نصايح فتحيه للست سنيه

من طرف dezner الثلاثاء يناير 13, 2009 3:17 am

نصايح من الست فتحية
للست سنية
عن فتكات وفتحية
بس مش لوجه الله
يارب تعجبكم
فتحيّة : ألووووووووو
سَنيّة : أهلا يا توحة ازيك ؟
فتحية : مين سنسن ازيك انتي وعامله ايه ؟
سنية : الحمد لله ياختي بصي عندي ليكي خبر حلو
فتحية : خير ان شاء الله
سنية : فتكات بنتـي اتخطبت لمحسن ابن الأستاذ مسعود جارنا
فتحية : لولولولولي مبروك يا حبيبتي
سنية : الله يبارك فيكي عقبال بنتك رَوحيّة يا رب
فتحية : يا رب
سنية : طبعا ح تشرفونا
فتحية : فين؟
سنية : هنا في بيت أبوها وكتب الكتاب في المسجد
فتحية : ايه ده ! الخطوبة في البيت ؟ هوّ بيتكم حايكفي أهل الشارع والجيران ؟ ده حتى عيلتكم كبيرة
سنية : ح يكفّي بس قولي ان شاء الله
فتحية : ان شاء الله ويا ترى جبتم الشبكة ؟
سنية : أمال ايه ...إسورة وخاتم زي العسل
فتحية : ايه إسورة وخاتم بس ! ده انتي بنتك تستاهل تُـقلها دهب
سنية : الله يخليكي المهم السعد
فتحية : لا لا لا لا يا سنية انتو اتساهلتوا ..لازم العريس يدفع علشان يحس بقيمة عروسته, كده رخّصتوها
سنية : تفتكري ياختي ؟
فتحية : طبعا ولازم يجيبلها أحسن فستان كمان
سنية : بس هي ح تلبس فستان أختها
فتحية : ايه....ده كلام ؟ ...دي ست العرايس
سنية : طب أعمل ايه ياختى ده خلاص الخطوبة بكره ؟
فتحية : كلّمي أبوه وأمه واتمسكي بموقفك .. لازم يجيب لها فستان ويزوّد الشبكة وأعملوا الحفلة في نادي
سنية : بس انتي عارفة جوزي ما بيحبش كده
فتحية : خلاص خليكي كده سلبيّـة وسيبي بنتك تتهان وتتباع رخيصة , فين الايجابية ؟ هو انتي ياختي ما سمعتيش عن صناع الحياة واللي بيعملوه
سنية : آه سمعت في التليفزيون
فتحية : خلاص أعملي حاجه بسرعة
سنية : أنا ح أقفل معاكي وأكلم أهل محسن
وفـعلاً.. استجابت سنية لوسوسة فتحية وكلمت العريس وأهل العريس
واتفركشت الجوازة
وعيّطت فتكات ... ومرت الأيام وفي ليلة من الليالي سمعت سنية زغـروطة كبيرة ولولبيّـة
سنية : فتكات
فتكات : أيوه يا ماما
سنية : سامعة اللي أنا سامعاه ؟
فتكات : اهيء اهيء أيوه يا ماما
سنية : دي زغـاريـط ..يا ترى منين؟
فتكات : من عند طنط فتحية
سنية : الله...روْحيّـة اتخطبت ؟
فتكات : اهيء اهيء أيوة يا ماما
سنية : طب بتعيطي ليه..عقبالك يا نور عيني...ما تزعليش
فتكات : عارفة اتخطبت لمين يا ماما ؟
سنية : لأ...اوعي تقولي
فتكات : محسن يا ماما .. وقدّم لها نفس الإسوِرة والخطوبة ح تكون في بيتهم مش في النادي.. وكمان لبست فستان بنت عمها
إهـيء إهـيء
إهـيء إهـيء

من طرف KiKo الثلاثاء يناير 13, 2009 5:27 am

اهىء اهىء
بجد فتكات صعبانة عليا اوى
شكرا يا عطار

من طرف dado الثلاثاء يناير 13, 2009 5:50 am

لا مش هعرف انام ليه كده يادزنور

من طرف dodo الثلاثاء يناير 13, 2009 8:55 am

منك للة يافتحية وربنا يعوض عليكى ياختى يافتكات

من طرف Dr .M الثلاثاء يناير 13, 2009 10:26 pm

الله يكون فى عونها

من طرف hero الثلاثاء يناير 13, 2009 10:32 pm

ههههههههههههههههه
جامدة يا عطورة فتحية ربنا ينتقم منها رغم ان اسمها يشبهلى شوية :lol:

ربنا يعوض فتكات ويرزقها بواحد احسن من محسن
موضوع جميل اوى
شكرا

من طرف dezner الثلاثاء يناير 13, 2009 11:48 pm

شكرا للمرور يا دكاترة

و معلش يل فتحى بقى أى اسم و السلام

من طرف أبو لبة الإثنين يناير 19, 2009 7:19 am

هما الستات كده دايما
مش هيرحمونا من لامهم اللي زي السم
لسانهم زي العقرب بجد حاجه فظيعة
الحمد لله أني أبو لبة مش أم لبة ههههههههههههه
حد عايز لب هههههه
بيس