فوائد المذاكرة والدراسة فى مصر

فوائد المذاكرة والدراسة فى مصر

*سبب مقنع جداً عشان تهرب من مشوار عائلى خنيق

*حجة مقنعة عشان متسمعش كلام بابا و ماما عشان مش فاضى (ربنا معاك يابنى وينجحلك المقاصد )

*طريقة مضمونة عشان تخلع من واحد صاحبك رزل ولزقة (بس ميكونش معاك ف نفس الكلية لا يقولك اجى اذاكرلك )

وبرده طريقة مضمونة عشان تهرب من ضيوف ملهومش لازمة نطوا عليكو زى البراشوت (طنط و اونكل وولادهم الغلسين اللى عاملين زى مأمور الضرايب بينطوا عليكو على غفلة )

ممكن ترغى مع صحبتك بتاع 5 سعات متواصل على التليفون بحجة المذاكرة (بس طبعا مبيفتكروش الحوار دا وانك بتذاكرى لما الفاتورة تيجى 1000 جنيه )

وممكن تبات برا البيت وتتأخر عشان بتذاكر عند صاحبك .(مقطع روحك انت يا ضنايا )

طريقة مفعولها مضمون ف تظبيط البنات تقولها اجبلك ورق و محاضرات وانت أصلا مبتحضرش
او تقولها نعمل جدول ونذاكر سوا (قال يعنى الواد )

طريقة متجربة عشان تنفضى لواد حبيب زنان او عريس "أنا مبفكرش ف الكلام دا دلوقتى انا مركزة ف دراستى ومستقبلى" (مستقبل ايه يا أم مستقبل انتى فاكرة نفسك مارى كورى وللا زويل )

وطبعا ممكن تخليك قاعد 24 ساعة ع النت من غير ما حد يتكلم يا عينى الواد بينزل محضرات وبيعمل ابحاث(شوف ذل الدكاترة يا اخى بيمرمطونا )

طريقة مضمونة انك تقلب فلوس من باباك قال ايه كورسات و ورق و كتب (الناس بقت استغلالية وكل حاجة غليت يا حرام )

وطبعا دى اكتر حاجة بتنفع دكاترة العيون والأمراض النفسية ومصحات الأمراض العقلية من اللى بيحصل للطلبة (الدحاحين بس يعنى متقلقوش يا أصدقائى )

هى الدليل الأول و يكاد يكون الأوحد لأثبات ان الانسان كان أصله حمار (شوفتو دارون دا مبيفهمش بيقولك اصله قرد )

برده مسؤولة عن تخريج جيل من المتخلفين عقليا والمرضى النفسين المليانين عقد والجهلة
مما يضمن ان الشعب يبءا لووووز لووووز مش فاهم اى بتاع وميعكننش على الحكومة وبيظيط مع اى ظيطة (هشتكنا وبشتكنا يا ريس)

بتساهم ف حل الأزمة السكانية بارتفاع معدلات الانتحار (يللا خدوا الشر وراحوا)

بتساعد فى تنمية روح الابتكار بتخلى الطالب طول الوقت بيخترع اساليب جديدة ف الغش (تنمية مهارات دى وللا لأ )

هى العلاقة الوحيدة بيننا وبين الانسان البدائى من حيث انك تشوف الطلبة ايام الامتحانات جاين دقنهم لحد ركبهم
والبنات بءا بتظهر على الحقيقة بيطلعوا من غير ما يغسلو وشهم

تتدربك على الثبات الانفعالى لما تدخل لدكتور الشفوى ويجبلك سؤال ملوش معنى ويبتدى يتفزلك وللا معيد ف السيكشن يترسم ويتنك ولو هزر بيبءا هزار دمه تقيل تبءا عايز تقوم تديله بوكس تطبقله وشه لكن بتمسك نفسك

بتعلمك ازاى تتصرف فى اى موقف مثلا لما يجلك سؤال ف الامتحان مش من المنهج ولا من برا المنهج حتى طبعا مش هتسيبه فاضى فتخترع اى كلااااام وهنا ينطبق نظرية اى كلام فاضى معقووول