ايه الحل ؟؟

ما زالت الأسئلة تدور برأسى و ما زالت تبحث عن إجابات لها، لم تعد المشكلة فى مين ؟؟ المشكلة دلوقتى هنعمل ايه فى الشهر اللى جاى ده علشان الإمتحانات؟
! الحمد لله اتضغطنا جامد جدا و الناس بدأت تكتئب و تمل و بعضهم مبقاش عارف هيعمل ايه فى الفترة دى و إمتى هيذاكر و البعض الآخر تقبل الأمر و هو إن إن شاء الله السنة اللى جاية هــذاكر و أكون أحسن و السنة دى خلاص مش مهم !!
أيوه فى مشاكل كتيير و فى ناس مظلومة فى الكلية و فى ناس بتقول إن الكلية صعبة و وحشة..إلخ و للأسف الناس دى بتزيد يوم بعد يوم مع إن بعد الثورة المفروض يكون فى أمل و مفيش يأس..بس معلش كل ده هيجى مع الوقت إن شاء الله..
أول ما دخلت الكلية..الحمد لله كل حد أكبر منى قالى الكلية صعبة ورخمة قوى..مع إن أنا مش جربت أصلا ؟؟ كتييييييييييييييييير أوى كل شوية يخنقونا و يزهقونا مع إن إحنا لسه مش عملنا حاجة ؟؟؟ طب ليه بيعملوا معانا كده ؟؟؟ هل دى العادة إن كل جيل بيسلم للى بعده و هكذا ؟؟؟ طيب لو فضلنا كده هيحصلنا ايه ؟!
ليه اتخنقنا من كل حاجة و مش بقينا طايقين حد حتى نفسنا ؟؟؟ دايما مخنوقين و مكتئبين و بنستسلم مع أول طوبة تخبطنا مع إن الطوب لسه جاى كتير !!
يعنى ايه ؟؟؟ نستسلم أكتر و نموت و خلاص ؟؟؟ ايه يا عم الكلام ده ؟؟
أنا مش بقول إن مفيش مشاكل بس أكيد كمان فى مسئولية على كل واحد فينا..
أنا بس عندى سؤال فى الأول..
هو ليه احنا مش بنذاكر إلا لما بنحس بالضغط و بنكون مضطرين نذاكر علشان الإمتحان بكره أو بعده ؟ ليه دلوقتى مش بنذاكر و لو ذاكرنا بنذاكر من غير نفس و بدون تركيز ؟؟
أنا فكرت فى كل ده و مريت بالتجربة دى لما جربت معنى الفشل و ضيعت سنة من عمرى، بس عرفت السبب و كمان عرفت ايه الحل..
ممكن تكون المشكلة إن احنا مشغولين فى العملى فى الفترة دى و الأسنان اللى بندور عليها كأنها كنز، بس النظرى مصيره ايه ؟
أكيد مش هنستنى لأيام الإمتحانات علشان نذاكر لأول مرة لإن كده مش هنستوعب حاجة و ربنا يستر على الباقى !!
بدون تطويل أكثر من اللازم
أنا أقولك تعمل ايه ؟
1- فى البداية اسأل نفسك انت عايز ايه ؟ نفسك تكون ايه ؟ لما كنت صغير ايه كانت أحلامك ؟ و مع العلم إن معظم أحلام الطفولة لم تتحقق و لكن على الأقل احنا هنبقى دكاترة فى يوم من الأيام إن شاء الله فــ لازم دلوقتى نسأل نفسنا
هو لما أنا هتخرج هكون دكتور و خلاص و هدور على الفلوس و بس ؟؟
أنا متأكد إن مهنة الطب دى من أسمى الرسالات و أكيد واجب علينا نطور من نفسنا شوية بمعنى إن احنا لما بنأخذ حاجة فأكيد فى يوم من الأيام هنستفيد بيها و لو ده محصلش فــ كفاية إن المعلومة دى انت عارفها و ممكن تساعدك تفهم معلومة أكبر..
2- انسى الكلية بمعنى الكلية حلوة ولا وحشة..مش مهم..الكلية مش هتستفيد لما انت تقعد او تنجح..دى مصلحتك و أرجوك حاول تدور عليها لان مفيش حد هيدورلك عليها..على قدر تعبك ستكون نتيجتك..ربنا هو اللى بيجازى مش الدكاترة يعنى لو الدكاترة عملوا المستحيل علشان تنجح و ربنا مش كاتبلك كده فــ مش هتعدى و ساعتها اعرف إن الغلط عندك و حاول تراجع نفسك..أما لو انت اجتهدت بجد و ربنا كتبلك إنت انت هتعدى ف هتعدى غصب عن أى حد..الموضوع لازم يبدأ من نفس كل واحد فينا..
3- حاول دايما يكون عندك ثقه فى ربنا و فى نفسك..
4- لا تفكر أبدا فى كلام ( المتشائمين و اللى ملهومش فيها بجد اللى بيقولوا دايما المواد صعبة و يا عم قضيها..احنا كده كده ساقطين ساقطين ) و فكر إزاى تذاكر كويس و بس..
5- لا داعى للاستسلام..فهناك دائما الوقت لكل شىء..فأرجوك لا تضيع هذا الوقت و تأكد أن هذه الفرصة لن تأتى ثانية لو ضيعتها..
6- اذا أردت الاستسلام.ففكر ملياً فى أبويك..كم أنفقا من دمهما و عرقهما و حياتهما لكى يراكا دكتور كويس أو على الأقل علشان يفخروا بك..
7- موضوع المذاكرة و التركيز فيها فى الوقت الحالى أمر يحتاج إلى بعض الهدوء..بمعنى مش لازم تعصب نفسك و انت بتذاكر و اسال نفسك انت عايز ايه من المذاكرة ( معلومة تثبت فى عقلك حتى تتخرج ولا معلومة هتكتبها فى امتحان و بعدها ربنا هيسهل )..و بالنسبة للناس اللى أول مرة هيفتحوا الكتاب فــ ياريت تكون أول مذاكرة مجرد تصفح و مش يكون الوقت لكل صفحة ساعة ، لأ ، مجرد 10 دقائق أو أقل..دى اول مرة و مهما عملت مش هتحفظ كل حاجة من أول مرة..فــ تكون اول مذاكرة إن أنت تأخذ فكرة عن الموضوع اللى بتذاكرة و تحاول تفهم بيتكلم عن ايه..و بعد كده حاول تركز أكتر و تحفظ..
ذاكر بس بإخلاص أكتر ..
فكر و لو لثانية..هتلاقى انك لو بدأت تعمل كده ..على الأقل هتحسن إن مفيش حاجة اسمها زهقت و مفيش حاجة اسمها يأس...
آسف على الإطالة و يارب تفكروا بجد ولو ثوانى فى الكلام ده...أعرف أن الموضوع متأخر قليلا و لكن لا بأس..هناك دائما وقت لمراجعة الحسابات...
و فى النهاية، لو أى حد محتاج حاجة بجد ممكن يطلبها بدون إحراج و أنا إن شاء الله هحاول أساعده و ممكن أى حد يبعت msg
على البروفايل بتاعى على الفيس بوك و أنا هحاول دائماً المساعدة...
https://www.facebook.com/profile.php?id=100000590191428

جزاكم الله خيرا

نستسلم مع أول طوبه.........هههههههههههههههههه

يا عم قول دبش _ مدفعيه تقيله _ قذايف هون انما مش طوب خالص