حياتنا بقت اشبه بنادى الزمالك!!!

من طرف Eman Iran الخميس فبراير 26, 2009 5:53 pm

الواحد لما يقعد ويعقد مقارنات بينه وبين نفسه عن حاجات حواليه ..
يلاقيها بتتشابه مع نادي الزمالك وأزمته الاخيرة..
حتى إن حياتنا كلها أصبحت عاملة زى نادي الزمالك بكل سلبياته وأزماته ..

موش بس نادى الزمالك اللى محتاج إصلاح حقيقى ، ده حياتنا كلها عايزه إصلاح ..

وشبه ده باللى بيحصل فى نادي الزمالك...
يلاااااا بينا نلقى الضوء على حياتنا ...
اللى شبه نادى الزمالك..

1- الزحمة فى كل مكان مصر فى طابور العيش وقدام السينمات وفى المدارس وفى الجامعات وفى المسارح ، المكان الوحيد اللى بتلاقيه فاضي هو مدرجات نادي الزمالك .

2-الأسعار فى مصر ديما فى صعود زى النادي الأهلي وديما المرتبات فى هبوط زى نادي الزمالك ..

3-بيقولك الطبقة الوسطى فى مصر فى طريقها للإنقراض، وأكد المحللون الرياضيون أن جماهير نادي الزمالك فى سبيلها للإنقراض .

4-الوزير عندنا ممكن يقعد سنين فى الوزارة رغم انه لم يقدم شىء ، ونفس الحال فى الزمالك اللى ممكن يقعد فيه مدير فنى انهزم من طوب الأرض .

5-المهندس أحمد الليثي وزير الزراعة السابق أكد إن مصر ممكن تحقق الاكتفاء الذاتي من القمح بدلا من إهدار الملايين فى شراء القمح الأمريكي الفاسد ، تماما زى نادي الزمالك اللى ضيع الملايين فى صفقة الخمرجي ( أجوجو) وبتمنه كان يشتري كام لاعب صغير من الدوري المصري يقوموا بالغرض .

6-أحمد عز محتكر الحديد وعمال يلعب فى السوق لوحده ، تماما زى ( شيكابالا) لاعب الزمالك فى ماتش ( بني عبيد) محتكر الكورة وعمال يلعب لوحده .

7- مفيش ورقة رسمية فى مصر بتطلع غير بطلوع الروح ،فالعمل الحكومي يتميز انه بطىء جدا تماما زى تحضير الزمالك للكرة فى نص الملعب .

8-الطالب فى مصر موش بيذاكر غير لما يسقط أو يشله مادة لو كان فى كلية تماما زى نادي الزمالك اللى مش بيتحرك غير لما يجي فيه جون .

9-إنتشرت مؤخرا قضايا التحرش زى اللى حصلت فى وسط البلد وفى شارع جامعة الدول العربية ، تماما زى ما مرتضى منصور بيتحرش بنادي الزمالك .

10-هناك بعض الكتابات السياسية اللى بتقول إن الرجل الاول ( عبد الناصر ) خلص على الرجل الثاني ( عبد الحكيم عامر) تماما زى ما بعض الكتابات الرياضية بتقول إن النادي الاول ( الاهلى) سبب أزمة النادي التاني ( الزمالك ) وخلص عليه تماما.

11-الشعب المصري زمان كان بيتفرج على برنامج ( سر الأرض) موش علشان فيه معلومات زراعية ولكن علشان يشوفوا ( القرموطي) اللى كان لسه ظاهر وقتها ، تماما مثل مشاهدة مباريات الزمالك موش علشان نتفرج على الأداء ولكن علشان نشوف خناقات اللعيبة على مين اللى حيشوط ضربة الجزاء
منقول