حد يقدر يفرمل أحلامه!!دى ماشيه لوحدها...مش بارادتنا


شىء مش بايدك...بس فى ايدك حاجات تانيه.....لازم تعرفها كويس


لأننا فعلا ممكن نغير أحلامنا...ونشكلها ..صح





أول النار. ..شراره




فى حفله...أو فرح...أو فى الكليه...أو فى الشارع....لأ دى من العيله...يعنى بنت عمى....أو بنت خالى..


كان حنفى شراره... ..فى نفس المكان.....


شافته..أو شافها.....لمحه واحده بس...((أول نظره))


والله ملتزم.. ..حتى هى محجبه.. ...ومابصتش تانى....


غضت بصرها...وغض بصره......بس هو الاختلاط


أمال ايه الحكايه


الله...انتوا ما تعرفوش انه كان مستنى اللحظه دى!!وقاعد من زمااااااااااااااااان يترقبها!


هو مين!!.......حا تعرفوه لوحدكوا


طبعها بالكربون...لأ...حلاهاأكتر و أكتر....


واستخدم مؤثرات صوتيه(( حبيبى يا نورالعين يا ساكن خيالى ))


وكمان صورهافيلم((فيديو كليب....))


لأ....حتى نجوم الليل و القمر...والهوا اللطيف اللى بيسلم علينا كل ليله...ويلمس خدودنا علشان نحس بنعمةربنا علينا.....خلاه يحس انه من عندها!!





وبعدين


ورسم على الشجره قلبه و قلبها
وغنى لعيونها و هو ما يعرفش حتى ايه شكلها
وسرح مع موج البحر رسم على الرمله قلبه و قلبها
وحول حياته لمقبره أيوه. ...مقبره....بس مقبره شكلها من بره حلو قوى
مدفون فيها وقت...وعمر.....وعمل....وقلب مجروح و بينزف ....واحتمال فى أى لحظه


يموت

غسيل مخ


عمله غسيل مخ.. ...خلاه ينام...يحلم بيها...وعمل له مونتاج. ..وركب صورة وشها على جسم ((فتحيه بلاطه)) و هى بتغنى فى أغنيتها الاخيره. ..
وصورته على وش الموديل اللى كان معاها. .....فبقى كل يوم بيعيش أغنيه
((كذابه ))
...وحلم ((كذاب)). ...
خلاة يحس ان هو اللى بيغنى... ..وانها بتسمع كلام الاغنيه منه. ..وكان فرحان قوى....وهيمان.....وفجأه تحول حنفى الى انسان كسول .. مجروح....حزين...
وكل ده اخراج.....المخرج..
((شيطان ناجح جدا ))
عرفتوه بقى



طب...طب....ليه عمل فيه كده؟؟وايه الفايده. ..؟؟وليه بقى حزين...وما فضلش سعيد ليه؟؟
تعالوا معاى...علشان تعرفوا ليه بقى فى الاخر حزين




الاول
ما اسمهوش الحب الاول .. ...سيبكم من كلام الاغانى و المفسديون .....
منهم لله.....حسبنا الله و نعم الوكيل
دى يا ولاداسمها ((الفتنه الاولى)) ....يعنى بيبقى قلبك زى الفل..ولأنك كبرت..واتغيرت...ومشاعرك نضجت....بتحس ان فيه حاجه جديده
الدنيا بقت حلوه . ..وردى...وردى...وردى..وردى.... وردى
وبقت القلوب فى كل مكان....على الكشاكيل ...وميداليات....وعلى الكروت...وسلاسل. .وأساتيك.....وشنط...وهناو هناك . ...


واديله بقى((أغانى أم كلثوم.. ...وعبد الحليم حافظ))
أصلها بتيجى على الجرح. ..وبتساعد فى اقناع العقل بوجود الحلم....مع انه فى الاصل حلم
حد يعذب نفسه بنفسه!!
حد يفضل يشم فى الاكل اللى ريحته واصله من عند الجيران...وهو عارف انه صايم ...ومش حا يأكل الا لما المغرب يأذن!!وكمان ما يقدرش يسرق أكل من حد!!
ما هو أصل الموضوع كده
انت صايم. ..وانت صايمه .. .وماينفعش تشموا ريحه أكل حد
اصبروا على الصيام شويه.....لحد ما أذان المغرب يؤذن...ويأذن الله تعالى
ساعتها حا تفطروا...والاكل...((الحب)) حا يكون طعمه حلو قوى....لأنه
((حلال))....وفى مكانه... .








فكر شويه


يعنى ايه الكلام ده.. . ..
هو انت يا أم البنين ما بتسمعيش ان الحب بعد الجواز مش موجود
وان الخطوبه أجمل فتره فى الحياه
وان...وان...وان


مين اللى قال.....برده...كلام المفسديون. ..فى الحوارات العجيبه.....
هو الحب ورده. ..وقلب. ..وغنوه. ...ونيل و هوا و ميه!!!
لأ....الحب بيتترجم لأفعال ايجابيه....يمكن مش بتشوفوها....البسوا معاى نضارة أم البنين. . ..بالاشعه الفوق المعنويه ...واتفرجوا معايه



نظره جديده

طب قولوا انتم...بلاش أنا
بابا و ماما
طول النهار قدامكم...صح؟؟....فاكرين يوم ما بابا اتأخر...لما كان مسافر ....ماما وقفت ازاى تستناه...رايحه جايه. ...بصيتوا لوشها....شفتوا الخوف. ..والقلق...والفزع...سمعتوا دقات قلبها و هى خايفه.....
ما هو ده الحب....انك تخاف على حبيبك من الخطر..

شفتوا بابا و هو شايل شنطة سفر...ومعاد الطياره بعد ساعه.. .وقلبه بيتقطع و هو بيبوس راس ماما.....وبيمشى و دموعه بتجرى على خده (أول مره تشوف بابا بيعيط)
ما هو ده الحب......انك تكره فراق حبيبك

فاكر لما ماما كانت عيانه....وحرارتها عاليه. ...وبابا واقف فى المطبخ بيعمل الاكل بدالها...وهو راسم على وشه بسمه....بسمة حنان و عطف عليكم...بس مخنوقه...مخنوقه بألم...
ما هو ده الحب برده...انك تتألم لألم الحبيب

شفتى بابا لما مر بظروف صعبه...أد ايه كانت ماما واقفه معاه....واستحملت حاجات كتير...ما هو ده الحب برده...على الحلوه و المره

فاكر لما ماما فضلت واقفه تصحى بابا علشان صلاة الفجر. ...وراسها كانت بتقع....وفضلت لحد ما قام و صلى ....ما هو ده برده الحب.....انك تخاف على حبيبك من نار جهنم((مش تكون سبب فى دخوله نار جهنم... ..))

يبقى الحب...حنان...وموده...ورحمه....موجود جوانا فعلا...مش محتاج أغانى و هباب و فيديو كلاب...حا يطلع حا يطلع. ..
بس لما نسمع كلنا الاأذان

النور
يا سلام....حاجه حلوه انك تعمل حاجه فى النور.
...قدام كل الناس...من غير ما تستخبى
أصلك عارف انك صح...وانت عارفه انك مش بتعملى حاجه غلط.....
أمال مين بيستخبى..((الحرامى ))اللى بيسرق حاجه مش من حقه....
وخايف لأنه غلط فى غلط....حتى أحلامه غلط.....فبيخجل يحكيها
طب....ربنا يعلم ما فى الصدور.......
يا ترى جوه صدرك....ظلام... .واللا نور؟؟
يا رب يبقى نور فى نور
ألا بذكر الله تطمئن القلوب
يعنى أحبس نفسى و أعيش فى تلاجه!!

ما هو الظروف معروفه....ولسه مشوارى طويييييل.
...ولسه على ما أكون نفسى..طب أعمل ايه فى نفسى.....يعنى أعيش فى تلاجه!!
حتى لو حاولت....مش حا أقدر أبقى على طول فى التلاجه
أيوه...عارفه ان المشوار طويل...ويمكن لو عجبتك ((ستوته )) تتخطب و تتجوز و تخلف و انت لسه بتكون نفسك..
يبقى انت فى الحاله دى خسرتها....وخسرت أحلى سنين عمرك لأنك ضيعتها فى أحلام سلبيه...ولا بتودى و لا بتجيب...
قصدى بتجيب سيئات بس ...وبتدبح القلب لما تحس انك خسرت المعركه اللى كنت شايف انها معركة حياه أو موت لقلبك الرقيق.....وبيفضل قلبك مجروح.. .ولو مريت فى حياتك مع زوجتك فى المستقبل بأى مشاكل حا تلاقى شماعه كبيره
انتاج مصانع ((وساويس الشيطان)) ...تعلق عليها كل حاجه
أصلها مش فتاة أحلامى
أصلها مش حبى الاول
وبالمفتاح الكبير بتاع شيطون بيفتح لك الباب الاسود
(((((لو))))))) لو كنت اتجوزت ستوته كنت حا أبقى أسعد
كانت حا تفهمنى
كانت حا تسعدنى
أصله شاف الزواق اللى من بره بس....واللا صحيح...ممكن يكون ما اتكلمش معاها أصلا..ولا عرف شخصيتها.....((معلش أصلى نسيت ان المخرج شيطون طبع الصوره و كمل باقى مسلسل الوهم من عنده))
ودى النهايه يا أصدقائى
بقى حزين... .بعد ما كانت بداية الرحله...قلب بيرقص....ودنيا ايه....فاكرين
وردى...وردى...وردى...

قصدى
بمبى..بمبى..بمبى بمبى
عارفه ان ستوته فيها مميزات كانت عاجباه. ...لكن كل انسان فيه مميزات. ..وعيوب. ...والحب هو نجاح التفاعل الكيميائى بين مكونات الزوج و مكونات الزوجه...مهما كانت المكونات دى....مش شرط تركيبه معينه....
لأن الموده و الرحمه...هى السبب الاساسى فى نجاح التفاعل

خلى عندك بعد نظر

حافظ على قلبك
حافظى على قلبك
ده ما فيش زيه...اوعى حد يكسره...واوعى انت تكون اللى كسرته ...((الله يسامحك))
رفقا..رفقا....حاول تساعده علشان يفضل خام ...وجميل
بطل تشم روائح كذابه...غض بصرك ....وافتكر دايما شكل الحور العين((يا ترى قريت عنهم. .))
وطول ما انت صايم عن المعاصى. ...حا يفضل قلبك سليم...ولما يأذن الله بالحب حا يكون طعمه جميل
وساعتها حا نقول كلنا((صوما مقبولا وافطارا شهيا ))
فكرفى بكره....هنا....وفى الاخره
ما تخليش منظارك أعمى....بيشوف بس تحت رجليه
اللهم آتنا فى الدنيا حسنه و فى الاخرة حسنه
وقنا عذاب النـــــــار

يتبع

تعالوا نرجع للبدايه
بس من عندكم....مش من عندى
افتح قلبك
وافتحى قلبك
سامعين......ايه ده..مين بيصرخ!!
يا ناااااااااااااااااس...يا هووووووووووه
أناعاوز اتكلم...اتفضل...واحنا سامعين




أنا...أنا جوايا حاجات كتير...عاوز أقولها و مش عارف
ساعات بأبقى عاوز أعيط...أيوه أعيط...
وساعات بأبقى محتاج حد يطبطب عليه
وساعات بأحس انى عيل صغير
وساعات باحس انى مقهور...ووحيد...وحزين...ويائس
وساعات بيبقى جوايا طاقه كبييييره..وعاوز أجرى...وأجرى..وأجرى
زى الحصان على شط البحر لحد ما أتعب
وبرده مش مرتاح..طب أعمل ايه

صدى الصوت
حاجه تمام زى الصوت...انت تقول...وهو كمان
انت تعيط..وهو كمان
انت حا تضحك...حا يضحك قوام
صاحبه ..وحاول تفهم قصده...وعاوزايه...علشان خاطره
يعنى ايه؟؟
يعنى حاول تفهم نفسك...ما تفتكرش انك غامض..لا..لا..
الموضوع ساهل....وواضح
الحزن اللى جواك لأنك ناقص....((مش قصدى أهينك...لأ...))
قصدى ان نصك التانى لسه ما ظهرش علشان تكتمل الصوره..وحا يفضل جواك حنين له...رغم انك ما تعرفهوش...وحا تفضل تحلم بيه لحد ما تشوفه...بس ما تخليش الشيطان يمسكك من ايدك اللى بتوجعك...ويدس راسك فى النار...ويملاالفراغ اللى موجود....بوسوسه...وسوء
طب و العياط...والحزن...واليأس...و...و...
عادى جدا.....تفاعل لأنك ببساطه....((انسان))ليك مشاعر و أحاسيس..
ولأنك مامليتش الفراغ بالنور.....علشان تقدر تعيش...وتكمل مشوارك خطوه خطوه...لحد ما توصل..أو يوصل لك...نصك التانى
طب و الحل ايه؟؟
مد ايدك...بسرعه
الله....وضوء.......ميه حلوه و حاجه صافيه
اغسل وشك....واتمضمض...وما تنساش تغسل قلبك
يا اللا قوام...ارفع ايدك...
((الله أكـــــــــبر))
الله....يا رب....اشرح صدرى...يارب...هدى سرى
يارب اغفر لى..وتب على من ذنبى
ربى أتيتك سائلا ...أمنا لنفسى من زمانى
ما كنت أعلم حين سرت على الدروب بما عرانى
أسجد.....و انت لوحدك....وفضفض...واحكى...وادعى براحتك

هه؟؟...خلصت...تقبل الله



وبعد غسيل القلب؟؟

اوعى تكون وياها لوحدك!!!!
هى مين؟؟
نفسك....نفسك الاماره بالسوء......
طب ازاى...؟؟مش هى برده نفسى...وجوه نفسى؟؟
طب أروح منها فين؟؟
هناك..هنااااااااااااك
واقفين....صحبه حلوه....ولمه أحلى
كون معاهم...ودور عليهم.....شم ورده من ايديهم
كل واحد ريحته حلوه....وشكله أحلى..
عارفين ليه....؟؟
لأنه بيحب ربنا....وربنا بيحبه
مش برده اللمه أحلى!


يعنى أتكلم؟؟
لأ...لأ.........مش أى حد تحكى له همك
اوعى تسرب قوام سرك,....ومش كل صاحب حا يحفظ سرك
أنابأتكلم عن احساسنا بوجود الناس...وبوجودهم حوالينا..
اكسر حاجز الوحده..لأنها بتطفى النور....وتملا قلبك غم...وغيوم...وحا تعميك عن طاعة ربك
مش لازم يكون الكلام عنك....بس اتكلم....حا يخف همك
حاول تتأمل...فى الطبيعه...واتكلم
خد راحه...واستراحه....وفى ملكوت الله ...اتعلم


وللحديث بقية....

مبدئيا يعنى الموضوع مش بس حلو هو حلو جدا وكمان اميز حاجه فيه انه بيناقش
الموضوع بطريقه فيها رقى فى الكلام واحترام على غير مااتعودنا فى معظم
المنتديات او المواضيع عموما اللى بتخص الموضوع ده وجذاب للقراءه ماشاء
الله جزى الله صاحبه كل خير لان الاسلوب مشابه لاسلوب الاستاذ مصطفى حسنى
ربنا يكرمه ويحفظه

ازل نقطه احب اعلق عليها هو طبعا ان الحب الاول ده او بمعنى تانى الحب
عموما سواء كان من النوع المتعارف عليه حاليا او حتى الحب فى معناه المطلق
ككلمه فى اللغه وللاسف انه ده شئ يخص النفس ومعروف طبعا ان النفس اماره
بالسوء يعنى بتبقى حاجه مش بإيد الواحد انه يوقفها لكن فى نفس الوقت
المفروض عليه لو ده غلط انه يتحكم فيها او فى تصرفاته ناحيه الموضوع عموما
والا مكانش ربنا سبحانه وتعالى قال (ولا جناح عليكم فيما عرضتم به من خطبة
النساء او اكننتم فى انفسكم علم الله انكم ستذكرونهن او ولكن لا تواعدوهن
سرا الا ان تقولوا قولا معروفا ولا تعزموا عقده النكاح حتى يبلغ الكتاب
اجله واعلموا ان الله يعلم مافى انفسكم فاحذروه واعلموا ان الله غفور
حليم ) صدق الله عز وجل يعنى سبحان الله ربنا سبحانه وتعالى بيقولك فى
الايه علم الله انكم ستذكرونهمن سرا يعنى القران الكريم لم ينكر مثل هذه
الاحاسيس الداخليه للشخص اللى بتبقى بدون اى قصد منه وفى نفس الوقت ان
الله يعلم مافى انفسكم فاحذروه يعنى اى حاجه تيجى من الناحيه دى بلاش منها
مادام لسه مفيش شروط من اللى ربنا قال عليهه اللى هيا زى ولكن لا تواعدوهن
سرا الا ايه ان تقولوا قولا معروفا الاحساس الداخلى تقدر متتحاسبش عليه
لكن اى تصرفات علنى كده دى اكيد تحاسب عليها والايه ماشاء الله بتشرح
نفسها
وعلى فكره زى ماقال دكتور احمد مش لازم الحب اللى بالشكل ده ينتهى بفشل بس
فى نفس الوقت مش لازم تتجاوب معاه لانه فى الحاله دى مش هيبقى حب هيبقى
مجرد تسليه او ملء فراغ او مجرد تقليد اعمى زى مابنشوف
وطول ماالواحد علاقته بربنا كويسه ودايما عنده اخلاص فى العباده وماشى
بمبدأ الاحسان ان تعبد الله كأنك تراه فان لم تكن تراه فهو يراك او الواحد
بياخد مثلا سيدنا يوسف عليه السلام كمثال كيف تغلب على طبيعته وتغلب على
الشيطان هو اه نبى واكيد معصوم من الخطأ بس فى النهايه انسان عشان كده
ربنا قال فى الايه (ولقد همت به وهم بها لولا ان رأى برهان ربه كذلم لنصرف
عنه السوء والفحشاء انه من عبادنا المخلصين )يعنى انهى الايه بالاخلاص
اللى هو اساس اى تعامل فى الحياة
فى النهايه اسفه على التطويل بس الموضوع فعلا بيخلى الواحد يتكلم وجزى الله كل خير صاحب الموضوع وياريت تكمل باقى الأجزاء

بداية شكرا على الردود وبالنسبة لردك يادكتور أحمد انا كلامى كان مركز على حاجة معينة وهى(((حتى لو انت حبيت واحدة وتأكدت ان هذا هو حب حقيقى لايجوز لك بأى حال من الأحوال أن تتكلم معاها وتقول لها بحبك والشيطان مايزين لك ان لو انت ماعملت كدة فى واحد تانى هيعمل كدة وماتبقاش من نصيبك مع ان اللى عنده يقين بالله هيبقى عارف ان هى من الاول كدة مش من نصيبه ودة موافق لرأى الدكتورة سومة ربنا يبارك فيها))) شئ آخر : ((لو انت عايز تبقى معاها طول عمرك ادخل البيت من بابه ولو عايز تتعرف عليها فى حاجة اسمها الخطوبة )) ملحوظة: الشيطان عمره ماهيزين لك فعل خير يعنى عمره ماهيزين لك حب زوجتك هذا والله أعلم دة بيموت لما بيلاقى بيت مسلم قوى .. وجزاك الله خيرا على الرد

وشكرا ليكى يادكتورة سومة.. كلامك صادق جدا وواقعى ..ربنا يرزقك الاخلاص شكرا على المرور الطيب

خد بالك
كل شويه القلب حا يصرخ...وحا يتألم....وحا يتمنى...وحا يتعلم
عرفتوا ليه الاغانى بتفتن....لأن فى الفيديو كليب..الابطال بيحققوا الاحلام اللى انت ما تقدرش تعملها لأنك بتخاف من ربنا....وبتحاول تتقى الله...
وبييجى الشيطان يوهمك....ويخلى عينك تذلك...وتبقى أسير الهوى....ويشل فكرك
وتفضل عايش فى دنيا ((أمانى و أغانى))
يبقى لازم تلاقى البديل....علشان يفشل مخطط الشيطان الرجيم

بس!!
بس ايه.....هو لسه فيه بس!!
أيوه
اتفضلى قولى...اتفضل قول
ايه ده....دموع...يا نهار زى بعضه
((أنا حاسس انى بأحب...وانتم مش مصدقينى))
لا..والله....مش بنكذبك...ولا انت كمان يا أختى
بس الامر مش كده.....واحده...واحده
باحترم مشاعرك..وبأقدرها...
بس اسمحوالى أقفل على القلب شويه.....بالمفتاح..وهاتوا عقولكم
ودلوقتى....عرفت منين انه حب؟؟
* حسيت انى على طول بأفكر فى الطرف التانى....ونفسى أشوفه على طول...ونفسى أسمع صوته....ونفسى أكلمه
_طب تفتكر ليه؟؟
*مش ده المهم....المهم ان الاحساس موجود
_طب ممكن أسأل شويةاسئله...وجاوب عليها لوحدك...علشان تخطط لحياتك

عندك كام سنه؟؟ومعاك كام؟؟امكانياتك ايه ؟؟
2 ما هو تصورك لمدى تحمل و صبر وانتظار الطرف الاخر لك؟؟
3 انت طبعا شايف مميزات الطرف التانى..طب ايه عيوبه؟؟
4 الحب ده بيدفعك للامام...يعنى بيخليك تذاكر و تشتغل أكثر..واللا بيأخرك...وبيسلسل حياتك بالالم
5 يا ترى لو رحت النار على السيئات اللى أخدتها نتيجة حبك...ممكن الطرف التانى يشيلها معاك...واللا حا تكون فى القبر لوحدك؟؟

أكيد
أكيد الاجابه حا تختلف حسب سنك...ودراستك.
ولو كنت معاك شهادتك و امكانياتك مناسبه..وتستطيع تقييم الطرف الاخر اللى عجبك .وتقدر تاخد خطوه ايجابيه فورا...(ما فيش مشكله)
ربنا معاك...ويا ريت تاخد خطوتك...وابقى اعزمنا على فرحك
ولو كنتى أخت خلصتى أو لسه ما خلصتيش دراسه و عندك الشعور ده و من طرف واحد .....أو طرفين((فيه مشكله ...وكلمتين))
لو من طرف واحد...اوعى ترخصى نفسك...وحاولى تكونى حكيمه.وعززى نفسك...واحفظيها ..واصبرى...واحفظى السر فى قلبك...وقيمى الطرف التانى...وما تخليش تفكيرك فيه ياكل كل حياتك..لأنه ممكن ببساطه جدا...ما يشوفكيش

يتبع....

ممكن لو كنتى كبيره و ناضجه بالقدر الكافى...تدخلى طرف تالت...ثقه...يلفت نظره ليك كعروس يخطبها...من غير ما يصرح انه طلبك...
ولو كنت طالب....ومافيش امكانيات...((هى دى المشكله))
مش حا أقول انت لسه صغير...ومش حا أفكرك بدراستك...ومش حا أحسبها بالفلوس..ولا حا أقلل من شعورك...
بس حا أحكى لك تفكيرأى أب لما يلاقيك رايح لبنته
((أنا عارف انه بيحبها...بس يا ترى حا يقدر يخلص و ياخد شهادته؟؟
طب حا يلاقى شغل؟؟طب حا يصرف عليها منين؟؟
طب لو بعد 6 سنين.هو حا يتغير و هى حا تتغير...وحا تمشى سنين المراهقه..
يا ترى حا يفضل عاجبها؟؟
يا ترى حا تفضل بنتى حلوه فى عينه و اللا مش حا تعجبه؟؟
طب لو سبتهم يحبوا بعض...يا ترى حا يقدروا يتحكموا فى تصرفاتهم..؟
أنا عارف بنتى...مش حا تستحمل
لا...لا....أنا ما أقدرش أمشى ببنتى على جسر لسه ما كملش...الاحسن أستنى شويه...وأنا شايف عرسان جاهزه...ولو 50 %...يبقى أنقى الاحسن ليها))
الاب...بيفكر صح....ولازم تحط أفكاره فى خطتك العمليه



طب اسمعونى
حا اقول لها انى معجب بيها...وحا أطلب منها تستنانى...على قد ما تقدر
مش حا أقف معاهاو لا حا أعرضها لشبهه
مش حا أسىء لها بأى تصرف أو نظره أو كلمه
حا أعمل كل جهدى...علشان أنجح و أكون نفسى بسرعه.....
حا أتقى ربنا فيها....ايه رأيكم
كلام جميل....بس هى تكون مقتنعه الاول و تساعدك
كلام جميل محتاج جهاد نفس كبير
كلام جميل لو اتنفذ صح.....وبنيه لله....علشان ربنا يحميه
يعنى خلاص
لا...لسه.......لازم تتأكد ان مشاعرك فى مكانها قبل ما تقول لها...وترجع بعد كده فلا كلامك و تكسر بخاطرها....وتجرح قلب...برىء
يبقى بلاش...خوفتونى
لازم تكون شخص عاقل...وناضج...ومش هوائى.ورأيه بيتغير كتير ..وطبعا مش لئيم
لأن قلوب البنات مش لعبه...وربناحا يحاسبنا يوم الدين
وزى ما بتحافظ على قلب أختك...لازم تحافظ على قلبها
وانت كمان يا اختنا...اوعى تعطى كلمه..او تصريح....الالو كنت متأكده من مشاعرك...لأن بسهوله جدا بكلمه من لسانك ترفعى قلبه لفوووق
وفجأه....ترجعى فى كلامك....وتخنقيه....وترميه على الارض....وتجرحيه


و الموضوع بقى صعب ليه
هو القرار صعب كده.....ده أنا كده مش حا أكلم حد...وحا أخاف أرفض حد
مش صعب و لا حاجه....ما تخافوش و تقلقوا
أنا ما بأقولش اننا نحشرحياتنا كلها و نعيش تعساء
ولا بأقول لك اكدبى على فلان..لأنه صعبان عليك تقولى له انه مش عاجبك.وكل ما تفتكرى كلامه و صوته اللى بيرتعش....والورده...والقلب.و...و.....
وصعبانه عليك فلانه لأنك قلتلها انها عاجباك.واتقدمتلها..ومش عاوز تجرح شعورها...فحا تكمل المشوار...مرغم...وانت مش مقتنع...

الجراءه هنا مطلوبه....لأن الالم القريب...خسائره أقل من.. الالم البعيد
دى الحقيقه
وهى دى الحياه
يبقى لازم نحافظ على الجوهره اللى جوانا....وبلاش نخربشها بتجارب احنا فى غنى عنها...علشان تلمع قوى...لما ييجى الوقت....ونسمع الاذان...ونفرح بصيامنا...ونفخر بفطارنا

بأتمنى لكم حياه حلوه...كلها فرحه...وحب و طرحه
من غير خساره....وفى طاعة الله