(( ساعات ))

من طرف dr_khaled السبت مارس 14, 2009 2:12 am

ساعات بنحس اننا فرحانين
لكن من جوانا
الحزن مالينا
ساعات بنبقى للأشواق عطشانين
لما الحب بينبض فينا
وساعات بنجري ورا حاجة مش عارفينها
شايفنها بس أبدا مش حاسينها
زي سراب في الطريق مش باين
عـ الأرض واضح وساكن
بس عمرك ما تقدر توصله
ولو قضيت عمرك تخططله
لكن برده...
تتحداه وتجري وراه
وكأنك يوم راح تبقى جواه
وساعات نبقى قاعدين ساكتين
واليأس بيكسر أمانينا
نستسلم للزمان وللنصيب
ونسلّم بفراق الحبيب
والنار في القلب قتلت ليالينا
وساعات نحن للي راحوا
اللي سابوا في القلب آهاته وجراحه
ونحن لأيامنا معاهم
نفتكر لحظاتنا
وكلامنا
وخوفهم
وخوفنا
نرجع نقول كان هَمْ وهما ارتاحوا
وبكرة راح نكون وياهم
بنعزّي نفسنا في سكتنا
وبنداوي جروحنا في محنتنا
لكن جرح الفراق
والحنين و الأشواق
دايما بيبقوا مهما حصل
وللنسيان.. لا مفيش أمل ...
وساعات نفرح
والدنيا متسعناش
والقلب بعد دمعته يبتسم
الحزن يبعد ميشوفناش
والضحك على جبينّا يترسم
وساعات نتوه وسط الزحمة
ناس عايشين وسط اللمة
متعرفش مالنا
ايه بس اللي غير أحوالنا؟
من فين الطريق وفين مشوارنا؟
في وطنا؟ فين ديارنا؟
فين البيت والأهل؟
فين الصحاب والسكن؟
فين اللي في حضنهم نرتمي؟
ومن حنان قلوبهم نرتوي؟
ساعات تسأل أسئلة من غير إجابات
وساعات تلقى إجابات
تندم إنك عرفتها..
تندم إنك سألت..
تندك إنك فكرت..
أو إنك في العتمة شفتها
ساعات جوة وفاءنا ننطوي
مهما اتخانا منخونشي
وإن كان العيب منهم
العيب منّا ميكونشي
نتخان من أعز حبايبنا
نسلّم ونقول قدرنا ونصيبنا
بس زيه زي باقي الجراح
سايب أثره اللي عمره ما راح
أثر اللي داس على قلبنا بقسوته
اللي على قلبنا طبعت خطوته
وساعات..
ساعات... تلجأ للي خلقك
هو اللي خلقك و عـ الأرض وجدك
بقلبك تشتاقله وتحن له
وطريقك ترجع تبدأه من أوله
طريقك يبقى هو راضي عنه
ياللي انت روحك أصلا منه
وبهمسك تناجيه وتقوله
أجمل ساعاتي وأنا بدمعي بحن لك ....

من طرف khaled gamal abd elmouemn السبت مارس 14, 2009 2:19 am

جامده جامده ياخالد ومعني القصيده سامي اوي بيجي علي الجراح
فعلا ومسمي القصيده جميل اوي (ساعات) وربنا
مايحرمنا من شعرك ياخالود
انا فحان بيك كعضو معانا في المنتدي :hat: :hat: