سيبنى فى حالى الدنيا صيام

مش عارف ليه الناس دايما بتعمل شهر رمضان ده أزمة كبيرة
زيادة قوي عن الطبيعي

مش عارف ليه كله في رمضان مش عايز يتحرك ..
والسبب.. أصل الدنيا صيام


مش عايز يصبر..
والسبب.. أصل الدنيا صيام


زي ما بيقولوا .. مش طايق حد يحكله على مناخيره..
والسبب.. أكيد طبعا أصل الدنيا صيام


---

أكيد الواحد لما بيبقى جعان، مش هيبقى زي ما يكون مالي التنك وميت فل وأربعتاشر
أكيد وهو عطشان وماشي في الحر..
وإعلانات بيبسي وكوكاكولا وشويبس عمالة تخايله يمين وشمال
مش هيبقى زي ما يكون شارب أو لما يكون يقدر يشرب في أي وقت


لكن الفرق يعني مش هيبقى كبير قوي للدرجة دي
خصوصا في الساعات الأولى من الصباح الباكر
اللي لو كنت إنت أساسا في غير رمضان.. يمكن تكون لسة ما كلتش ولا شربت حاجة

----



كنا مرة في محاضرة بايو في أول رمضان
ودخل لنا الدكتور (مش هاقول هو مين ).. وطبعا في شوية كلام وهمهمات من اللي بتبقى في الأول دي
دخل.. التكشيرة التمام على وشه.. وكانت أول حاجة يقولها "وهو بيزعق" :

باقول لكوا إيه بقى.. أنا مش عايز دوشة
الواحد صايم ومش قادر يزعق.. خلونا نقول الكلمتين بالراحة أحسن
إحنا صايمين وما فيناش نفس خلقة.. وإلا أمشي بقى وتبقى المحاضرة اتشرحت

إيه يا عم.. إنت بتتلكك عشان ما تشرحش؟
طيب لما إنت مش قادر تقول الكلمتين والساعة لسة 8 الصبح
أمال على الساعة تلاتة ولا أربعة هتعمل إيه؟

---

طبيعي إنك تبقى ماشي في الشارع ويتزحم شوية
عادي يعني
لكن الأكيد إن الشوارع لازم تبقى شبه حلبة السيارات المتصادمة بتاعة الملاهي ساعة الفطار
مش عارف ليه لما المغرب يقرب الناس زي ما بتكون بتتجنن
كله بيجري ..
كله بيكسر على كله..
وكله بيعمل غرز بين العربيات..

ويا سلام بقى لو الشارع وقف.. كلاكسات وزعيق للصبح
والاتنين (الكلاكسات والزعيق)غالبا بيكون فيهم ألفاظ خادشة للحياء العام والخاص.. وفي رمضان.. عادي يعني مش مشكلة.. المهم نلحق الفطار !!

طيب يا جماعة اصبروا شوية
ده إحنا لو صبرنا شوية الطريق هيفتح لوحده.. وهنروّح كلنا واللي عايز حتى يغطس في الحلل هيغطس
يعني لو المغرب الساعة ستة وأنا فطرت ستة وعشرة إيه اللي هيحصل يعني؟
المعدة هتعمل إضراب عن الطعام؟ ولا هيغمى على الواحد من العشر دقايق دول؟
ده إحنا حتى في شهر الصبر

---

باقول لواحد صاحبي إني عايز أكشف نظر..
قال لي طيب ما تكشف في المستشفى (قصر العيني)
قلت له يا عم بلا مستشفى بلا بتاع.. أنا هاكشف برة أحسن
قال لي إنت بس خد الكارنيه واطلع اكشف في وحدة الملك فهد في الدور التاسع
هيصوروا الكارنيه ويعملوا لك اللي إنت عايزه.. والوحدة نضيفة وكويسة

من كام يوم كنت في الكلية وافتكرت الكلام ده .. قلت أطلع أجرب
كان معايا واحد صاحبي .. الساعة كانت واحدة وشوية
طلعت.. المكان فااااااااضي تماما
شوية ولقيت واحدة خارجة بتجرجر في الشبشب "مش عارف ليه فكرتني بموضوع Ice age بتاع مدنجي"
كانت عامِلة من عُمّال الوحدة ..
شكلي كده قلقت منامها ولا حاجة

- سلامو عليكو
- عليكم السلام
- لو سمحت كنت عايز أكشف نظر.. أنا طالب هنا
- ماشي يا بني .. بس مفيش حد هنا دلوقتي
- كلهم مشيوا؟!!
- أيوة إنت عارف بقى الدنيا صيام والدكاترة بتروح بدري.. ابقى تعالي بدري شوية هم بيمشوا على اتناشر كده
- بس أنا مش هاقدر آجي اتناشر.. خلاص هاجيلهم على الساعة تمانية ونص كده
- خلاص ماشي.. ولا أقول لك.. تعالى الساعة تسعة عشرة كده عشان يكونوا جم
- هم بييجوا الساعة عشرة؟!!!
- أيوة بقى إنت عارف إن الدنيا صيام دلوقتي وبييجوا متأخر شوية
- (!!!) طيب سلاموا عليكوا
- وعليكم السلام.. كل سنة وإنت طيب
- وإنتي بالصحة والسلامة
- ربنا يوفقكوا يا دكاترة
- الله يخليكي
- كل سنة وإنتوا طيبين
- وإنتي طيبة

طبعا عملت عبيط وأنا عارف طبعا كل الـ"كل سنة وإنتوا طيبين" دي يعني إيه..



بس بقيت مش فاهم..
طيب هم بيمشوا بدري عشان رمضان.. ييجوا متأخر ليه بقى؟

لأ.. وبييجوا تسعة عشرة.. ويمشوا اتناشر
يعني مجموع ساعات الشغل بالكتير خااااااااالص.. ساعتين تلاتة

كل ده ليييييه؟.. أصل الدنيا صيام؟
هو الصيام لازم يوقف حال البلد كلها يعني؟

ما هو أكيد طبعا كالعادة هو ده الوضع العام لكل المصالح الحكومية في البلد
"إذا كان هم كده بره رمضان أصلا"

مش مهم إنت بقى مصالحك تتعطل..
حالك يقف..
إن شالله تولع
مش مهم
أصل الدنيا صيااااااااام


مش عارف بصراحة الواحد يقول إيه..
يلا..
صحوني ع المدفع